Joaquín Sorolla

Joaquín Sorolla

Biografía
Nacemento	(es) Joaquín Sorolla y Bastida 27 de febreiro de 1863 Valencia, España
Morte	10 de agosto de 1923 (60 anos) Madrid, España
Lugar de sepultura	Cemiterio Xeral de Valencia
Vogal da Xunta para Ampliación de Estudos e Investigacións científicas
1907 –
Datos persoais
Outros nomes	Sorolla, Joaquin
Educación	Reial Acadèmia de Belles Arts de Sant Carles
Actividade
Campo de traballo	Pintura
Lugar de traballo	Madrid Roma París Valencia
Ocupación	pintor, profesor universitario
Xénero artístico	Retrato
Movemento	Postimpresionismo, Realismo social, Naturalismo e Impresionismo
Profesores	Francisco Pradilla y Ortiz e Gonzalo Salvá Simbor
Alumnos	Vicente Santaolaria Montoro, Álvaro Alcalá Galiano y Vildósola, Fernando de Amárica e Teodoro Andreu
Influencias	Realismo, Impresionismo, Édouard Manet e Diego Velázquez
Obra
Obras destacables (1898) Triste herdanza (1899) Trata de brancas (1917) Capela da leira de Láchar
Familia
Cónxuxe	Clotilde García del Castillo
Fillos	María Sorolla García, Joaquín Sorolla García, Elena Sorolla García
Premios
(1902)  Gran Cruz da Orde Civil de Afonso XII  Cabaleiro da Lexión de Honra
Descrito pola fonte	Grande Enciclopedia Soviética 1969-1978, (sec:Соролья Хоакин) Obálky knih, Encyclopædia Britannica

Joaquín Sorolla y Bastida, nado en Valencia o 27 de febreiro de 1863 e finado en Cercedilla o 10 de agosto de 1923, foi un artista gráfico e pintor. Sorolla destacou na pintura de retratos, paisaxes e obras monumentais de temática social e histórica. As súas obras máis coñecidas caracterízanse por unha hábil representación da xente, da paisaxe e as augas iluminadas polo sol. A súa obra madura foi etiquetada como impresionista, posimpresionista e luminista.

Traxectoria

Primeiros anos

Cando apenas contaba con dous anos de idade, faleceron os seus pais por mor dunha epidemia de cólera. Ao quedar orfos a súa irmá Eugenia e mais el, a súa tía Isabel, irmá da súa nai, e o seu marido, de profesión cerralleiro, recolléronos. Pasados os anos intentaron ensinarlle, en balde, o oficio da cerrallaría, advertindo pronto que a súa verdadeira vocación era a pintura.

Carreira

Após finalizar os seus estudos na Escola de Belas Artes, Sorolla comezou a enviar as súas obras a diversos concursos e exposicións. A pesar dos primeiros rexeitamentos debido á súa elección temática, pronto gañou recoñecemento, especialmente tras a súa obra Defensa del parque de artillería de Monteleón.

Viaxou a Roma e París, onde foi influenciado polo impresionismo e a pintura nórdica, desenvolvendo o seu característico estilo "luminista". Casou en 1888 con Clotilde García, e establecéronse en Madrid, onde Sorolla acadou prestixio e fama. En 1897, recibiu a encarga por parte do Senado español de rematar o cadro Jura de la Constitución por S.M. la Reina Regente Doña María Cristina, que fora encargado orixinalmente a Francisco Jover Casanova, quen morrera deixando o cadro apenas bosquexado.

A partir de 1900, a súa carreira internacional despegou con exposicións nos Estados Unidos e en Europa. O seu contrato con The Hispanic Society of America en 1911 levouno a un ambicioso proxecto mural, o Visión de España, que durou case oito anos.

