Die unwürdige Greisin (1964)

Filmdate
Dütsche Titel	Die unwürdige Greisin
Originaltitel	La vieille dame indigne
Produktionsland	Frankreich
Originalsprooch	Franzeesisch
Erschiinigsjoor	1964
Lengi	94 Minute
Altersfreigoob	FSK 12
Stab
Regie	René Allio
Dräibuech	René Allio
Produktion	S. P. A. C.
Muusig	Jean Ferrat
Kamera	Denys Clerval
Bsetzig
D Sylvie als Madame Bertini D Malka Ribovska als Rosalie Dr Victor Lanoux als Pierre Dr Etienne Bierry als Albert Dr Francois Maistre als Gaston D Pascale de Boysson als Simone Dr Jean-Louis Lemande als Charles D Lena Delanne als Victoire D Jeanne Hardeyn als Rose Dr Robert Bousquet als Robert

Dialäkt: Schwäbisch

Die unwürdige Greisin ischt a franzeesischer Schbiilfilm en Schwarz-Weiß us-em Jôhr 1964 vom Regisseur René Allio, wo au s Drehbuach vrfasst hôt. Des beruaht uff dr gleichnamiga Kurzgschicht vom deitscha Dichter Bertolt Brecht. Dr René Allio hôt d Handlong en d Gegawart ond en sei Hoimetstadt Marseille vrlegt. (S Original schbiilt em Badischa.) S erscht Môl ens Kino komma isch der Film en Deitschland abr erscht viir Jôhr nôch seira Entstehong.

Handlong

Der Film vrzehlt vom zwoida Leaba vo dr Madame Bertini, wo dô ôôfangt, wia ihr Môô s Zeitliche gsegnet hôt. Meh wia sechs Jôhrzehnt lang hôt-se en sellem Vorstadtvirtl vo Marseille a ganz oo-auffelligs Leaba vo-ra Kleibirgerfrau gleabt, hôt sich fir ihrn Môô ond ihre Kendr aufgopfret ond älle oigene Wensch zruckgstellt. Abr nôch-em Dod vo ihrem Môô wacht-se uff ond fangt a ganz nuis oiges Leaba ôô. Dô driber kô ihr ganza Omgeabong, d Nôchbr ond vor ällem ihre nägschde Vrwandte, bloß noh da Kopf schiddla, om ihr Missbilligong zo zeiga. Dia älle erwardet vo sellem alda vrwitweda Miaderle, dass-se jetzt erscht reacht a zruckzooges Dasei vo-ra Witwe fihrt, wo des bissle Geld zammahelt, dass ihre Kender ond deane ihre Familia nôch ihrem Ableaba au noh amôl ebbes vom Erbe hand werdet. Abr grad dees duat dui oowirdiga Greisin et, em Gegadoil; se scheint grad richdich leichtsennich zo werra: Se leischdet sich Taxifahrda ond Reisa, kauft sich scheene Sacha, wo se bisher hôt emmr entbehra miaßa, omgibt sich mit nuie jonge Freind, wo et grad da beschda Ruaf hend, wia zom Beischbiil sella leichtleabiga Kellnere ond dean rebellische Schuahmacher mit seine anarchischdische Ideea. Wia-ra nô au noh des wenige Geld, wo-ra ihr Môô ibrichglau hôt, ausgôht, vrkauft-se a baar Stickla vo ihrem Mobiliar ond vo ihrem Silber ond nemmt a Hibodeek uff. Kurz drnôch stirbt se.

Auszoichnonga

• Grand Prix der Französischen Filmakademie
• Filmbewertungsstelle Wiesbaden: Prädikat Besonders wertvoll
• Monatsbester Film der Evangelischen Filmgilde, Okdobr 1968

Kridik

• S Lexikon des internationalen Films schreibt, der Film wär ganz hervorragend gschdaldet ond hedd a sehenswerda Interprätazioo vo dr Hauptroll.
• Dr Evangelische Film-Beobachter moint, der Film wär a simbadischa Adapzioo vom Brecht seira gleichnamiga Kalendrgschicht mit-ra hervorragenda Milieuschilderong, tolle Kontraschttypa ond vorzigliche Darsteller. Er sei gleichwohl de Heranwachsende ab 14 Jôhr wia au de Erwachsene zo empfehla.

Weblink

Die unwürdige Greisin in dr Internet Movie Database