Hernando de Soto

	Vos an lenga piemontèisa
	Për amprende a dovré 'l sistema dle parlà locaj ch'a varda sì.

Conquistador.
Hernardo de Soto a l'era nassù dël 1500 a Barcarrota. Sò pare a l'era un nòbil ampoverisse e ël cit Hernando a l'é stàit adotà da la famija d'un nòbil potent, Pedro Avila, ch'a l'ha daje n'educassion. Dventà grand, de Soto a l'é partì për ël Neuv Mond.

Dël 1531 a l'é stàit ansema a Pizarro, scond an comand, ant la conquista dël Perù, bele ch'a l'era nen d'acòrd con sò cap ant ij sò massacri dj'Inca.
Peui a l'é tornà rich an Ëspagna e a l'ha marià Isabella, la fija ëd Pedro Avila.
An doi agn a l'avìa già sgheirà bon-a part ëd soa richisia e antlora a l'ha fàit arcesta a Carl V ëd podèj andé a conquisté la Florida.
Dl'avril 1538, chiel e soa fomna a son ambarcasse për Cuba, dont l'amperador a l'avìa falo goernador, con anviron ses-sent òm. L'armada a l'é restà a Cuba pì 'd mità ann a preparé l'anvasion. A l'ancamin dla prima 1539, de Soto a l'é partì da Cuba con soa armada ëd 570 òm e 223 cavaj.

Rivà a Tampa Bay, a son ëscontrasse con ij nativ e a l'é ancaminà na guèra con vàire tribù indian-e ch'a l'ha durà tre agn e mes e che a la fin a l'ha mnà a la dëstrussion ëd bon-a part ëd l'armada spagneula. An sërca d'òr, la spedission a l'ha traversà vàire ëd coj che al di d'ancheuj a son jë Stat Unì: Geòrgia, Carolin-a dël Sud, Alabama, Arkansas, Missouri. Dla prima 1541 a l'han dëscoatà ël fium Mississippi.

De Soto a meuir ai 21 ëd maj dël 1542. Ij sò òm a lo sotro, ma peui, për nen che ij nativ a peulo pijé sò còrp, a lo campo ant ël Mississippi.
Ël neuv cap ëd la spedission a l'avìa nen lë spìrit ëd de Soto e l'armada a l'ha tòst decidù ëd bandoné l'arserca ëd tesòr e ëd torné andré.