S Fränkische Riich

D Usdehnig vom Frankeriich 481 bis 814

S Frankeriich bim Dod vom Pippin 768 und d Eroberige vom Karl em Grosse

S Fränkische Riich, odr s Frankeriich, isch e Königriich in West- und Mitteleuropa zwüschem 5. und 9. Johrhundert gsi, wo sich uf em Gebiet vom Römische Riich bildet het. Es goht uf mehreri westgermanischi Völker us dr Völkerwanderigsziit zrugg.

S Riich vo de Franke isch innerhalb vo drei Johrhundert zur historisch wichtigste Riichsbildig vom obeländische Europa sit dr Antike worde, und noch em Zerfall vom Römische Riich zum Machtzentrum und spöter zur Grossmacht in West- und Mitteleuropa. Es isch vo de Dynastie vo de Merowinger und spöter de Karolinger, wo vo de Arnulfinger und de Pippinide abstamme, regiert und vergrösseret worde. E wichtigi Stützi vo dr spötere Karolingerdynastii isch dr Karl Martell gsi, wo 732 in dr Schlacht bi Tours und Poitiers an dr Loire s Vordringe vo de islamische Maure noch Zentraleuropa verhinderet het. Dr Höhepunkt vo siiner Macht und Usdehnig het s Frankeriich under em Karl em Grosse erreicht. Noch dr spötere Deilig vom Riich isch us siim östlige Deil s Heilige Römische Riich und us em westlige Deil Frankriich worde. S Gränzgebiet zwüsche dene beide Blöck isch in Chliistaate zerfalle, won e Deil drvo as unabhängigi Staate bis ins einezwanzigste Johrhundert überläbt hai.

Fuessnote

Dä Artikel basiert uff ere fräie Übersetzig vum Artikel „Fränkisches_Reich“ vu de dütsche Wikipedia. E Liste vu de Autore un Versione isch do z finde.