Plaiyofs

Les plaiyofs, dins on tchampionat d' fotbale (mins on l' pout fé dins des ôtes espôrts), c' est on sistinme po fé rdjouwer inte di zeles les meyeusès ekipes del divizion onk al difén del såjhon classike (faze normåle).

On pout eto fé rdouwer inte di zeles les ekipes emîtrinnes (plaiyofs 2) et les dierins (po vey kî çki va dischinde, plaiyofs 3).

Li sistinme a cmincî el Beldjike al såjhon 2009-2010.

Atuzmint

Al fén del såjhon classike, on divize les ponts e deus. Adon, gn a les shijh prumîs ki djouwnut onk conte l’ ôte.

C' est çou k’ on pout lomer li ptit clasmint. Non seulmint, c' est po sawè kî çki serè prumî a l’ fén do tchampionat, mins i gn a eto l’ bataye po les plaeces po les copes d' Urope.

Advantaedjes

Li livea do tchampionat rmonte, ca l' ekipe ki s' mete al tiesse å cminçmint do tchampionat et-z î dmorer pepermint n' est nén seure di esse tchampione. Adon, i n' polnut nén divni nawes, et s' ripoizer so leu glwere do moumint.

Avou ça ki l' bataye po les plaeces po l’ Urope pout rapoirter do prestidje mins eto des liårds.

Eyet co : el toû finål pou les shijh prumîs assaetche bråmint des spectateurs avou des rivnous d' rawete (intrêyes et contrats d' riclame).

Acceptance

Des clubs k’ i gn a end volént nén ci sistinme la. Mins asteure, i sont binåjhes di l’ awè.

Mins gn a co des ôtes ki vôrént fé on tchampionat avou seulmint 16 ekipes eyet pont d’ plaiyofs.