Challenger (Raumfär)

D'*Challenger* wärend der STS-7-Missioun, Juni 1983

De Space Shuttle Challenger (englesch fir Erausfuerderer) war déi drëtt Raumfär vun der NASA nom weltraumonbrauchbare Prototyp Enterprise an der éischter voll fluchbrauchbarer Columbia. Hire Bau war am Oktober 1982 fäerdeg, hiren éischte Fluch war am Abrëll 1983 mat der STS-6-Missioun. Déi intern Bezeechnung war OV-099.

D'Challenger gouf nom brittesche Fuerschungsschëff HMS Challenger genannt, dat vun 1872 bis 1876 d'Weltmierer befuer huet. D'Moundlandefär vun Apollo 17 hat och schonn deen Numm.

De Fabrikant vun de Space Shuttlen, Rockwell International (an der Tëschenzäit en Deel vu Boeing), hat am Februar 1972 den Optrag fir de Bau vun ufanks zwéin Orbiter, d'Enterprise an d'Challenger, kritt, déi net fir den Asaz am Raum geduecht waren. Ufanks als Test-Orbiter fir de Shuttle-Programm gebaut, gouf d'Challenger nodeem se fäerdeg war am Mee 1977 fir d'éischt bal e Joer laang als STA-099 – STA steet fir Structural Test Article – fir Schwéngungstester gebraucht. Vun 1979 goufen dunn nodréiglech mat hir amplaz vun der Enterprise (OV-101), dem éischte Structural Test Article, Ofworf- a Landetester gemaach, a se gouf als vollwäerteg a raumfluchfäheg Raumfär mat der Bezeechnung OV-99 ausgebaut.

D'Challenger hat néng vollstänneg Flich mat am Ganzen 987 Äerdëmkreesungen absolvéiert. Si war 69 Deeg am Weltraum.

Den 28. Januar 1986, 73 Sekonnen nom Start vun der Missioun STS-51-L, war d'Raumfär an enger Héicht vu ronn 15 Kilometer auseneegebrach (kuckt Challenger-Katastroph). Dobäi waren all siwen Astronaute gestuerwen. Als Grond gouf d'Versoe vun engem oder méi Dichtungsréng an enger vun de säitleche Feststoffrakéiten ermëttelt. Et war dat bis dohi schwéierst Accident an der Raumfaartgeschicht vun den USA.

D'Wrackdeeler vun der Challenger leien an engem fréiere Rakéitesilo am Startkomplex 31 vun der Cape Canaveral Air Force Station.

Missiounen

Nr.	Start	Bezeechnung	Crew
1	4. Abrëll 1983	STS-6	Paul Weitz, Karol Bobko, Donald Peterson, Story Musgrave
2	18. Juni 1983	STS-7	Robert Crippen, Frederick Hauck, John Fabian, Sally Ride, Norman Thagard
3	30. August 1983	STS-8	Richard Truly, Daniel Brandenstein, Dale Gardner, Guion Bluford, William Thornton
4	3. Februar 1984	STS-41-B	Vance Brand, Robert Gibson, Bruce McCandless, Ronald McNair, Robert Stewart
5	6. Abrëll 1984	STS-41-C	Robert Crippen, Francis Scobee, Terry Hart, James van Hoften, George Nelson
6	5. Oktober 1984	STS-41-G	Robert Crippen, Jon McBride, Kathryn Sullivan, Sally Ride, David Leestma, Marc Garneau, Paul Scully-Power
7	29. Abrëll 1985	STS-51-B	Robert Overmyer, Frederick Gregory, Don Lind, Norman Thagard, William Thornton, Lodewijk van den Berg, Taylor Wang
8	29. Juli 1985	STS-51-F	Gordon Fullerton, Roy Bridges, Story Musgrave, Anthony England, Karl Henize, Loren Acton, John-David Bartoe
9	30. Oktober 1985	STS-61-A	Henry Hartsfield, Steven Nagel, James Buchli, Guion Bluford, Bonnie Dunbar, Reinhard Furrer, Ernst Messerschmid, Wubbo Ockels
10	28. Januar 1986	STS-51-L	Francis Scobee, Michael Smith, Judith Resnik, Ellison Onizuka, Ronald McNair, Gregory Jarvis, Christa McAuliffe