Rudy Giuliani

Rudy Giuliani
Persoonlike besonderhede
Gebore	28 Mei 1944 New York Stad
Politieke party	Republikeinse Party
Religie	Rooms-Katolieke Kerk
Handtekening

Rudolph William Louis (Rudy) Giuliani (* 28 Mei 1944, New York Stad) is 'n Amerikaanse politikus van die Republikeinse Party.

Giuliani, 'n prokureur van beroep, het van 1970 tot 1977 as 'n amptenaar in die Suidelike distrikshof in New York en die departement van justisie gewerk. Van 1977 tot 1981 was hy 'n prokureur en aanklaer by die Patterson Belknap Webb & Tyler prokureursfirma. Van 1981 tot 1983 werk hy as 'n senior amptenaar by die Ministerie van Justisie. Van 1983 tot 1989 dien hy as distriksprokureur vir die Suidelike distrik New York.

Giuliani was van 1994 tot 2002 die burgemeester van New York. Hy maak 'n diep indruk oor sy vasberade optrede tydens en na die terreuraanvalle op 11 September 2001. Hy het die werk van die munisipale dienste persoonlik gekoördineer en die herstelwerk gelei.

Vroeë loopbaan

In November 1986 het hy as die openbare aanklaer lede van die Nasionale Raad van Mafia skuldig bevind ná 'n lang verhoor (25 Februarie tot 19 November). Die leiers van die families Colombo, Genovese, Luchese en Bananno is van 40 tot 100 jaar gevangenisstraf gevonnis.

In 1998 het Giuliani sy belangstelling in die pos as senator vir die staat New York aangekondig. In Mei 2000 onttrek hy egter sy kandidatuur omdat hy met prostaatkanker gediagnoseer is. Hillary Clinton sou uiteindelik die setel van die relatief onbekende Republikeinse Rick Lazio verower. Giuliani genees intussen van sy prostaatkanker.

Time tydskrif kies hom in 2001 as Persoon van die Jaar en hy ontvang 'n hoë Britse toekenning. Na sy burgemeesterskap het hy in 2002 'n veiligheidskonsultasie met die naam Giuliani Partners LLC gestig, wat hy in die lente van 2008 verkoop het as gevolg van sy kandidatuur as president.

Presidentsverkiesing 2008

Ter voorbereiding op sy kandidatuur vir die 2008-presidentsverkiesing, het hy 'n verkennende komitee namens die Republikeinse Party in November 2006 gestig. Op 5 Februarie 2007 het hy hom as presidentskandidaat geregistreer. Hy was aanvanklik een van die meer belowende kandidate vir die Republikeine volgens die openbare mening. Hy het doelbewus op die agtergrond gebly om sy energie en geld in Florida en verskeie state wat op Super Tuesday aan die beurt sou kom, te spandeer. Sy veldtogstrategie het egter nie die gewenste uitwerking gehad nie, aangesien Giuliani ook in die derde plek in Florida gekom het, ver agter John McCain en Mitt Romney. Op 30 Januarie 2008 het Giuliani besluit om nie vir die presidentskap mee te ding nie en om eerder die kandidatuur van McCain te ondersteun.

Sedert die presidentsverkiesing in 2008 werk Giuliani saam met sy prokureursfirma Bracewell & Giuliani en die konsultantfirma Giuliani Partners.

Trump-regering

Giuliani het in April 2016 hom agter Donald Trump geskaar vir die presidentsverkiesing van die Verenigde State. Na die oorwinning van Trump in November 2016, word Giuliani se naam gesirkuleer as 'n minister-kandidaat. Giuliani wys egter hierdie aanbod van die hand. Hy was egter ondervoorsitter van Trump se oorgangspan.

Op 19 April 2018 het president Trump aangekondig dat Giuliani deel van sy regspan sal wees. Giuliani het byna onmiddellik opspraak verwek deur te beweer in 'n onderhoud met Fox News dat Trump sy vorige prokureur, Michael Cohen, die VS$130 000 terugbetaal het vir die geld wat hy oorgedra het aan die porno-aktrise Stormy Daniels. Dit het die vorige uitlatings van Trump en die Withuis weerspreek.

Na byna twee maande blyk dit dat die rol van Giuliani, die prokureur en voormalige bestuurder is om hoofsaaklik soveel publisiteit en verwarring moontlik te saai. Hy het byvoorbeeld op 'n nuuskonferensie op 7 Mei in Israel oor die kwessie rakende die pornografie-aktrise Stormy Daniels, gesê dat sy "weens haar beroep waarin sy haar liggaam verkoop, wettiglik gesien ongeloofwaardig is. "Sy is 'n swendelaar!"

