Ursidae

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Pa atros usos d'a parola onso se veiga Onso (desambigación).

Ursidae
Onso pardo (Ursus arctos)
Denominacions populars
ursidos, onsos
Rechistro fósil	Dende o mioceno
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Mammalia
Orden:	Carnivora
Suborden:	Caniformia
Familia:	Ursidae
Descripción
Ursidae J. FISCHER DE WALDHEIM, 1817
Distribución cheografica
Distribución d'as especies d'onsos en o mundo.

Ursidae ye una familia de mamiferos placentarios dentro d'a orden Carnivora, en a suborden Caniformia. En as luengas romances o suyo nombre cientifico, Ursidae, que ye en latín, tiende a adaptar-se como ursidos. Se corresponden con os animals que se diz popularment onsos.

Os onsos son animals omnivoros que de regular minchan muitas radices, tuberclos, bayas y fruita, amás de carne. Manimenos a suya dieta pende d'a especie y i hai casos estrimos, como l'onso polar (Ursus maritimus), en os cuals a carne ye parte principal porque habitan en puestos aon que no se troba garra atro tipo d'alimento, u como l'onso panda (Ailuropoda melanoleuca) que basa la suya alimentación en plantas como ye o bambú y no mincha alimentos d'orichen animal (como uegos y insectos) si que mui de cabo ta cuan.

Caracteristicas

Os onsos se caracterizan por a suya capeza de mida gran, orellas chicas, redondas y tiesas, uellos chicos, un cuerpo a-saber-lo pesau y robusto, y coda curta. As patas son curtas, fuertes, con zarpas de cinco didos y unglas firmes y curvas. A suya morfolochía y as mesuras d'o cuerpo les fa tener un caminar pando d'aspecto, que aparenta malas trazas, pero son duenyos d'una gran potencia muscular y pueden adubir velocidaz inesperadas si pretan a correr.

Caminan sobre as plantas d'os piez y palmas d'as zarpas debanteras, de forma que tienen marcha plantigrada. Esta traza de refirmar as patas, que comparten con os sers humans y os Primates, ye bien poco frecuent entre os mamiferos, unica entre os Carnivora, de forma que a sobén a parola «plantigrado» s'emplega como sinonimo d'onso. Entre os sentius, tienen mala vista y oyiu regular, pero l'olfacto se conta de normal entre os millors d'os animals terrestres.

D'hibiernos, bellas especies d'ursidos pueden hibernar. Este ye o caso d'as especies d'o chenero Ursus, anque la suya hibernación no ye completa y no plegan a reducir os parametros vitals dica en o punto que lo fan atros animals hibernadors.

As especies actuals d'onsos fan entre 1 y 2,8 metros de largaria y pesan entre 27 y 780 kilogramos. Os masclos son mas grans que as fembras y pueden luitar entre ellos por l'aparellamiento. As litadas son d'uno, dos u pocas vegadas dica tres cadiellos. As crías viven con su mai entre 1 y 3 anyos, dica que ella torna a quedar prenyada. Por ixa razón, todas as especies d'onsos tienen taxas de natalidat baixas (siguen una estratechia demografica de depredador culminal: pocas crías, alta supervivencia en condicions normals), y son fuertement vulnerables frente a la caza u a cambeos ambientals prefundos.

O pelache ye largo y cerrudo, y de regular d'una sola color; marrón, blanca u negra. Como excepcions, l'onso andino (Tremarctos ornatus) tiene dos tacas de pelo blanco u rubio arredol d'os uellos, l'onso malayo (Helarctos malayanus) tiene un collaret claro en o peito, y l'onso panda (Ailuropoda melanoleuca) ye tot de color blanca pero con a orellas, morro, patas y huembros de color negra, de manera que tiene una apariencia mui caracteristica. Amás, os cadiellos de diferents subespecies d'Ursus arctos gosan tener una taca mas clara arredol d'os huembros que s'esbande a mesura que se fan adultos.

Dentición

Os ursidos tienen una dentición peculiar entre os mamiferos carnivoros. As muelas carnuceras son mas aplanadas que en atras familias de carnivoros, sin tanta cresta, y han reduciu a efectividat inicial pa trinchar carne y s'han tornau millor aprofitables pa masticar materia vechetal. No tienen premolars u son mui reducius, anque esto ya sí que ye mas común entre os carnivoros. Guardan manimenos os dients canins prominents que les sirven pa luitar y pa abatir as presas.

