Kalevala
La Kalevala es un obra de poesia epica de la sentenio 19, colieda par Elias Lönnrot de la tradisiones parlada de Suomi e Carelia, sua mitos e folclor. Lo es la epica nasional de Suomi e Carelia e es un de la plu importante obras de leteratur suomi. La Kalevala ia es sinifiante en la developa de la identia nasional suomi, la intensi de la problem linguistica en Suomi, e la senti cresente de nasionalia cual resulta ultima a la autonomia de Suomi de Rusia en 1917.
La edita prima de la Kalevala, nomida la Kalevala vea, ia es publiceda en 1835. La varia la plu bon reconoseda oji ia es prima publicida en 1849 e es composada de 22,795 strofes, divideda entre 50 runoa, pd naras nativa.
La carateres
[edita | edita la fonte]Väinämöinen
[edita | edita la fonte]Väinämöinen, la carater sentral de la vila nomida Kalevala, es un eroe-xaman con potia majial de canta e musica, simil a lo de Orfeo. El es la fio de Ilmatar e contribui a la crea de tera como lo es aora. Multe de sua viajas sembla la viajas de xamanes, spesial cuando el visita la ventre de la jigante Antero Vipunen, per trova la cantas majial per la fabrica de barcos.
Väinämöinen ia crea e toca la kantele, un strumento de cordetas suomi cual sembla e es tocada como un sitra.
La xerca per un sposa par Väinämöinen es un elemento sentral en multe de la naras, an si el no susede. Un de sua sposas posible, la sore Aino de Joukahainen, afoca se en loca de sposi el. Pos esta, Väinämöinen es la membro xef de la grupo ci fura la Sampo (un molin majial) de la popla de la vila Pohjola.
Ilmarinen
[edita | edita la fonte]Seppo (forjor) Ilmarinen es un fabricor eroin, simil a la germanica Weyland e la elinica Dedalo. El ia crea la cupola de la sielo, la Sampo, e otra aparatas majial de la Kalevala. Ilmarinen es la membro du de la grupo ci fura la Sampo.
Ilmarinen, como Vainamoinen, ave ance multe naras sur sua xerca per un sposa, e a un punto el fabrica un sposa de oro e arjento.
Lemminkäinen
[edita | edita la fonte]Lemminkäinen es un om bela, egos, fretosa, e amada par la femes. El es la fio de Lempi ("desirada" o "favorida"). El ave un relata prosima con sua madre, ci revive el pos cuando el ia afoca en la rio de Tuonela ("la pais de moria") en cuando el xasa la ojeto de sua desiras romantica. Esta parte de la Kalevala sembla la mito de Osiris. Lemminkäinen es la membro tre de la grupo cual fura la Sampo de Pohjola.
Ukko
[edita | edita la fonte]Ukko ("om vea") es la dio de sielo e tona, e la dio major notada en la Kalevala. El sembla Tor e Zeus. Sua nom es posible relatada a la parola magiar estinguida per un om vea (agg)
Joukahainen
[edita | edita la fonte]Joukahainen es un om joven orgulosa ci defia Vainamoinen per compete par poesias, sin susede. Como un intercambia per sua vive, el promete sua sore joven Aino a Väinämöinen. Joukahainen atenta gania venja a Väinämöinen par mata el con un balesta ma sola susede mata la cavalo de Väinämöinen. La atas de Joukahainen resulta en Väinämöinen promete fabrica la Sampo per paia per sua salva par Louhi.
Louhi
[edita | edita la fonte]Louhi, la dama de la norde, es la matriarca xaman de la popla de Pohjola, un popla competente con Kalevala e sua popla.
Louhi a un ves salva Vainamoinen. El ave multe fias ci la eroes de Kalevala atenta, sin susede, sedui. Louhi ave un rol major en la batalia per preveni la eroes de fura la Sampo, cual resulta en la destrui de lo. El es un sorsor potiosa con un capasia cuasi egal a lo de Vainamoinen.
Kullervo
[edita | edita la fonte]Kullervo es un fio de Kalervo ci es mental desecuilibrida, venjosa e trajedial. El ia es maltratada cuando el ia es un enfante, e ia es vendeda como un sclavo a Ilmarinen. El debe labora e es maltratada par la sposa de Ilmarinen, ci el mata plu tarda. Kullervo es un joven turbada e comun deveni furiosa. En la fini, el suiside.
