Basilique dé Saint Mar
Ch't' articl'ye fut c'menchie en Jèrriais
|
La Basilique dé Saint Mar est eune basilique tch'est eune cathédrale à V'nise. La Basilique est iun des mèrs d'la ville, bordant la Pièche dé Saint Mar et jouaingnant l'Palais des Doges.
Au 9e siècl'ye des conmèrchants dé V'nise atchéthîtent les r'liques dé Saint Mar en Alexandrie. Eune chapelle fut bâtie pouor ches r'liques en 828 dans l'Palais des Doges. Eune églyise sus l'empliaichement d'achteu d'la basilique fut bâtie en 832. Ch't' églyise fut brûlée en 976, èrbâtie en 978 et acouo eune fais en 1063. Chutte basilique fut consâcrée en 1094 et ch'est chein qu'nou vait au jour d'aniet ouaithe qu'ou fûsse dêcothée avaû les siècl'yes. L'architectuthe est Byzantinne et Gothique.
Des trésors et matéthiaux fûtent apportés à seule fîn d'embelli l'bâtisse. Quand la Quatrième Crouaîsade otchupit Constantinopl'ye en 1204, les Quat' Chévaux fûtent env'yés à V'nise et en 1254 montés sus la côtchiéthe d'la basilique. Napoléon les fit haler en 1797 mais i' fîtent èrpliaichis en 1815. Les Quat' Chévaux sus la côtchiéthe achteu sont des copies modèrnes – l's originnaux ont 'té prêsèrvés dans un musée d'pis l's années 1990.