Distribución

As diferents especies d'onsos habitan u han habitau en gran variedat d'habitats en Europa, Asia y America. En Africa i hai poblacions mui chicorronas en as montanyas de l'Atlas, que pertenecen a l'onso pardo (Ursus arctos). En Australia no i hai prebas de que i haiga habitau miembros d'Ursidae nunca.

Taxonomía

Onso andino (Tremarctos ornatus), solo miembro vivo d'o chenero Tremarctos, subfamilia Tremarctinae, y a la vegada sola especie d'onso autoctona de Sudamerica.

• Familia Ursidae
  • Subfamilia Ailuropodinae
  • Chenero Ailuropoda:
    • • Ailuropoda melanoleuca - Panda chigant u mayor.
  • Subfamilia Tremarctinae
    • Chenero Arctodus:
      • Arctodus simus - Onso de morro curto (prehistorico d'America d'o Norte).
    • Chenero Tremarctos:
      • Tremarctos ornatus - Onso d'antiuellos u onso andino.
  • Subfamilia Ursinae

L'onso bezudo (Melursus ursinus), propio d'o sub-continent indio, ye la especie d'onso en a cual se basa o personache de Baloo en a obra o Libro d'a Selva, de Rudyard Kipling.

L'onso panda (Ailuropoda melanoleuca) puestar que sía la especie mas peculiar d'os ursidos.

• • • Chenero Helarctos:
      • Helarctos malayanus - Onso malayo.
    • Chenero Melursus:
      • Melursus ursinus - Onso labiau u bezudo.
    • Chenero Ursus:
      • Ursus arctos - Onsos pardos d'arredol d'o mundo
        • Ursus arctos arctos - Onso pardo europeu
        • Ursus arctos uralensis - Onso griso de Rusia (antis Ursus uralensis) (extincto)
        • Ursus arctos californicus - Onso dorau de California (extincto)
        • Ursus arctos crowtheri - Onso de l'Atlas (extincto)
        • Ursus arctos horribilis - Onso griso americano u Grizzly
        • Ursus arctos beringianus - Onso pardo siberiano
        • Ursus arctos isabellinus - Onso pardo de l'Himalaya
        • Ursus arctos middendorffi - Onso de Kodiak.
        • Ursus arctos nelsoni - Onso negro mexicano (en periglo severo d'extinción)
        • Ursus arctos syriacus - Onso pardo de Siria
        • Ursus arctos yesoensis - Onso pardo de Chapón
      • Ursus americanus - Onso negro americano.
        • Ursus americanus kermodei - Onso pantasma d'a Columbia britanica u onso Kermode.
      • Ursus maritimus - Onso polar
      • Ursus thibetanus - Onso tibetano
      • Ursus deningeri - Onso de Deninger (prehistorico europeu)
      • Ursus spelaeus - Onso d'as espelungas (prehistorico europeu)

Historia evolutiva

A filochenia d'a familia Ursidae ha suscitau siempre gran debate entre os zoologos, con especies cuasi paradigmaticas de clasificación que s'ha feito y defeito y tornau a fer a-saber-las vegadas, como ye o panda (Ailuropoda melanoleuca): en primeras considerau un ursido, plegó a clasificar-se como Procyonidae, una familia de Carnivora a la cual pertenece o mapache (Procyon lotor), pa que l'analís molecular d'ADN a la fin haiga rematau por demostrar que ye efectivament un ursido, en 1989.

En l'actualidat, pareix que ye platero que a familia Ursidae amaneixió en o sud d'o que huei ye Europa fa arredol de 38 millons d'anyos. O suyo primer antipasau conoixiu ye Ursavus elemensis, un mamifero que teneba alto u baixo la mida d'un can domestico, de menos de 50 Kg, que principiaba a tener caracters propios d'os ursidos, como as muelas carnuceras rebaixadas, pero encara teneba atros simplesiomorfismos ancestrals comuns con atros grupos de Carnivora como os canidos.

Cranio d'Ursus deningeri. L'onso de Deninger ye una especie fósil recurrent en muitos chacimientos pleistocenos d'Europa y o suyo rechistro remata cuan principia a trobar-se restas d' Ursus spelaeus, por o cual posiblement sía lo suyo antipasau.

Tamién ye demostrau que o linache filetico de o panda fue o primero en deseparar-se d'a resta, y no como se creyeba enantes; que o linache d'esta especie (subfamilia Ailuropodinae) y o de l'onso andino (subfamilia Tremarctinae) s'esbarrón chuntos pa deseparar-se entre si mas tarde. Esta conclusión mete clarament a la subfamilia Ailuropodinae como primer escisión en a familia, y dimpués se deseprararían os linaches Ursinae y Tremarctinae.