Marjatta
[edita | edita la fonte]Marjatta es un virjin joven de Kalevala. El deveni ensinta de come un baca de la visinia de la montania. Cuando el comensa pari, el es espulsa de la casa de sua jenitores e el comensa xerca per un sauna en cual el pote pari. El es refusada de alga locas, ma ultima trova un loca en la foresta e pari un fio. La natur de Marjatta, e sua ensinti e xerca per un loca per pari es clar un alegoria a la Maria (madre de Jesus) e la cristiani de Suomi. La fio es condenada a mori par Väinämöinen per nase estra un familia sposida. La fio reproxa Väinämöinen, e es plu tarda coronida como Re de Carelia. Esta fa ce Väinämöinen deveni coler, e el parti de Kalevala pos legi sua cantas e kantele a la popla de de Kalevala.
Un resoma de la Kalevala
[edita | edita la fonte]La sicle prima de Väinämöinen
[edita | edita la fonte]Cantas 1 e 2: La poesia comensa con un introdui par la cantores. La Tera es creada de la fratos de un ovo de la avia nomida "oio de oro" (un pato peti), e la om prima (Väinämöinen) es naseda de la diva Ilmatar. Väinämöinen introdui la arbores e otra viventes a la mundo steril.
Cantas 3 a 5: Väinämöinen encontra Joukahainen ci es jelosa de el, e los ave un combate de poesia. Joukahainen es vinseda e el promete ce, si el es permeteda sua vive, sua sore Aino ta sposi el. Pronto, Aino afoca se en la mar.
Cantas 6 a 10: Väinämöinen vade a Pohjola per proposa a la virjin de la norde. Joukahainen ataca Väinämöinen denova. Väinämöinen flota per dias en la mar asta el es portada par un agila a Pohjola. El fa un acorda con Louhi per demanda ce Ilmarinen crea la Sampo, un molin de majia forte. Ilmarinen refusa vade a Pohjola, donce Väinämöinen forsa el contra sua vole. La Sampo es fabricada, ma Ilmarinen reveni sin un sposa.
La sicle prima de Lemminkäinen
[edita | edita la fonte]Cantas 11 a 15: Lemminkäinen comensa sua viaja a Saari (un isola) per trova un sposa. El e la virjin Kyllikki ("abunda") promete se a lunlotra, ma car la fema pensa ce Lemminkäinen ia nega sua promete, la fema nega la sua. Alora, Lemminkäinen parte de el e recomensa sua viaja per cortea la virjin de la norde. Sua madre atenta razona con el e para el, ma Lemminkäinen iniora sua averti, e alega ce, cuando el es menasada, sua brosa comensa sangui. Pos un viaja longa a la norde, el demanda de Louhi per sua fia, e Louhi encarga el con alga taxes. En xasante per la Tuonelan joutsen ("la sinie de la Pais de Moria"), Lemminkäinen es matada par la Pohjolan paimen ("un pastor de la Norde)", ci es iritada par sua mal condui e desrespeta, e el cade en la rio de moria. A acel momento, sua madre recorda la parolas de sua fio e vade per xerca el. Con un rasto donada a el par Ilmarinen, el colie de pesos de Lemminkäinen sperdeda en la rio e reconstrui el, e un abea trae a el la ingredientes nesesada per revive Lemminkäinen.
La sicle du de Väinämöinen
[edita | edita la fonte]Cantas 16 a 18: Väinämöinen construi un barco per viaja a Pohjola de nova per trova un sposa. El visita Tuonela ("pais de moria") e es prisonida ala. Väinämöinen usa sua potias majial per fuji, e averti sua popla de la periles en Tuonela. Väinämöinen viaja alora per colie la encantas nesesada de Antero Vipunen, un jigante suteran. Väinämöinen es engolida e debe tortura Anteto Vipunen per la encantas e sua fuji. Cuando el completa sua barco, Väinämöinen comensa naviga a Pohjola. Ilmarinen aprende esta e intende vada a Pohjola ance per cortea la virjin. La fema eleje Ilmarinen per sua sposo.
La sposi de Ilmarinen
[edita | edita la fonte]Cantas 19 a 25: Ilmarinen es cargada con taxes perilosa e nonrazonante per gania la cor de la virjin de la norde. El completa esta taxes con alga aida de la fema se mesma. En preparante per la sposi, bir per la rituo es preparada, un bove jigante es matada e invitas es enviada. Lemminkäinen no es invitada. La rituo comensa e tota es felis. Väinämöinen canta e loda la popla de Pohjola. La sposa e sposo es preparada per sua roles. La duple ariva a casa e es bonvenida con bevidas e comedas.
