Katana

La katana (刀) ye una clas de nihonto (日本刀, nihontō: nihon=Xapón, tō=espada) o espada xaponesa llixeramente curva, d'un solu filu (ello ye tipu sable), conocida davezu como “espada samurái”. Ye un arma sobre too de corte (por utilizar el filu), pero tamién d'estoque (por utilizar la punta). Llévase sometida pel cintu, col cortu p'arriba (p'abaxo si’l portador llucha a caballu). La katana (hailos que trescriben “el” katana) forma xuntamente col wakizashi’l daisho (llit. “grande y pequeña”). En dellos periodos más calmos de la historia xaponesa, la katana tenía más un papel ceremonial que d'arma real.

Anque propiamente ye un tipu perconcretu d'espada, davezu n’Occidente’l términu katana val por estensión pa designar a cualesquier espada xaponesa del tipu que seya (tachi, uchigatana etc.). Non siempre foi la katana’l nihonto por escelencia, pero la so producción yá superó a la de los tachi contra’l periodu Muromachi (dempués de 1392).

Carauterístiques

La katana tien un llargor de fueya de más de 60 cm, anque pue camudar según los periodos y les téuniques de guerra. Polo xeneral remánase con entrambes manes, pero delles téuniques, como la de dos espaes de Miyamoto Musashi, o téuniques qu'impliquen la utilización de la vaina, suponen remanala con una sola mano. El mangu (tsuka) variaba, según el periodu históricu, ente dos y tres manes de llargor. La tsuka remata nuna guardia (tsuba) que protexe la mano. El pesu d'una katana estándar ta ente 800 y 1.300 gramos.

Fabricación

Terminada en chaflán, la fueya la katana fórxase tradicionalmente con un aceru bruto tresformao n’aceru compuesto. Duro pela corteya y más blandio pel megollu. Plieguen un tarucu d'ello mui bien de veces y llueu suelden el conxuntu de plegues na fragua. Entós, poniéndolu al aviesu sobre un llechu fechu con una mestura de magre aislante, y cubriendo bien los bordes, la fueya sométese a una templa selectiva, que va dar al arma les cualidaes combinaes d'estraordinaria durez del cortu y de resistencia de toa ella a los golpes.

El siguiente pasu ye’l pulíu, fechu con ayuda de piedra volcánico de granu, lo qu'afina la fueya al revelar les estructures cristalines.

Partes

Una *tsuba* (guardia) del *Periodu Edo*.

La fueya y el mangu compónense de delles partes caúna col so nome, lo que prueba la importancia que la cultura xaponesa da a la espada:

