Anne Boleyn
Anne Boleyn[1] [[bʊl'ĭn, bʊ-lĭn']], 1. Marquise vun Pembroke (* 1501[2] oder 1507[3], wohrschienlich in Blickling/Norfolk; † 19. Mai 1536 in London) weer de tweete vun de sess Ehfroon vun den engelschen König Hinrich VIII.. Se is ok de Mudder vun de latere engelsche Königin Elisabeth I. ween. Vunwegen dat ehr vörsmeten wurrn is, se harr mit verscheden Mannslüde Ehbruch bedreven, is se vunwegen Ehbruch un Hoochverraat an'n 19. Mai 1536 en Kopp körter maakt wurrn.
Wat se bedüden dö
[ännern | Bornkood ännern]Dat Scheden vun Hinrich un siene eerste Frou Katharina vun Aragón un den König siene Hochtiet mit Anne Boleyn staht an den Anfang vun de Reformatschoon in England. De König harr dat upgeven, vun siene eerste Fro noch en Söhn to kriegen. He möss avers vunwegen de Throonfolg unbedingt en Söhn vun en Ehfro hebben. Anners weer dat mööglich, datt dat mit sien Huus, dat Huus Tudor al wedder ut weer. Johrenlang hett he versöcht, bi den Paavst Verlööf to'n Scheden to kriegen. Man de woll nich. Dor hett sik de König verkeken in Anne Boleyn, wat en vun de Hoffdaams weer. Nun versöch he noch eenmol, sik scheden to laten, man dat weer nich möglich. Man he hett al wat mit Anne harrt un dor is se swanger wurrn. De König wull unbedingt en Throonfolger. Man dat güng bloß, wenn dat nee Kind ehlich weer un Anne siene rechtmatige Fro. Dor hett he up den Paapst nix mehr geven un sik ohn sien Verlööf scheden laten un Anne heiraat. Man he weer heelemol dalslahn, as Anne denn bloß en Deern boren hett. Dat weer de latere Königin Elisabeth I.. As Anne denn noch mol swanger weer, hett se en Fehlgeboort harrt. Dor woll Hinrich nix mehr vun ehr afweten. He harr sik midderwielen in Jane Seymor verkeken, wat ok en vun de Hoffdaams weer. Vunwegen dat dat ok för een König to de dormoligen Tieden ganz unmöglich weer, sik tweemol scheden to laten, ofschoonst de eerste Fro noch leven dö, hett he meent, he möss Anne Boleyn anners losweern. Se is anklaagt wurrn, se harr mit verscheden Mannslüde Ehbruch dreven, dormank mit ehrn egen Broder. De Anklaag weer Unrecht un is bloß dor üm stellt wurrn, dat de König ehr losweern konn. Later hett dat Parlament den König siene Eh mit Anne Boleyn för ungüllig verklaart.
Belege
[ännern | Bornkood ännern]- ↑ De Naam Boleyn warrt in engelsche Schriften ut dat Middelöller ok „Bullen“ schreven. So warrt he ok utspraken. Een vun de Vöröllern weer Geoffrey Bullen. 1459 weer he Lord Mayor vun London un is adelig wurrn. He köff Blicking Hall in Norfolk un Hever Castle in Kent. Anne ehr Vadder Thomas Boleyn hett se arvt. Anne hett sik süms jummer Boleyn schreven. Dat weer siet enige Tiet so begäng un bavenhen pass dat to de franzöösche Utspraak.
- ↑ De Schrievers Alison Weir (The Six Wives of Henry VIII.) un Eric W. Ives (The Life and Death of Anne Boleyn) meent, wohrschienlich weer Anne Boleyn 1501 boren .
- ↑ Kiek ok bi R.M. Warnicke, The Rise and Fall of Anne Boleyn