In Junie 2018 het Giuliani gesê dat 'n sittende president nie aangekla kan word nie, "ek weet nie hoe hy aangekla sal kan word terwyl hy in die amp is nie." "[…] As hy [President Trump] [destydse FBI-direkteur] James Comey geskiet het, sou hy die volgende dag genomineer gewees het vir afsetting. Doen dit en julle kan met hom doen wat julle wil.” Giuliani het ook gesê dat president Trump nie voor die spesiale aanklaer Robert Mueller moet getuig nie, want “...ons geheue bly verander”.

Begin Julie het Giuliani beweer dat Trump voorheen Comey versoek het om die (destydse) nasionale veiligheidsadviseur Michael Flynn te ontsien. 'n Maand later het Giuliani ontken dat hy gesê het: "Wat ek gesê het, is wat Comey sê Trump gesê het." Aan die einde van Julie het Giuliani Trump verdedig deur te verklaar dat 'samespanning' (geheime samewerking) nie 'n misdaad is nie en Trump niks verkeerd gedoen het nie omdat hy self nie in die Demokratiese Nasionale Kommissie (DNC) ingebreek het of "betaal het vir die inbraak in hierdie organisasie nie." Giuliani het later duidelik gemaak dat sy kommentaar 'n uiters beproefde resep vir prokureurs was om die wettigheid van die argumente van die spesiale aanklaer te bevraagteken. Hy het homself ook weerspreek of daar twee vergaderings van Trump-veldtoggenote sou gewees het ter voorbereiding van die vergadering van Donald Trump jr., Jared Kushner, Paul Manafort en ander met 'n Russiese geselskap op 9 Junie 2016 in Trump Tower.

Giuliani het ook die voormalige persoonlike prokureur Michael Cohen van Trump verwys as 'n "ongeloofwaardige leuenaar", twee maande nadat hy dieselfde Cohen 'n "eerlike, regverdige prokureur" genoem het. Giuliani het Trump in Augustus verdedig en gesê: "Die president is 'n eerlike man."

Mid-April 2019, nadat die openbare weergawe van die Mueller-verslag vrygestel is, het Giuliani 'n opskudding veroorsaak met die stelling dat dit toegelaat sou word dat 'n kandidaat-president steun van 'n vyandige buitelandse agentskap aanvaar. Giuliani het volhard hiermee tydens vrae van die CNN-verslaggewer Jake Tapper, wat hy slegs aangevul het met die enigmatiese nuanse dat dit afhang van wie die aanbod kom.

In 2019 het dit geblyk dat Giuliani, as 'n persoonlike regsverteenwoordiger vir president Trump, instrumenteel was om die Oekraïne se nuwe president, Volodymyr Zelenskyj, onder druk te plaas om die gedrag van Trump se politieke teenstander Joe Biden en sy seun Hunter te ondersoek. Hierdie kwessie het die Amerikaanse Huis van Verteenwoordigers laat in die loop van 2019 aangespoor om strafregtelike verrigtinge teen president Trump in te stel weens die misbruik van sy magsposisie. Die Demokrate wou Giuliani as 'n getuie roep tydens die proses van beskuldiging wat op 21 Januarie 2020 in die Senaat begin het, maar dit is deur die Withuis en die Republikeinse meerderheid in die Senaat geblokkeer.

Na die Amerikaanse presidentsverkiesing van 3 November 2020, het president Trump Giuliani opdrag gegee om die span prokureurs te lei om die verkiesingsuitslae in die State waarin Joe Biden as wenner verklaar is, uit te daag in die howe. Gedurende die tyd het hy Covid-19 opgedoen en is hy op 7 Desember in die hospitaal opgeneem.

Op 6 Januarie 2021 was Giuliani een van die sprekers tydens 'n betoging deur Trump-ondersteuners in Washington. Hy het onder andere versoek vir "'n verhoor deur 'n geveg." Kort daarna is die Capitol deur die skare bestorm. Die balievereniging in New York het hierna honderde klagtes teen hom ontvang. Hulle ondersoek nou of hul Giuliani as lid van die rol moet skrap.

Eksterne skakels

• Wikimedia Commons het meer media in die kategorie Rudy Giuliani.

• Hierdie artikel is in sy geheel of gedeeltelik uit die Nederlandse Wikipedia vertaal.