tsuka: mangu; el so corazu fórmenlu dos tazos de madera de magnoliu;
- kashira, o tsukagashira: decoración nel cabu’l mangu;
- menuki: aguya d'adornu nel mangu que tamién ayuda al agarre; nun ta al mesmu nivel na cara omote que na cara ura;
- mekugi: aguya de bambú que fixa la fueya a la tsuka; la espiga (nakago) de la fueya y la tsuka tán afuracaes, y el mekugi traviésales de llau a llau;
- same kawa: el pelleyu de tiburón o de raya que cubre la madera de la tsuka; esti pelleyu (que contién dél síliz), apegáu per tou o per cada llau del mangu, sirve de manera a la especial rixidez d'esti;
- tsuka ito o tsuka maki: aguyeta especial de seda, algodón, o inclusive cueru, trenzada alredor del mangu pa un meyor agarre y pa sostener los dos tazos que formen la tsuka. Hai diferentes tipos d'aguyeta según l'usu de la katana: combate, guerra, ceremonial...
tsuba: guardia;
seppa: partes metáliques ente la tsuba y la fueya, que guíen a la espiga (nakago) pa inxertase na tsuka;
habaki: pieza de metal na base la fueya, usada pa bloquiar la espada na vaina (saya) pa que nun caiga; pa desenvainar, l'esgrimista prime la guardia (tsuba) col pulgar pa facer salir l'habaki de la saya y poder asina sacar la fueya;
fueya
- nakago: espiga, parte inxertada na tsuka y suxeta con unu o dos mekugiana (furacu que permite’l pasu del mekugi) ;
  - hitoe: revés de la espiga;
  - yasurime: traces de cal sobre la espiga, que varien según la escuela;
  - mei: firma grabada na espiga identificando al ferreru;
- mune machi: eslizamientu nel revés de la fueya, marcando l'entamu del revés de la espiga (hitoe);
- mune: revés (borde non cortante) de la fueya;
- bohi: canal o riegu p'allixerar la fueya;
- yakiba: parte mate de la fueya, formando la llinia de templa (hamon). Presenta diferentes formes: foles, caxes, etc.;
- hasaki: cortu de la fueya;
- shinogiji: parte paralela de los llaterales, en posición vertical cuando la espada se lleva al cintu o ta en guardia;
- bordes: la parte paralela de los llaterales de la fueya (shinogiji) tien dél espesor; la fueya estréchase contra la punta (kissaki) y contra’l cortu (hasaki), el cambéu de la parte paralela a les partes de la punta forma tres bordes que s’alcuentren nun puntu llamáu mitsukado;
  - shinogi: borde llateral de la fueya;
  - yokote: borde que separta la punta (kissaki) del restu la fueya;
  - koshinogi
- mono-uchi: 9 cm del cabu la fueya cuntaos dende’l yokote ; ye con esta parte cola que se solmenen principalmente les cortaes;
- kissaki: punta achaflanada; ta separtada del restu la fueya por un borde, el yokote;
- sashi omote: cuando la espada se lleva al cintu (del llau derechu, cola curvadura p'arriba), esta ye la parte que se presenta direutamente a la vista del públicu (omote), la parte del llau esterior; cuando’l guerreru ta en guardia (kamae), esti ye'l llau izquierdu de la fueya; tamién ye’el llau que se presenta cuando la fueya ta exhibida nun soporte;
- sashi ura: cuando la espada se lleva al cintu, ye la parte non visible (ura) por dar pal cuerpu; cuando’l guerreru ta en guardia (kamae), ye’l llau derechu de la fueya;
saya: vaina; ta fecha en madera de magnoliu que, bien seco, absuerbe’l mugor, torgando la oxidación de les fueyes; ta recubierta de 22 capes de llaca tradicional con un aspeutu llisu o granular, con o ensin incrustes, que tien dos funciones: sellar la funda de la espada ensembre, y endurecer la vaina fecha de feble magnoliu;
- sageo: gordón sobre la vaina.
- shito-dome: bultu na vaina, al nivel del sageo

Presentación

Cuando la katana se presenta nun soporte (katana kake), colócase:

dientro la vaina (saya);
cortu p'arriba;
cara pública (omote) visible;
al agarre de la manzorga.

Davezu espónse solamente asina la "montura" o koshirae de la espada (tsuka, tsuba y saya, manteníes xuntes por una fueya de madera, el tsunagi). N’efeutu la fueya verdadera suel guardase nuna funda de proteición hermética en madera blanco llamada shirasaya (vaina blanca), que nun s’usa en combate.

En tiempos de paz la katana poníase nel soporte cola tsuka a la manzorga, mientres qu'en tiempos de guerra la tsuka poníase a la derecha, col envís de permitir una salida más rápida de la katana en casu de peligru.

Nes artes marciales

Pa entrenase na katana, úsense cinco tipos d'espada d'entrenamientu:

El iaito (居合刀), imitación de metal (aleación d'aluminiu y cinc) non cortante; esta variante de la espada xaponesa ye l'arbía d'entrenamientu preferida polos prauticantes de Iaido (居合道).
El bokken (木剣), sable en madera ríxido; en sí mesmu ye un arma (el célebre samurái Miyamoto Musashi usó nel so famosu duelu contra Kojiro Sasaki un bokken qu'improvisó cortando un remu de la barca que lu llevara al llugar del duelu). Empléguenlu los prauticantes d' Iaido pa combates, y los prauticantes d' Aikido y de Kendo nos kates.
El suburito, sable ríxidu y pesáu de madera, destináu pa entrenar les cortaes al vacíu (suburi) y asina musculase;
El shinai (竹刀), formáu por blingues de bambú suxetaes con una funda de cueru; esta espada permite solmenar golpes reales ensin peligru per aciu de proteiciones corporales, y ye utilizada polos prauticantes de Kendo (剣道).
El shinken, que ye una katana auténtica y afilada; úsase principalmente pa cortar, como nel battodo y nel tameshigiri, contra blancos fechos con tatami o con rolles de cuelmos de paya. Los altos graos (5ᵘ Dan o más) de kenjutsu y de iaido úsenles nos esámenes o en dellos kates.

