ދީނުން ފިލާވަޅެއް: އިދުރީސްގެފާނުގެ ހުނަރު

މިޒަމާނަކީ ޓެކޮނޮލޮޖީގެ ޒަމާނެވެ. ހުރިހާ ކަމެއްވެސް އިނގިލިކުރިން ނިންމާލެވޭއިރު ދިރިއުޅުން މިވަނީ ނުހަނު ފަސޭހަވެފައެވެ. ގޭތެރޭގެ ކަންކަމަށް އައި ލުއި ފަސޭހައާއި އެއްކޮށް މަސައްކަތްތެރިކަމާއި ދިވެހިންގެ ޒަމާންވީ ހީވާގި، މުރާލި ދިރިއުޅުން މިއަދު ނެތިދާން ފަށައިފިވެސް ކަހަލަ އެވެ. ކޮންމެއަކަސް، އަހަރެމެންގެ ދީނަކީ ހަމައެކަނި އަގީދާގެ ކަންކަމުގެ އިތުރަށް، ދިރިއުޅުމުގެ އެތަށް ފިލާވަޅެއްވެސް ބުނެދޭ އަދި އަންގައިދޭ ދީނެކެވެ. މިގޮތުން ކީރިތި މާތް ނަބިއްޔުންގެ ހަޔާތްޕުޅުން އަހަރެމެންނަށް ދުނިޔަވީ އެތަށް ރިވެތި މިސާލުތަކާއި ފިލާވަޅުތަކެއް އަންގައިދެއެވެ.

މިއަދު ޑރ. އިބްރާހިމް ޒަކަރިއްޔާ މޫސާ ކިޔައިދެއްވަނީ ނަބިއްޔާ އިދުރީސް އަލައިހިއްސަލާމްގެ ވާހަކަފުޅެކެވެ.

އިދްރީސްގެފާނަކީ ﷲ ތަޢާލާ އެކަލާނގެ ފޮތުގައި އެ ރަސޫލަކާމެދު ޚަބަރު ކުރެއްވި އެއް ރަސޫލެވެ. އެކަލޭގެފާނަކީ އިސްލާމީ ތާރީޚުގައި ފާހަގަކުރެވޭފަދަ އެތަށް ޝަރަފެއް ލިބިވަޑައިގެންނެވި ބޭފުޅެކެވެ. މިގޮތުން އެކަލޭގެފާނުގެ މައްޗަށް މާތްﷲ 30 ޞުޙުފު ބާވާލެއްވިއިރު އެންމެ ފުރަތަމަ ޤަލަމުން އެއްޗެއް ލިޔުއްވީވެސް އިދުރީސްގެފާނެވެ. އަދި އެންމެ ފުރަތަމަ ހެދުމެއް ފައްސަވާ އަދި ފަހާފައިވާ ހެދުމެއް އެންމެ ފުރަތަމަ ތުރުކުރެއްވެވީވެސް އެކަލޭގެފާނެވެ. އަދި ތަރިތަކަށް ބައްލަވާ ދަތުރުފަތުރު ކުރައްވާ ހެއްދެވީ ވެސް މިކަލޭގެފާނެވެ.

މާތްﷲގެ ނަބީކަމުގެ މަތިވެރި މަގާމާއި އެކުގައިވެސް އިދުރީސްގެފާނު ފާހަގަކުރެވެނީ ވަރަށް މަސައްކަތްތެރި ބޭކަލެއްގެ ގޮތުގައެވެ. މާތްﷲ އެކަލޭގެފާނު ސިފަކުރައްވަނީ އަޚްލާގީގޮތުން އެހާމެ ރަނގަޅު އަދި މާތްﷲއަށް ތަގުވާވެރިވި ހެޔޮ ބޭކަލެއްގެ ގޮތުގައެވެ.

