Геликоптер

ET-670 AS-532 UL Cougar UME SCQ, Испания

Геликоптер — вид летадла з едным або даколькыма пропелерами, котры му дають можность и штартовати до лету, и приземляти ся вертикално, летѣти хоть в яком напрямѣ, або зоставати без руху во воздусѣ.

Основны принципы

Кедь у крылатых летадел здвижна сила ся творить воздухом, набѣгаючым на шпециалный профил крыла, а росте, чим векша скорость лету, то геликоптеровы «крыла» суть пера пропелера, каждое з котрых мать профил крыла, а здвижна сила ся творить набѣганьом воздуха и росте при векшой скорости обертаня пропелера. Зато геликоптер годен зависнути на едном мѣстѣ, кедь здвижна сила великого пропелера стачить, жебы не клесав, ани не поднимав ся. Великый пропелер повнить функцию носного крыла, так же геликоптер в припадѣ порухы в роботѣ мотора годен ся знижати з невеликов скоростьов и приземлити ся без гаварии в режимѣ автоматичной ротации пропелера од енергии встрѣчного потока воздуха. Геликоптер годен сѣдати на неприготовлены невеликы плохы (плоска стрѣха дома, палуба шифы).

Проблема корманьованя

Геликоптер мать компликовану систему корманьованя, котра ещи зависить ай од конкретной конштрукции машины. Во векшинѣ припадох про добру маневрователность конштрукция обсягуе ещи другый корманьовый пропелер, умѣшеный на довгом «хвостѣ». Пилот мать можность нахыляти плоху обертаня пропелерох, а тыж угол набѣгу пер пропелера. В первом припадѣ мѣнять ся напрям лету, в другом — величина здвижной силы, што вызначать клесаня або здвиганя. Покля не была створена система корманьованя, вшиткы пробы вывинути машину, способну до беспечного лету были безуспѣшны.

История вывину

D'Ascanio DAT3 1, Италия, 1930-ы

Первым пилотом, котрый досяг корманьованого лету на геликоптерѣ быв Француз Пол Корню, в новембрѣ 1907. Хоть его конштрукция з додаточным пропеллером на «хвостѣ» ещи была тяжко корманьована, але дала справный напрям далшого вывину: днесь подобный тип найросширенѣйшый.

В 1930-х ся вывинув иншый тип конштрукции геликоптера, котрый мать оба пропеллеры на едной оси, умѣщены на векшом одстояню еден од другого, жебы ся не спутали. В року 1935 найуспѣшнѣйшым быв талианскый геликоптер D'Ascanio, котрый «за 8 минут 45 секунд лету зробив едно километровое коло и вернув ся на мѣсто штарту, а найвекша вышка лету была 18 метры».

Масова продукция геликоптерох ся зачала в 1940-х, а в року 2001 во свѣтѣ были в хоснованю около 48 тысяч машин.

Жерела и одказы

• Boyne, Walter James (12 Sep. 2022). Helicopter. Encyclopedia Britannica. https://www.britannica.com/technology/helicopter. [перевірено 2022-11-07]. англ.
• Helikopter. // Révai nagy lexikona. 21. köt.. Budapest: Révai Testvérek Irodalmi Intézet Részvénytársaság, 1935. стр. 424–425. мад.
• Игнаткин Ю. М.. ВЕРТОЛЁТ. // Большая российская энциклопедия. Том 5. Москва, 2006. стр. 187–189. https://old.bigenc.ru/technology_and_technique/text/1909757. [перевірено 2022-11-07]. русс.