Brijuni uharteen Parke Nazionala
| Brijuni uharteen Parke Nazionala | |
|---|---|
| II. maila: parke nazional | |
 | |
| Mota | uharte multzoa |
| Geografia | |
 | |
| Koordenatuak | 44°55′N 13°46′E / 44.92°N 13.77°E |
| Ur-gorputza | Adriatikoa |
| Leku geografikoa | Istria |
Brijuni uharteen Parke Nazionala (kroazieraz Nacionalni Park Brijuni, italieraz Parco nazionale di Brioni), Kroaziako Parke Nazional bat da, Istriako Brijuni uharteak hartzen dituena.
Geografia
[aldatu | aldatu iturburu kodea]14 uhartek osatzen dute Brijuni uhartedia. Irla handiena Veliki Brijun Island (italieraz Brioni Grande) da eta 5'6 km² ditu. Kostadean dagoen Fažana herritik bi kilometrotara dago. Gainontzeko uharteak askoz txikiagoak dira.
Historia
[aldatu | aldatu iturburu kodea]Brijuni uharteetan erromatar eraikinen aztarna ugari daude. Mendeetan zehar Veneziak agindu zuen bertan eta uharteetako harria erabili zen Veneziako jauregiak egiteko. 1808an Napoleonek Iliriar Probintzietan sartu zuen uhartedia.
Austria-Hungariako Inperioak bere itsas flota Pulan ezarri zuenean Veliki Brijun uhartean gotorlekua eraiki zuen. 1893an gotorlekua utzi zuenean Vienako Paul Kupelwieser magnateak uhartedi osoa erosi eta udarako Resort bihurtu zuen, hotelak, kasinoak, yate kaiak eta jatetxeak edonon eraikiz. Austriako Riviera deitu zitzaionaren parte zen.
Mundu Gerren artean Italiarenak izan ziren Brijuniak eta Bigarren Mundu Gerraren ondoren Jugoslaviarenak. Josip Broz Titok bertan igarotzen zuen uda eta 100 herrialde agintaritik gora izan ziren bertan Tito bisitatzen, bai eta zine izar ugari ere. Indira Gandhik esate baterako bi elefante oparitu zizkion, gaur egun bertako Safari Parkean ikus daitezkeenak. Tito 1980an hil zen eta 1983an eratu zen Parke Nazionala.
Flora eta Fauna
[aldatu | aldatu iturburu kodea]Mediterraneoko flora tipikoa dago. Veliki Brijun uhartean bertakoak diren 600 landare inguru zerrendatu dira. Aipatu behar da Titok oparitan jasotako landare exotiko ugari ere badagoela uharteetan.
Abeltzaintza handia izan da mendeetanzehar eta Istriako barietateak garatu dira idi, ardi, ahuntz eta astoetan. Safari Perkean mundu guztiko animaliak daude. Aipatzekoa da era berean Brijuni uharteetako itsas hondoa ere babesturik dagoela, Adriatikoan aurkitzen zailak diren hainbat espezie bizi baitira bertan, Alcyonium brionense korala eta Ircinia variabilis fistulata belakia kasu.
Azkenik Brijuniko Parke Kretazikoa ere badago eta bertan dinosauroen 200 oinatzetik gora ikus daitezke.
Kanpo estekak
[aldatu | aldatu iturburu kodea]- (Kroazieraz) Webgune ofiziala
- (Ingelesez) Brijuni uharteetako argazkiak