Outra importante faceta súa foi a de retratista, de figuras importantes como foron Juan Ramón Jiménez, o rei Afonso XIII, Vicente Blasco Ibáñez, Ortega y Gasset etc. Tamén, en 1914, fora nomeado académico e, cando terminou os traballos para a Hispanic Society, traballou como profesor de composición e cor na Escola de Belas Artes de Madrid. A súa pintura representou a aplicación directa do luminismo á paisaxe e a figura, achegando xa que logo esta tendencia á sociedade da época.

Pasamento

En 1920, mentres pintaba o retrato da señora Pérez de Ayala no xardín da súa casa en Madrid, padeceu un ataque de hemiplexía que minguou drasticamente as súas facultades físicas e mentais. Faleceu na súa casa de Cercedilla o 10 de agosto de 1923.

Obras de Sorolla con temática galega

Galicia. La romería.

Artigo principal: Visión de España.

En agosto de 1915, Sorolla decidiu tomar un descanso, o primeiro en tres anos, do monumental encargo "Visión de España" por parte de Huntington, no que o pintor compuxo obras sobre paixases de España e Portugal. Escolleu como refuxio o Pazo de Vista Alegre en Vilagarcía de Arousa. Durante esa pausa, sumerxiuse nos desafíos que Galiza lle ofrecía, culminando o seu labor na no panel Galicia. La romería. Reflexionando sobre a súa experiencia, Sorolla comentou sobre a complexidade da paleta galega, afirmando que "El color, en Galicia, es una cosa acariciadora, blanda. Creo que Galicia es el país más difícil de pintar, por la variedad, por la facilidad con que todo cambia". Esta interacción coa cambiante natureza galega evidencia o compromiso do artista por capturar a esencia do lugar e o seu constante desexo de evolución e aprendizaxe.

Pinos de Galicia.

En 2015 realizouse na Coruña a exposición Sorolla íntimo. Bosquexos da serie Visión de España, na que se presentaron ao público os esbozos preparatorios para os catorce paneis monumentais sobre as rexións de España e Portugal que Sorolla pintou para a biblioteca da Hispanic Society of América.

Após seren restaurados en Valencia, estes 32 bosquexos estiveron temporalmente no Museo de Belas Artes da Coruña, antes de volver a Nova York. Estas pezas inclúen paisaxes e retratos típicos de Galiza. Dúas destas obras, Gaitero gallego e Tipo de Galicia, foron realizadas durante a estancia do pintor en Vilagarcía, e foi neste período cando Sorolla pintou Galicia. La romería. O Museo de Belas Artes da Coruña, que acolleu a exposición, conta entre os seus fondos con varias obras do artista. Algúns destes cadros, como El Boyero castellano e outros de temática galega, foron incluídos na mostra, que estivo aberta até o 8 de xaneiro de 2017.

Galería de imaxes

• 
  Paseo á beira do mar (1909).
• 
  Nenos á beira do mar. (1903).
• 
  Praia en Valencia (1908).

Véxase tamén

Bibliografía

• IMBROISI, Margaret; MARTINS, Simone. "Joaquín Sorolla" Arquivado 12 de agosto de 2023 en Wayback Machine., 2023. Disponíbel en: https://www.historiadasartes.com / Prazer em conhecer Arquivado 12 de agosto de 2023 en Wayback Machine.. Consultado o 12 de agosto de 2023 (en portugués)
• Turner, Gail (2019). Sorolla: Spanish Master of Light. Londres. Hispanic Research Journal: Iberian and Latin American Studies, 1468-2737, Vol. 20, Nº 5, 2019, páxs. 537-539 (en inglés)

Ligazóns externas

• Museo Sorolla
• Joaquín Sorolla, el pintor de la luz del Mediterráneo (nationalgeographic.com.es, en castelán)
• Sorolla. Arte de la Luz (culturaydeporte.gob.es; en castelán)
• Rembrandt Harmenszoon van Rijn en Twitter sobre "Galicia. La romería" (castelán e galego)
• Sorolla y Galicia - Su estancia en Vilagarcía. Autor: Victor Viana (revistaesmas.com; en castelán)