جوڑوں، پٹھوں کے درد اور مختلف امراض کا علاج ‘اگم حلوے’ میں موجود ہے، مزیدار اگم حلوہ صحت کیلئے بہت فائدہ مند ہے، حلوے میں پستہ، بادام اور دیسی گھی کا بھی استعمال کیا جاتا ہے۔
سندھ کے شہر دادو کی سوغات "اگم حلوہ” جو اپنی مثال آپ ہے، 134سالہ قدیمی سوغات میں بادام پستے کاجو اور دیسی گھی اور خصوصی طور پر اگم سمیت وہ تمام اجزاء شامل کیے جاتے ہیں جو سردی کے موسم میں انسانی صحت کیلئے کسی نعمت سے کم نہیں۔
دادو کے اس اگم حلوے کو ملک بھر کے دیگر شہروں سے آنے والے لوگ بہت شوق سے کھاتے ہیں اور اپنے عزیزوں کیلئے بطور تحفہ ساتھ بھی لے کر جاتے ہیں۔
آپ سوچ رہے ہوں گے کہ یہ اگم چیز کیا ہے تو ہم آپ کو بتاتے چلیں کہ اگم پہاڑوں سے ملنے والی ایک خاص گوند کا نام ہے جسے درختوں سے حاصل کیا جاتا ہے۔
اس حلوے کو تیار کرنے میں اس کے ماہر کاریگر اپنا تجربہ اور خاص ترکیب استعمال کرتے ہیں۔ طبی لحاظ سے اس حلوے کی افادیت اور غذائیت ایسی ہے کہ جوڑوں، پٹھوں کے درد اور مختلف امراض کے علاج میں اس کا کوئی ثانی نہیں۔
