Komputer

Komputer no sambua mesin elektronik si tola manema, mangirö'ö ba mangohalöŵögöigö gofu hadia ia nifotöi data nibe'e khönia bakha tobali sambua informasi. Halöŵö simane da'a lafotöi ia mangerai (li Inggris: compute), börö me lala komputer ba wanema ba ba wangirö'ö ngawalö data ya'ia ba wangerai 0 ba 1 (nifotöi fangerai binary). Duma-dumania i'erai ba i'irö'ö komputer numero 1 faoma 00110001, hurufo N faoma 01001110, hurufo I faoma 01001001, btn. Andrö wa latötöi komputer mesin wangerai (li Inggris: computer, li Jerman: Rechner)

Börö me tenga niha da'a, ha sambua mesin elektronik sangerai 0 ba 1, moguna labe'e khönia wanuturu (li Indonesia: instruksi), ena'ö tola itema, i'irö'ö ba i'ohalöŵögöi gofu hadia ia data nibe'e khönia andrö.

Famazökhi instruksi andrö lafotöi ia pemrograman ba li Indonesia ma zui coding ma programming ba li Inggris. Tenga faoma fehede lafa'ema ngawalö instruksi andrö niha (simane na taŵaö ba ndraono we'amöi wowöli adulo ba fasa), bahiza la'oguna'ö sambua program, heza tola tasura ngawalö instruksi andrö. Oya program si tola la'oguna'ö ba wanura instruksi komputer andre, ba gotaluania program Python (faigi gambara andre tou).

Instruksi wangerai nisura bakha ba wakake sombuyu sotöi Python

Fakake sombuyu komputer

Fefu program ni'oguna'ö komputer lafotöi göi ia fakake sombuyu (li Inggris: software, li Indonesia: perangkat lunak) börö me fakake sa ia, bahiza tebai tawawaya ma tagogohe ia faoma tangada. Ena'ö tola tefalua instruksi nifa'anö faoma fakake sombuyu andre moguna göi fakake sabe'e (li Inggris: hardware, li Indonesia: perangkat keras) eluahania fakake si tola tawawaya ba ta'ohe faoma tangada. Fakake sabe'e andre zi to'ölönia laŵa'ö niha komputer, simane komputer laptop ma zui desktop, heŵa'ae sindruhunia fao ba komputer göi wakake sombuyu.

Fakake sabe'e komputer

Bakha ba wakake sabe'e andre no mufasa fefu ngawalö lala-lala ba wanema, wangirö'ö ba ba wangohalöŵögöigö data nibe'e bakha (faigi gambara). Lala-lala andrö oroma fakhili ia ba lala sebua awö dandra-tandra lalu lintas si so khönia. I'ohe ita ba zi sambua nahia sara lala, ba ba lala andrö so ngawalö dandra sanuturu heza tola tadölö ita, heza tahole'ö ita na möi ita ba zi sambua nahia, heza tola tebato ita ba wame'e tou gama-gama ba heza göi tebai tebato ita, btn. Fefu da'a tenga nilau dödö ero zamösana bahiza no muhonogöi molo'ö goi-goi. Simanö göi bakha ba komputer so goi-goi silötolalö'ö mutörö. Lafa'oli ia molo'ö lala si faudu ba satulö, andrö göi latötöi ia logis, eluahania molo'ö lala si faudu ba atulö.

Ngawalö *lala-lala* bakha ba komputer soroma hulö lala faoma tandra *lalu lintas*

Baero wangerai andre, moguna göi khö niha wamaigi hadia nibe'e bakha, eluahania i'oroma'ö data ni'ohalöŵögöigönia komputer yaŵa ba zandrela sambua fakake nifotöi display ma zui monitor. Sangowuloi ba samasao fefu data andrö yaŵa ba monitor lafotöi kartu grafis. Ba oya nasa ngawalö fakake bö'ö si tola mufasa, simane lala ba woraka data ba garate mangoguna'ö printer.

Ngawalö komputer

Oya sibai te'oguna'ö komputer, moroi ba kalkulator, tandraluo, fanu'a wa'amo'idanö ba laza, irugi telefon sonekhe nifotöi smartphone ba irugi komputer laptop, desktop ba komputer super (faigi tou galeri gambara ba gahe zura andre)

Komputer soya la'alui niha iada'a ya'ia tandraluo sonekhe (li Inggris: smartwatch), sambua komputer nifasa ba mbagi mbölökha. Meföna so dandraluo digital si so bakha komputer khönia simane tandraluo digital merek Seiko, bahiza mo'amböta sibai zi tola ifalua halöŵö moroi ba dandraluo sonekhe si so khöda iada'a.

Komputer fondrege muzawili ba gulidanö andre ya'ia komputer telefon sonekhe (li Inggris: smartphone), ni'oguna'ö ato niha khöda ba we'amöi manörö ba Internet. Lafotöi ia sonekhe, me oya ngawalö halöŵö si tola i'ohalöŵögöi: fahuhuo ba telefon, manura ba mamokai sagörö email, mamoli sinunö ma zui mamofanö video simane YouTube, manörö ba Internet mangoguna'ö fuka gu'ö Chrome, fariawö ba media fariawösa simane Facebook, WhatsApp, Instagram, TikTok, btn. Ato niha sangoguna'ö telefon sonekhe andre tobali fangali komputer hagita Laptop, me tola lafa'anö zura sanau khönia hulö simane ba komputer hagita, na no lafakhai khönia sara wafa wanura (li Indonesia: papan ketik) ba sambua ni'ote'u (li Indonesia: tetikus).

Ibörötaigö göi ato niha ba Danö Niha sangoguna'ö komputer hagita Laptop ma zui komputer notebook. Laptop no sambua ngawalö komputer side-ide ba anifi-nifi, irege oroma ia hulö sambua mbuku wanura (li Inggris: notebook) ba tola tefedadao ia ba hagita (li Inggris: laptop moroi ba wehede lap eluahania hagita ba top eluahania tete) ba wangoguna'ö ya'ia.

Bahiza sasese laŵaö niha komputer ya'ia Desktop. Lö ebua sibai komputer desktop, irege tola tefedadao ia ba dete meza (li Inggris: desktop moroi ba wehede desk eluahania meza ba top eluahania tete).

Ba mböröta me awena tefazökhi komputer, egebua sibai ia, tola ifönui sambua wuröma sebua. So nasa komputer segebua simane ni'oguna'ö ba wangoroma'ö fefu ni'ilada ba Internet. Komputer simane da'a asese lafotöi server, eluahania enoni, börö me halöŵönia ha ba wanga'asogö gofu hadia ni'andrö zangandrö nifotöi klien ba Internet. Komputer server simane asese göi lakaoni mainframe.

Baero oi ngawalö komputer andre, so nasa komputer segebua si falawu töra wa'abölönia, irege labe'e töinia komputer super (li Inggris: supercomputer moroi ba wehede super eluahania töra falawu wa'abölö). La'oguna'ö komputer simane ba wamalua halöŵö sifakhai ba wangosili ilmiah.

Personal computer

Börö me komputer desktop ba laptop no ngawalö komputer si tola la'öli ba la'okhögö ero samösa niha, andrö wa lafotöi göi ia personal computer ma la'odogo'ö PC (li Inggris personal eluahania si tefaböbö khö samösa niha).

Oya komputer si tenga PC, duma-dumania komputer perusahaan awö komputer server segebua, samahöna oi fefu ngawalö hadia ia zi so ba Internet.