ހަމައެޔާއެކު އިދްރީސްގެފާނު މަޝްހޫރުވެފައިވަނީ ޙިކްމަތްތެރިއެއްގެ ގޮތުގައެވެ. އެކަލޭގެފާނުގެ ޒަމާނުގައި މީސްތަކުން 72 ބަހަކުން ވާހަކަ ދައްކާ އުޅުނުކަމަށް ޢިލްމުވެރިން ފާހަގަ ކުރައްވާއިރު މާތް ﷲ ސުބްޙާނަހޫވަތަޢާލާ ވަނީ އެއިން ކޮންމެ ޖަމާޢަތެއްގެ މީހުން ވާހަކަދައްކާ ބަސް އިދްރީސްގެފާނަށް ދަސްކޮށް ދެއްވާފައެވެ. އެއީ އެބައިމީހުން އެދައްކާ ވާހަކަ އެކަލޭގެފާނަށް އެގިވަޑައި ގަތުމަށެވެ. އަދި ﷲ ތަޢާލާ އެންމެ ފުރަތަމަ މަދަނީ ސިޔާސަތު އުގަންނަވައިދެއްވި ފަރާތަކީވެސް އެކަލޭގެފާނެވެ. އަދި ރަށްތައް ތަރައްޤީ ކުރާނެ ގޮތްތައްވެސް ވަނީ ބަޔާން ވެފައެވެ.

މިޒަމާނުގައިނަމަ މަތީ މަގާމެއް ނުވަތަ ވަޒީފާއެއް ލިބިއްޖެނަމަ އެމީހަކު ގިނަ ފަހަރުވަނީ އެހެން މީހުންގެ މައްޗަށް ބަސް ކިޔަން ހުންނަ މީހަކަށް އެކަންނެވެ. އެމީހެއްގެ ޒިންމާތަކާއި ވާޖިބްތަކަށްވެސް ގިނަ ފަހަރު އޮންނަނީ އިހުމާލުވެ ފަރުވާ ކުޑަކުރެވިފައެވެ. އަދި އޭގެ ސަބަބުން މަސައްކަތުގެ މާހައުލުގައިވެސް އަދި އަމިއްލަ ދިރިއުޅުމުގައިވެސް ބޮޑެތި ނާކާމިޔާބީތަކަށް އެމީހަކު ހުށަހެޅިދެއެވެ.

އެހެންކަމުން އިދުރީސްގެފާނުގެ ހަޔާތްޕުޅުން އަހަރެމެންނަށް އެތަށް މުހިންމު ނަސޭހަތެއް އެބަ ލިބިދެއެވެ. ކިތަންމެ މަތިވެރި މަގާމަކަށް އެމީހަކު ވާސިލްވިޔަސް، އަނެކުންގެ މައްޗަށް ބަރޯސާވެގެން ހަޔާތް ބޭކާރުކޮށްލުމަކީ ކޮށްގެންވާނެ ކަމެއް ނޫންކަމެވެ. އަދި އެއީ އަދިވެސް އިތުރަށް އިލްމާއި ހުނަރު ހޯދުމަށް މަސައްކަތް ނުކުރާންވީ ސަބަބެއްވެސް ނޫންކަމެވެ.

"މިއަދުގެ ސައިންސްވެސް އަތުން ލިޔެ އުޅުމަކީ ސިކުނޑީ ތަރައްގީވެ ސިކުނޑީގެ މަސައްކަތް ހެޔޮގޮތުގައި ކުރުމަށް މަގުފަހިވާ ކަމެއް ކަން. އެކަމަކު މިއަދު ކީބޯޑުތަކުން ލިޔެ ލިޔެ، ގަލަމުން ލިޔުމުގެ މުހިންމުކަންވެސް ގިނަބަޔަކަށް ނެތިގެން ހިނގައިދާން ފަށައިފި. އެހެންނަމަވެސް އިދުރީސްގެފާނުގެ ހަޔާތްޕުޅުން އެގިގެންދަނީ އިލްމާއި ހުނަރުވެރިކަން ހޯއްދެވުމަށް އަތްޕުޅުގެ ބޭނުން ހެޔޮގޮތުގައި ހިއްޕެވިކަން." ޑރ. ޒަކަރިއްޔާ ވިދާޅުވިއެވެ.