Michael Caine

	Sir Michael Caine
	Caine in 2012 by die Weense Rolprentfees.
Geboortenaam	Maurice Joseph Micklewhite
Geboorte	14 Maart 1933 (91 jaar oud)
Aktiewe jare	1950-tans

Sir Michael Caine, CBE (gebore as Maurice Joseph Micklewhite; 14 Maart 1933) is ’n Britse akteur en skrywer. Hy is bekend vir sy kenmerkende werkersklas-aksent en het in langer as ses dekades in oor die honderd prente verskyn. Hy word beskou as ’n Britse ikoon^[1] en is in 2000 deur koningin Elizabeth II van die Verenigde Koninkryk tot ridder geslaan vir sy bydrae tot die rolprentwese.^[2]

Loopbaan

Michael Caine in die lokprent vir *Zulu* (1964).

Hy het sy deurbraak in die 1960's gemaak in ’n paar geloofde Britse rolprente, soos Zulu (1964), The Ipcress File (1965), Alfie (1966), waarvoor hy ’n Oscar-benoeming gekry het, The Italian Job (1969) en Battle of Britain (1969). Sy grootste prente in die 1970's sluit in Get Carter (1971), The Last Valley, Sleuth (1972), waarvoor hy weer vir ’n Oscar benoem is, The Man Who Would Be King (1975) en A Bridge Too Far (1977). Hy het van sy grootste suksesse in die 1980's behaal in onder meer Educating Rita (1983), waarvoor hy ’n Golden Globe en Bafta vir beste akteur gekry het. In 1986 het hy ’n Oscar vir beste manlike byspleler gekry vir sy spel in Woody Allen se Hannah and Her Sisters.

Caine was in 1992 Ebenezer Scrooge in The Muppet Christmas Carol. Terwyl hy teen dié tyd eintlik uitgetree het, het hy in die laat 1990's ’n terugkeer gemaak; hy het sy tweede Golden Globe gekry vir Little Voice (1998) en sy tweede Oscar vir beste manlike byspeler vir The Cider House Rules (1999). In die 2002-parodie Austin Powers in Goldmember was hy Nigel Powers en in Christopher Nolan se Batman-reeks was hy te sien as Alfred Pennyworth. Hy het in verskeie ander Nolan-prente gespeel, soos The Prestige (2006), Inception (2010) en Interstellar (2014). Caine is die akteur wat die negende meeste geld by die loket laat inrol.^[3]

Caine is een van net twee akteurs wat in elke dekade van die 1960's tot die 2000's vir ’n Oscar vir toneelspel benoem is; die ander een is Jack Nicholson.

Verwysings

↑ "Screening Room Special: Michael Caine" (in Engels). No. 29 Oktober 2007. CNN. 25 Junie 2015. Geargiveer vanaf die oorspronklike op 29 Oktober 2019.
↑ HAT Taal-en-feitegids, Pearson, Desember 2013, ISBN 978-1-77578-243-8
↑ "People Index." Box Office Mojo. Besoek op 6 Desember 2015

[CNN-1] "Screening Room Special: Michael Caine" (in Engels). No. 29 Oktober 2007. CNN. 25 Junie 2015. Geargiveer vanaf die oorspronklike op 29 Oktober 2019.

[HAT_Taal-en-feitegids-2] HAT Taal-en-feitegids, Pearson, Desember 2013, ISBN 978-1-77578-243-8

[3] "People Index." Box Office Mojo. Besoek op 6 Desember 2015

[1]

[2]

[3]