Selam
.jpg)
Islam (hurup Arab Gundul: اسلام; Arab: ٱلْإِسْلَام, penglatinan: al-Islām, [alʔɪsˈlaːm]) atawa Selam (hurup Arab Gundul: اسلام) ada satu agama tauhid Ibrahimiah. Orang nyang percaya aken agama Islam disebutnya Muslim (hurup Arab Gundul: مسلم; Arab: مسلم, latinnya: muslim; atawa dalem basa Betawi juga' bisa dibilang 'orang Selam'). Adapun orang nyang bukan Selam atawa orang minhum, dalem istilah agama Islam, disebutnya kapèr (hurup Arab Gundul: كافر; basa Arab: كافر, penglatinannya: kāfir). 'Islam' sendèwèk asalnya dari basa Arab اسلام (islām) nyang artinya 'nyerah; nyerahin dèwèk ama Allah punya pèngènan'.
Sebagèan besar pengajaran èn iman Islam maktup di dalem Kur'an (kalamullah), ya'entu kitap suci sèntral agama Islam. Selaèn Kur'an, orang Islam juga wajip hukumnya beiman ama kitap-kitap suci Allah punya turunin sebelonnya Kur'an, antara laèn Torat, Jabur, Injil, Suhup Ibrahim, èn Suhup Musa. Orang Islam percaya kalo Kur'an diimla'ken ke Nabi Muhammad ama Malaèkat Jabrail. Kur'an dianggep sebagé kalamullah (Allah punya kata), sementara Nabi Muhammad dianggep sebagé penutup para nabi èn rasululah. Laèn-laèn iman èn aturan orang Islam kudu lakonin bisa beasal deri hadis, bagèn hadis kaga' semua Muslim nerimanya.