Pskov

Pskov
Псков

Lidnanznam	Flag
Valdkund	Venäma
Eläjiden lugu (2024)	187,129 ristitud
Pind	95,6 km²
Pämez'	Boris Jolkin (kül'mku 2022—)
Telefonkod	+7−8112-xxx-xxx
Avtokod	60
Aigvö	UTC+3 (MSK+0)

Lidnan kart (2022)

Pskov (ven.: Псков) om Venäman lidn da lidnümbrik valdkundan lodehes. Se om Pskovan agjan administrativine keskuz da kaikiš suremb lidn, mugažo om Pskovan rajonan keskuseks (ei mülü rajonha).

Istorii

Eländpunkt mainitase ezmäižen kerdan Lavrentijan aigkirjas kuti Pleskov (ven.: Плесков) i Pskov lidnan statusanke vl 903. Nimitihe jogen mödhe. Pskovan lidnuz oli vižrenghaižeks, koume rengast oma kaičenus tähäsai.

Vozil 1348−1510 Pskov oli ripmatoman Pskovan Tazovaldkundan pälidnaks. Oli Venäman ühteks kaikiš järedambiš da znamasižembiš lidnoišpäi edel Piterin alusenpanendad.

Geografijan andmused

Lidn seižub Pskovanjogen (ven.: Пскова́) da Sur'-jogen molembil randoil niiden ühthejoksmusen sijas. Istorine keskuz levigandeb 47 metrad ü.m.t. keskmäižel korktusel, 16 kilometras Sur'-jogen lanktendan sijaspäi Pskovanjärvhe. Sijadase 278 kilometras avtoteidme Piterišpäi, matkad Moskvhasai om 743 kilometrad.

Klimat om ven kontinentaline valdmeren valatoitusenke. Voden keskmäine lämuz om +5,8 C°, kezakun-elokun +15,8..+18,3 C°, tal'vkun-uhokun −3,8..−5,7 C°. Ekstremumad oma −40,6 C° (tal'vku, viluku) i +35,7 C° (heinku, eloku). Kezaaigan minimum om −0,1 C° (kezaku), tal'vaigan maksimum om +12,4 C° (tal'vku). Ei voi panda halad heinkus-elokus (elokun minimum om +1,3 C°). Paneb sadegid 702 mm vodes, enamba kezakus-elokus (76..94 mm kus), vähemba uhokus-sulakus (33..37 mm kus). Kun keskmäine relätivine nepsuz vajehtase 65..75 % röunoiš keväz'kus-heinkus, 85..90 % redukus-uhokus.

Tobmuz

Lidnan nomeruidud lidnanlaptoiden kart (2010)

Pskov om lidnümbrikon üks'jäižeks eländpunktaks, jagase 14 nomeruidud ohjanduzlidnanlaptaks. Lidnan röunoiden piduz om läz 50 km.

Lidnan Duman sauvuz (2012)

Käskusenandai tobmuz om Lidnan Dum. Kaik eläjad änestuzoiktusenke valitas sen 25 ezitajad videks vodeks. Lugetihe Duman ezimest lidnan pämeheks vn 2022 sügüzehesai. Järgenduseližed valičendad Dumha oliba vl 2017.

Radonoigendai tobmuz om Lidnan administracii, se iče taričeb ičeze strukturad Dumale vahvištamha. Dum valiči administracijan pämest ende, se radnikuz om tühjitadud vn 2022 sügüzespäi, velgused oma sirtud lidnan pämehele (ven.: Глава города Пскова). Jäl'gmäine Administracijan pämez' om Boris Jolkin (kül'mku 2021 — kül'mku 2022). Edeline lidnan pämez' om Jelena Polonskaja (semendku 2019 — sulaku 2022).

Eläjad

Vn 2010 Venäman rahvahanlugemižen mödhe lidnan eläjiden lugu oli 203 279 ristitud, vn 2021 — 193 082 ristitud. Kaik 209 840 eläjad oli lidnas vl 2017. Kaikiš suremb lidnan ristitišt oli 209 tuh. rist. vl 1992 i 210 340 ristitud vl 2020.

Rahvahad (enamba 0,4 % vl 2010): venälaižed — 87,4 %, ukrainalaižed — 1,5 %, vaugedvenälaižed — 0,9 %, armenijalaižed — 0,5 %, toižed rahvahad — 1,6 %, rahvahuden ozutandata — 8,1 %.

Transport

Avtobusad da taksid oma kundaližeks transportaks lidnas. Kaik 12 sildad ühtenzoittas Sur'-jogen randoid.

Civiline da sodavägiden Pskov-lendimport (vai Ristad, ven.: Кресты, PKV / ПСК / ULOO, 110 tuh. passažiroid vl 2022) sijadase kudes kilometras suvipäivnouzmha lidnan istorižes keskusespäi. Se om rahvahidenkeskeiženke statusanke, tehtas reisid Piterihe da Moskvha.

Galerei

• 
  Lidnan administracijan sauvuz (2013)
• 
  Eläban Eziauguižen Stroican päjumalanpert' Kromas (Pskovan Kremliš), vn 2018 nägu
• 
  «Slavänka»-omblendfabrik (2011, Truvor-torguindmark)
• 
  Lidnan kul'turkeskuz (2018)
• 
  Pskovan valdkundaline universitet (2011)
• 
  Jäpert'kulun nägu vl 2011
• 
  Päraudtestancijan sauvuz vl 2018

Tetabad sündnuded

• Oksana Födorova (Oksana Borodina) (sünd. 1977) — Venäman fotomodel', TV-vedai, aktris da pajatai.

Irdkosketused

• Lidnan tobmuden portal (pskovgorod.ru). (ven.)