Canis Minor

Canis minor
Nome latino	Canis minor
Abreviatura	CMi
Xenitivo	Canis Minoris
Simboloxía	O Can pequeno
Ascensión recta	8 h
Declinación	+5°
Área	183 graos cadrados Rango 71°
Número de estrelas (magnitude < 3)	2
Estrela máis brillante	Procyon (α CMi) (magnitude ap. 0.38)
Choiva de meteoros	Canis-Minoridas;
Constelacións lindeiras	Xémini; Monoceros; Hydra; Cáncer;
	Visible en latitudes entre +85° e −75° Mellor visibilidade ás 21:00 (9 p.m.) durante o mes de Marzo

Canis Minor ou Can Menor^[1] é unha das 88 constelacións modernas. A súa figura é moi sinxela: unha liña que une dúas estrelas. Procyon a súa estrela máis brillante forma xunto con Betelgeuse (Orión) e Sirio do (Can Maior) o triángulo de inverno.

Estrelas principais

α Canis Minoris (Procyon), oitava estrela máis brillante do firmamento, a súa distancia ó sistema solar é de aproximadamente 11 anos luz. Ten unha compañeira que é unha anana branca de magnitude 13.
β Canis Minoris (Gomeisa), estrela branco-azulada de magnitude 2,89 cun disco de materia ó redor; é ademais unha variable Gamma Cassiopeiae.
γ Canis Minoris, xigante laranxa de magnitude 4,33 e binaria espectroscópica.
δ Canis Minoris, denominación compartida por tres estrelas diferentes: δ¹ CMi, δ² CMi e δ³ CMi. δ¹ Canis Minoris é unha xigante branco-amarela a 760 anos luz de distancia.
η Canis Minoris, tamén unha xigante branco-amarela.
U Canis Minoris, estrela variable Mira cunha magnitude que varía entre 7,3 e 11,0 nun período de 338 días.
YZ Canis Minoris (Gliese 285), anana vermella que é á súa vez estrela fulgurante e variable BY Draconis; atópase a 19,3 anos luz da Terra.

Mitoloxía

Ó Can Menor Eratóstenes identificábao co can de Orión, catasterizado á vez que o seu amo, posto que sempre estivera en tódalas súas aventuras. Pero, ó igual que o Can Maior, tamén rexistra a variante de que pode se-la cadela Mera, que cos seus laios causados por atopa-los corpos dos seus amos Icario e Erígone, atraeu á xente para que lles deran sepultura. Outra variante é que se trataría do can de Céfalo que tratou de caza-la Raposa de Teumeso.

A estrela máis brillante desta constelación leva o nome de Procyon que significa "antes que o can" en referencia á súa aparición inmediatamente antes cá estrela can (Sirio).

Notas

↑ Cambados Márquez, Xoaquín Evaristo. "Algunhas notas referentes ó nome galego estándar das constelacións" (PDF). Consultado o 12 de outubro de 2016.

Véxase tamén

Outros artigos

Ligazóns externas

The Deep Photographic Guide to the Constellations: Canis Minor (en inglés)
Star Tales – Canis Minor (en inglés)

[1] Cambados Márquez, Xoaquín Evaristo. "Algunhas notas referentes ó nome galego estándar das constelacións" (PDF). Consultado o 12 de outubro de 2016.

[1]