A mas a mas, sabemos dende os primers anyos 2000 que a subfamilia Ursinae, a que mas especies vivas tiene (6 en total), se deseparó en un periodo curto de tiempo en un evento de radiación evolutiva. Encara i hai dubdas razonables sobre as relacions de parentesco evolutivo entre os diferents «onsos negros»: Ursus americanus, U. thibetanus y Helarctos malayanus, pero se presenta claro que l'onso bezudo Melursus ursinus fue o primer ursino en deseparar-se-ne, creyando un linache monofiletico que chustificaría la creyación d'un chenero, Melursus, pa él.

A la suya vegada, se tien indicios que Ursus americanus, l'onso negro americano, y Helarctos malayanus, l'onso malayo, habrían evolucionau como taxons chirmans. Esto fa parte d'a paradoxa que rodeya a l'onso negro americano, pos anque no s'haiga trobau chustificación encara pa separar-lo d'o chenero Ursus, ye prou diferenciau con atros miembros d' Ursus, como l'onso polar (Ursus maritimus) y todas as subespecies d'onso pardo (Ursus arctos), y poco en apariencia d'atros ursinos que no i son, en ixe chenero. Atras evidencias moleculars suchieren que U. americanus y Ursus thibetanus serían especies prosimas entre sí, de traza mas concluyent, lo que induce a pensar en un clúster de tres especies que diverchen a-escape las unas y las atras respective a la linia principal, dando talment o linache d'Helarctos malayanus como primer resultau y contino las atras dos. Si ixo estase asinas, caldría que se tornase a considerar a posibilidat d'habilitar un chenero propio pa l'onso negro americano y l'onso tibetano, d'alcuerdo con os regles d'a cladistica.

Ursus arctos

Onso pardo (Ursus arctos).

A especie Ursus arctos ye la mas amplament distribuida en o planeta, con poblacions que van dende a Peninsula iberica dica lo cabo oriental de Siberia, y en America d'o Norte dende Alaska dica Mexico. Se le conoix vulgarment como «onso pardo» en Europa y como «onso griso» en Nordamerica y Asia. En toda esta inmensidat, U. arctos ye una especie monotipica. L'analís de datos d'ADN mitocondrial ha revelau que existe 6 grupos de poblacions diferenciables en o mundo, posiblement consecuencia d'eventos d'isolamiento succesivo que sufrirían as poblacions d'onso pardo entre o periodo d'as glaciacions pleistocenas. Estes grupos cheneticos son:

• Grupo I: Onsos que habitan en un grupo d'islas en as costas d'Alaska, conoixidas como archipelago Alexander.
• Grupo II: Onsos que habitan entre Europa de l'Este y a costa rusa de l'Estreito de Bering.
• Grupo III: Onsos que habitan en l'este d'Alaska y norte de Canadá.
• Grupo IV: Onsos que habitan en o sud de Canadá y cinco poblacions relictas que queda en Estaus Unius.
• Grupo V: Onsos que habitan en Europa occidental.
• Grupo VI: Onsos que habitaban en as montanyas Atlas en o norte d'Africa, actualment extictas.

Amás, as prebas d'ADN mitocondrial sobre poblacions europeas (grupo V) ha contrimostrau que en cheneral i hai poca variabilidat interna en ellas, mientres que son bel poquet mas diferenciadas entre poblacions. As poblacions mas diversas cheneticament son as d'Escandinavia, a on que sorprende porque se fizo un programa d'exterminio d'esta especie en a primer metat d'o sieglo XX que no deixó vivos si que a 35 onsos, de qui toz en son descendients.

Ursus maritimus

Onsos polars (Ursus maritimus).

De l'onso polar (Ursus maritimus) se creyeba que yera la especie mas choven d'a familia, considerada muito tiempo una descendient directa de bella población americana d'Ursus arctos, d'alcuerdo con l'ADN mitocondrial. Manimenos, un estudio de l'anyo 2012 sobre comparación de marcadors de l'ADN nucleyar contrimostró que yera mas antiga d'o que se pensaba, tot remontando-se la orichen mas probable a fa arredol de 600.000 anyos.

Se veiga tamién

• Caniformia.

Atras familias de carnivoros:

• Felidae.
• Canidae.
• Viverridae.
• Mustelidae.
• Hyaenidae.

Vinclos externos

• Se veigan as imáchens de Commons sobre Ursidae.
• Wikispecies tiene un articlo sobre Ursidae.

• Datos: Q11788
• Multimedia: Ursidae / Q11788
• Especies: Ursidae