Prinċep Philip, Duka ta' Edinburgu
_BAR.svg){kind=small}
Il-Prinċep Philip, Duka ta' Edinburgu (imwieled il-Prinċep Philip tal-Greċja u d-Danimarka, 10 ta' Ġunju 1921 - 9 ta' April 2021) kien membru tal-familja rjali Brittanika bħala r-raġel tar-Reġina Eliżabetta II.
Philip twieled fil-familji rjali tal-Greċja u d-Danimarka. Huwa twieled il-Greċja, iżda l-familja tiegħu ġiet eżiljata mill-pajjiż meta kellu tmintax-il xahar. Wara li rċieva edukazzjoni formali fi Franza, il-Ġermanja, u r-Renju Unit, ingħaqad man-Navata Rjali Brittanika fl-1939, ta’ 18-il sena. Minn Lulju 1939, beda jikkorrispondi mal-Prinċipessa Eliżabetta, li kellha tlettax-il sena, wara li ltaqa’ magħha għall-ewwel darba fl-1934. Matul it-Tieni Gwerra Dinjija, spikka fis-servizz tiegħu fil-Flotot tal-Mediterran u tal-Paċifiku. Wara l-gwerra, Philip ingħata permess mir-Re George VI biex jiżżewweġ lill-Eliżabetta. Qabel it-tħabbira uffiċjali tal-għerusija tagħhom f'Lulju 1947, huwa abbanduna t-titli u l-istili Griegi u Daniżi tiegħu, sar ċittadin Brittaniku naturalizzat, u adotta l-kunjom Mountbatten min-nanniet materni tiegħu. Huwa żżewweġ lill-Eliżabetta fl-20 ta' Novembru 1947. Eżatt qabel it-tieġ, ingħata l-istil l-Altezza Rjali Tiegħu u t-titli ta' Duka ta' Edinburgu, Earl ta' Merioneth, u Baruni ta' Greenwich mir-Re George VI. Philip telaq mis-servizz militari attiv meta Eliżabetta saret reġina fl-1952, wara li kien laħaq il-grad ta' kmandant, u sar prinċep Brittaniku fl-1957.
Philip kellu erbat itfal ma' Eliżabetta: Charles, Prinċep ta' Wales; Anne, Princess Royal; Il-Prinċep Andrew, Duka ta’ York; u l-Prinċep Edward, Earl ta' Wessex. Permezz ta' Ordni Brittanika fil-Kunsill maħruġa fl-1960, id-dixxendenti tal-koppja li ma jkollhomx stili u titli rjali jistgħu jużaw il-kunjom Mountbatten-Windsor, li ntuża wkoll minn xi membri tal-familja rjali li għandhom titoli, bħal Anne, Andrew, u Edward.
Bħala dilettant kbir tal-isport, Philip għen fl-iżvilupp tal-avveniment ekwestri tas-sewqan tal-karozzini. Huwa kien patrun, president, jew membru ta' aktar minn 780 organizzazzjoni, u serva bħala president ta' The Duke of Edinburgh's Award, skema ta' awtotitjib għal żgħażagħ bejn l-14 u l-24 sena.[1] Huwa kien l-iktar konsorti li dam iservi bħala monarka Brittaniku renjanti u l-iktar membru maskili li għex fit-tul fil-familja rjali Brittanika. Huwa rtira mid-dmirijiet rjali tiegħu fit-2 ta' Awwissu 2017, ta’ 96 sena, wara li kien wettaq 22,219-il impenn waħdu mill-1952. Philip miet fid-9 ta' April 2021, fl-età ta' 99 sena, xahrejn qabel għeluq il-100 sena tiegħu.