Nel estilu deportivu deriváu del Kendo, llamáu Sport Chanbara, úsense katanes en materiales sintéticos blandios y flexibles, permitiendo facer los combates más violentos ensin peligru.

Pallabres xaponeses asemeyaes

Kodachi, de cutiu nomáu col términu inventáu de chisakatana o kogatana y etiquetáu equivocadamente de katana.
Ninjato, una espada más curtia que la katana, con un mangu d'igual llargor, pero con abonda menos curvadura qu'aquella. Llámenla "espada ninja". Anque seya más curtia suel llevar una vaina neta a la de la katana en llargor, pa embabucar a los samuráis y estrayela d'esmenu por sorpresa.
Tachi/Nodachi/Odachi, llamaos davezu col términu inventao “daikatana” (en tou caso “daito”), y equivocadamente etiquetaos de katanes.
Wakizashi, la espada curtia que se lleva davezu cola katana formando’l daisho.

Cine

La katana xuega un papel perimportante nel cine, nel xéneru xaponés Chambara por descontao, pero tamién nel cine occidental.

Por exemplu ye un puntu central del filme Kill Bill, y sobre too de la so primer parte, na que destaca la fabricación de la espada de “la novia” por Hattori Hanzo.

Alcuéntrase tamién en Los Inmortales, onde Juan Sánchez Villalobos Ramírez (Sean Connery) y Connor MacLeod (Christopher Lambert) empleguen una mesma katana a lo llargo d'esta película y siguientes de la serie.

Tamién con Christopher Lambert, en Presa de la secta (1995) la historia desarróllase en Xapón, con escenes de combate perguapes, y otres qu'amuesen la forxa de la espada dende’l mesmu tarucu d'aceru, y el so entrenamientu y manexu.

En L’últimu samurái, Tom Cruise apriende a combatir con espada xaponesa, y nun tarda en llevar espectacularmente a la práutica los sos conocimientos.

Nel filme de 2003 Zatoichi, Takeshi Kitano interpreta a un masaxista ciegu, que sorpriende por ser un espertu na espada fatal de bonu.

En Red Sun (1971), película del oeste filmada n’España, con Toshiro Mifune faciendo de guardia samurái d'un embaxador xaponés que va camín de Washington, llama l'atención l'arte de los samuráis y el manexu de la espada metanes un ambiente pistoleru.

Por último na película Star Trek, Sulu usa una katana pa lluchar contra los romulianos.

Bibliografía

Kanzan Sato, The Japanese Sword: A Comprehensive Guide, Ed. Kodansha International, 1983
Leon y Hiroko Kapp, y Yoshindo Yoshihara, The Craft of the Japanese Sword, Ed. Kodansha International, 1987
John M. Yumoto, Samurai Sword: A Handbook, Ed. Tuttle, 1989
Kokan Nagayama, The Connoisseurs Book of Japanese Swords, Ed. Kodansha International, 1998
Kawachi Kunihira y Masao Manabe, The Art of the Japanese Sword - As Taught by the Experts , Ed. Floating World, 2006
Perrin, Noel, “Giving Up the Gun: Japan's Reversion to the Sword, 1543-1879. Boston: David R. Godine 1980. isbn = 780877731849.
Robinson, H. Russell, “Japanese Arms and Armor”, Crown Publishers Inc., 1969
Sinclaire, Clive, “Samurai: The Weapons and Spirit of the Japanese Warrior”

Referencies

Enllaces esternos

Sitiu con mui bien de fotos
La espada xaponesa
Associazione italiana spada giapponese
Faq y galería sobre la katana (enllaz rotu disponible n'Internet Archive; ver l'historial y la última versión).
Nomenclatura
La espada de los samuráis
Historia de la katana
Historia de les espaes xaponeses Archiváu 2012-08-21 en Wayback Machine
Espaes xaponeses
Llista d'espaes xaponeses