Heinrich Schmid

Heinrich Schmid (* 6 d' avrel 1921 a Turitg;+ 23 da favrer 1999 a Turitg) era scienzià da linguatgs ed il "bab" dal Rumantsch Grischun e dal Ladin Dolomitan.

Heinrich Schmid è naschì a Turitg cun ina flaivlezza d'udida. El è gia baud s'interessà per linguas. Uschia ha el emprendì grec, latin, franzos, talian, spagnol ed ils differents idioms rumantschs.

Il 1946 ha el concludì ses studi da romanistica a Turitg. Silsuenter ha el lavurà 15 onns tar il Dicziunari Rumantsch Grischun.

Il 1962 ha el abilità a l' Universitad da Turitg e curt suenter è el vegnì promovì sco assistent professur e trais onns pli tard sco professur extraordinari.

Pir tard, curt avant ch'el è sa retratg da la professura, il 1983, ha Schmid obtegnì il 1982 da la Lia Rumantscha l'incumbensa da crear ina lingua da scrittira unifitgada per il rumantsch.

Gia suenter sis emnas lavur intensiva ha Heinrich Schmid lura preschentà l'avrigl 1982 sias reglas per il Rumantsch Grischun.

Il 1988 ha el obtegnì dals Ladins da las Dolomitas la medema incumbensa da crear per els ina lingua da standard. Il 1998 ha el lura era terminà questa lavur.

Il 1999 è Heinrich Schmid mort nunspetgadamein d'ina attatga dal cor.