La sicle du de Lemminkäinen
[edita | edita la fonte]Cantas 26 a 30: Lemminkäinen es ofendeda per no ia es invitada a la sposi e comensa pronto vade a Pohjola. Cuando el ariva, el es defiada e gania un duel con Sariola, la mestre de la norde. Un armada es majial clamada per venja contra Lemminkäinen e el fuji a sua madre. Sua madre avisa ce el vade a la Isola de Venja. Cuando el reveni, el descovre ce sua casa es ardeda. El vade a Pohjola con sua camerada Tiera per ateni sua venja, ma Louhi jela la mare e Lemminkäinen debe reveni a sua vila. Cuando el ariva, el es reunida con sua madre e promete construi casas plu bon e grande per responde los cual es ardeda.
La sicle de Kullervo
[edita | edita la fonte]Cantas 31 a 36: Untamo mata la popla de sua frate Kalervo, estra la sposa de Kalervo ci plu tarda conseti Kullervo. Untamo vide la fio como un menasa, e pos atenta causa sua mata alga veses sin susede, vende Kullervo como un sclavo a Ilmarinen. La sposa de Ilmarinen tortura Kullervo e donce Kullervo truci el e el es laserada a pesos par un manada de lupos e ursos. Kullervo fuji de la casa de Ilmarinen e oia de un dama vea en la foresta ce sua familia es ancora vivente, e el es pronto reunida con los. En reveni a sua casa de paia impostas, el encontra e sedui un virjin, cuando el descovre ce el es sua sore. El mata se mesma e Kullervo reveni a sua vila angusante. El deside venja contra Untamo e vade per trova el. Kullervo gera contra Untamo e sua popla, ruina tota, e reveni a sua vila, do el trova ce sua cultiveria es abandonada. Plen de regrete, el mata se mesma en la loca do el ia sedui sua sore.
La sicle du de Ilmarinen
[edita | edita la fonte]Cantas 37 a 38: Lamentante per sua ama perdeda, Ilmarinen fabrica un sposa de oro e arjento, ma trova ce el es tro fria e desprende el. El vade a Pohjola e saisi la fia la plu joven de Louhi. El es colerida e insulta Ilmarinen tan forte ce el canta majia e cambia el a un avia. El reveni a Kalevala e reporta a Väinämöinen de la ricias de la popla de Pohjola, resetada de la Sampo.
La saca de la Sampo (o la sicle tre de Väinämöinen)
[edita | edita la fonte]Cantas 39 a 44: Väinämöinen, Ilmarien, e Lemminkäinen naviga a Pohjola per recovre la Sampo. En sua viaja, los mata un lusio enorme e de sua mandibula fabrica la kantele (un sitra suomi). La eroes ariva en Pohjola e comanda un parte de la ricia de la Sampo o los ta prende la Sampo intera par forsa. Louhi leva sua armada, ma Väinämöinen calmi tota a dormi con sua musica. La Sampo es prendeda de sua sala securida par rocas e la eroes comensa vade a sua vila. Louhi crea un armada grande par majia, cambia se a un agila, e luta per la Sampo. En la batalia, la Sampo es perdeda en la mar e destruida.
La venja de Louhi a Kalevala
[edita | edita la fonte]Cantas 45 a 49: Colerida par la perde de la Sampo, Louhi envia maladias e un urso grande a Kalevala per mata sua boves. El oscuri la sol e la luna e furi tota focos de Kalevala. Väinämöinen sani tota de la maladias e, con Ilmarinen, restora la focos. Väinämöinen forsa Louhi per redona la sol e la luna a la sielo.
La sicle de Marjatta
[edita | edita la fonte]Canta 50: La virjin timida Marjatta deveni ensinta par un baca de la vasinia de montania ce el ia come cuando ia gida sua oveas. El pari un fio. Väinämöinen comanda ce la fio es matada, ma la fio comensa parla e reproxa Väinämöinen per sua mal judi. La enfante es alora batizada como Re de Carelia. Väinämöinen naviga sua barco a via, abandonante sola sua cantas e kantele como sua lega.
La poesia fini e la cantores canta un adio e grasia sua escutores.