Léi guasu

Tetãvorekuéra Joaju léi guasu ha'e léi guasu tujavéva tetãvorekuéra ombojoajúva ojeipurúva gueteri ko ára peve, ijypýpe oguereko mokõi vorekue ha'éva: tetã ñesãmbyhy ñemohenda ha tekoiterape ñemombe'u.

Léi guasu ha'e tetã (térã tetãvore) kuatia tee ohekome'ẽva ha omombe'úva mba'éichapa omba'apo va'erã tetã sãmbyhyha. Omombe'u mba'éichapa ojeporavo va'erã tetã ruvichakuéra ha mboy árapa opyta hag̃ua omba'apóvo hetãme guarã, mba'éichapa ojejapo va'erã léi ha tembiapoukapy pyahu ha oñemoambue térã oñemboguete va'erã léi oĩmava. Ko kuatiápe jepivénte oĩ avei mávapa ikatu ovota ha mba'épa umi tekoiterape.

Léi guasu rupive avei ojeikuaa va'erã mba'épa tetã ñesãmbyhy rembiapo ha moõitépa ohupyty ipu'aka, omoheñóivo umi tetã remimoĩmbyre ha'éva Tetã Ruvicha, Tetã Amandaje ha Tetã Tekojoja Ruvicha. Oĩrõ tetã ndoguatáiva iléi guasúre térã iléi guasu kangyite ha nohekome'ẽ porãi, ikatu ja'e oisãmbyhyha hatãme térã mbaretépe, oiméne oñemomba'e hese kapaju rekuái térã oisãmbyhýva peteĩme.

Léi guasu rupive ikatu oiko peteĩ joaty, ha'éva tetãvorekuéra oñembojoajúvo peteĩ tetãme. Oĩ léi guasu opaichagua, umi ipukuitéva omombe'upáva tetã ñesãmbyhy ha tekoiterape rehegua, Índia, Paraguái ha Brasil mba'éva techapyrã, umi mbykymíva omohendávante tetã reko, Tetãvorekuéra Joaju mba'éva techapyrã, umi ndaipóriva peteĩ kuatiápe añónte, Tavetã Joaju mba'éva techapyrã, umi léi guasu ikuave'ẽmbýreva, oikóva oĩrõ mburuvichavete ome'ẽva léi guasu tetãyguakuérape, ha ambuéva.

Ehecha avei

• Paraguái léi guasu