潮劇

潮劇（又叫做潮州戲）係潮州地區（潮州、揭陽、汕頭等地）嘅地方戲，係潮州文化嘅精華，潮曲係潮劇嘅劇目裏面嘅唱段，情況就好似粵曲係粵劇（又叫做廣東大戲）嘅劇目裏面嘅唱段一樣。潮劇係廣東三大戲曲即係粵劇、潮劇、漢劇（客家劇，又叫外江戲）之一。

潮劇係喺元明南戲演變出嚟嘅，當時叫做潮腔、潮調、泉潮雅調，係明代南戲嘅五大聲腔之一。潮劇分為生、旦、淨、丑四大行當，每個行當仲有唔同嘅類型，用嚟塑造唔同嘅角色。同粵劇唔同，潮劇嘅丑生（又叫做「花生」）係潮劇裏面最受觀眾歡迎嘅角色，原因係丑生表現咗一般平民嘅特點，而丑生通過自嘲、貪玩、搞笑等嘅方式，用滑稽嘅動作同埋幽默嘅說話，將一般平民嘅特點誇張咗，令觀眾投入角色裏面。潮劇嘅丑生可以係任何角色，上至皇帝、大臣，下至市井小民，甚至書生，而且角色可以係悲中有喜，亦可以係喜中有悲，由悲喜嘅交錯，逗觀眾笑。

潮劇喺明朝開始形成後，流行喺廣東潮汕同埋閩南地區，亦跟住潮州人嘅遷徙，傳播到港澳、台灣、泰國、新加坡、馬來西亞、印尼、柬埔寨、越南等嘅東南亞同埋歐美地區，是中國對外最有影響嘅地方戲劇之一。