Claudia Dale Goldin

Claudia Goldin (2019)

Claudia Dale Goldin (* 14. Mai 1946 in New York City) is siet 1990 Perfessersche för Volkswertschapslehre an de Harvard University. Bi dat National Bureau of Economic Research vun de USA weer se van 1989 bit 2017 Direktorin vun dat Development of the American Economy Program un is Ko-Direktorin vun de Arbeitsgrupp Gender in the Economy. 2023 wurr se för hör Utforschen vun geschlechtsspezifischer Ünnerscheeden up den Arbeitsmarkt mit den Alfred-Nobel-Gedächtnispries för Wertschapswetenschapen uttekent.

Leven

Claudia Goldin is in den Stadtbezirk Bronx vun New York City upwussen. Se hett van 1963 bit Juni 1967 an de Cornell University Wertschapswetenschapen studeert un dat Studium mit en Bachelor of Arts mit dat Prädikat Magna cum laude afslooten. Dornah hett se an de University of Chicago wieder studeert un kreeg dor in‘n Juni 1969 hör Master of Arts un 1972 den Doktertitel Ph.D..

All af 1971 weer Goldin as Assistenzperfessersche an de University of Wisconsin–Madison tätig. 1973 gung se in de glieker Positschoon an de Princeton University un weer van 1975 bit 1976 parallel Gastdozentin an de Harvard University. 1979 wurr se außerordentliche Perfessersche an de University of Pennsylvania. Ahn disse Stäe uptogeven, wurr se 1982 Liddmaat vun dat Institute for Advanced Study in Princeton un bleev dor för een Johr. 1985 wurr se an de University of Pennsylvania to en ordentlichen Perfessersche nöömt. Nah fief Johren dor kreeg se en Angebot ut Harvard und wurr dor 1990 de eerste Perfessersche, de tenure in Volkswertschapslehre kreeg.

1991 weer Goldin Viezpräsidentin un 2013 Präsidentin vun de American Economic Association. De Economic History Association stunn se van 1999 bit 2000 as Präsidentin vör. 1992 wurr se in de American Academy of Arts and Sciences wählt, 2006 in de National Academy of Sciences, 2015 in de American Philosophical Society.

Forschung

Goldin erforscht ut wertschapsgeschichtlich Perspektive de Rull vun Fruen in’n Arbeitsmarkt, de Grünnen för Inkommensünnerscheeden un Gender-Pay-Gap, Folgen vun den technologischen Wannel as ok Fragen vun Utbillen un Migratschoon. Se hett sück speziell mit de Geschichte vun de Fruen up den US-Arbeitsmarkt befaat un dorbi Themen as de Vereenbarkeit vun Familie un Berop, den Infloot vun de Antibabypill up de wievlich Beropstätigkeit, de Naamswahl vun verheiraadt Fruen as Sozialindikator un de Utwirkungen vun de Koedukatschoon ünnersöcht. Goldin hett mit de af un to vertreeden Upfaaten uprüümt, dat de wievlich Erwerbstätigkeit eerst mit dat 20. Johrhunnert, mit den wertschaplich Upswung un de Fruenrechtsbewegungen anfungen harr. Völmehr hemm verheiraadt Fruen in Amerika hüüd ähnlich völ as um 1800 in de agrarisch präägt Sellschopp arbeit. Eerst mit de Industrialisierung weer de Andeel vun de erwerbstätigen Fruen sunken un mit de tonehmend Deenstleistungssellschopp nah 1910 denn weer steegen.

Siet 2020 hett hör de Medienkonzern Clarivate to de Favoriten up en Nobelpries (Clarivate Citation Laureates) tellt, mit den se denn 2023 uttekent wurr. För dat „Opdecken vun de wichtigsten Oorsaken för geschlechtsspezifische Ünnerscheeden up den Arbeitsmarkt“ kreeg se den Alfred-Nobel-Gedächtnispries för Wertschaftswetenschapen.

Privates

Goldin leevt mit hör Mann, den US-amerikaanschen Wertschapswetenschapler Lawrence Francis Katz (boren 1959), in Cambridge MA. Mit hüm hett se 2008 dat Book The Race between Education and Technology verfaat.

Utteknungen

Claudia Goldin (2008)

• 1989: Irving Kravis Teaching Award
• 1990: Allan Sharlin Book Award un den Richard Lester Book Award för hör Wark Understanding the Gender Gap
• 1995: Galbraith Teaching Award vun de Universität Harvard
• 2002: Minnesota Award
• 2005: Carolyn Shaw Bell Award
• 2009: Jacob-Mincer-Pries
• 2016: IZA Prize in Labor Economics
• 2018: BBVA Foundation Frontiers of Knowledge Award
• 2020: Nemmers-Pries för Wertschapswetenschapen
• 2020: Ehrendoktertitel vun de Universität Zürich
• 2022: Distinguished Fellow des Center for Economic Studies
• 2023: Nobelpreis för Wertschapswetenschapen

Publikatschonen

• Urban Slavery in the American South, 1820 to 1860: A Quantitative History. University of Chicago Press, Chicago 1976, ISBN 0-226-30104-4.
• Understanding the Gender Gap: An Economic History of American Women. Oxford University Press, New York 1990, ISBN 0-19-505077-0.
• zusammen mit Hugh Rockoff: Strategic Factors in Nineteenth Century American Economic History. University of Chicago Press, Chicago 1992, ISBN 0-226-30112-5.
• zusammen mit Gary Libecap: The Regulated Economy: A Historical Approach to Political Economy. University of Chicago Press, Chicago 1994, ISBN 0-226-30110-9.
• zusammen mit Michael Bordo und Eugene White: The Defining Moment: The Great Depression and the American Economy in the Twentieth Century. University of Chicago Press, Chicago 1998, ISBN 0-226-06589-8.
• mit Edward L. Glaeser: Corruption and Reform: Lessons from America’s History. University of Chicago Press, Chicago 2006, ISBN 0-226-29957-0.
• mit Lawrence F. Katz: The Race between Education and Technology. Belknap, Cambridge 2010, ISBN 978-0-674-03530-0.
• Career and Family: Women’s Century-Long Journey toward Equity. Princeton University Press, Princeton 2021, ISBN 978-0-691-20178-8.

Literatur

• Mark Blaug (Hrsg.): Who’s who in economics. 3. Uplaag, Elgar, Cheltenham [u. a.] 1999, ISBN 1-85898-886-1, S. 436–438

Weblinks

Claudia Dale Goldin. Mehr Biller, Videos oder Audiodateien to’t Thema gifft dat bi Wikimedia Commons.

• Claudia Goldin up de Website vun de Harvard-Universität