曾憲梓
| 曾憲梓 | |
|---|---|
| 姓名原文 | 曾憲梓 |
| 出生日 | 1934年2月2號  |
| 出生地 | 梅縣 |
| 死亡日 | 2019年9月20號 （85歲） |
| 死亡地 | 梅州 |
| 死因 | 病 |
| 國籍 | 中華民國、中華人民共和國、英屬香港、中華人民共和國 |
| 母校 | 中山大學 |
| 職業 | 企業家、政治人 |
| 仔女 | 曾智雄、曾智明 |
[改維基數據] | |
曾憲梓，GBM（英文：Tsang Hin-chi，1934年2月2號—2019年9月20號[1][2]），係香港企業家，在生嗰陣係金利來集團主席，做過中華人民共和國全國人大常委（香港）[3]，亦係全國工商聯第六屆常委、第七屆副主席、第八屆名譽副主席。
生平
[編輯]曾憲梓響廣東省梅州市梅縣一個農民家庭出世，係曾子74代孫，自幼喪父嘅佢需要靠斬柴嚟幫補家計。憑住佢嘅努力喺1961年升讀廣州中山大學嘅生物系。佢喺1968年時值文化大革命期間偷渡去香港。
曾憲梓十分之愛國，佢一生捐出超過十二億去支持國家嘅發展。佢喺1991年開始替補當選為港區全國人大代表。喺1994年再晉升至全國人大常委。佢喺香港回歸之前曾經獲中央委任為港事顧問、特區預委會委員同埋香港特區籌委會委員，促進香港回歸嘅事宜。佢嘅愛國情懷先後受到國家同埋香港政府嘅肯定。喺1993年，大陸申請將編號3388嘅小行星命名為「曾憲梓星」。
曾憲梓做緊人大常委嗰時成日都有好多比較出位嘅言論，佢曾經喺2004年《廿三條》風波之後批評民主黨嘅司徒華、李柱銘、張文光等人反對嘅香港國家安全法，話佢哋唔愛國，「呢啲泛民主派，死硬泛民主派，其實佢哋唔係搞民主，佢哋美其名叫民主黨」，直言自己絕對唔認同民主黨係愛國者，司徒華反駁「佢自己本人做愛國嘅事，比曾憲梓重要做得多」。
不過，曾憲梓曾經響2010年講過，希望香港喺2020年會實現普選，「我相信到時候，泛民主派要求嘅功能組別問題就會得到解決」，直言普選唔單只係泛民主派嘅要求，重係香港市民同埋佢本人嘅個人心願，「希望自己會有機會見到普選嗰日」（呢番講話喺2005年爭取香港普選大遊行之前，為咗避免觸發更多人上街抗議時講嘅）。
2019年9月20號，曾憲梓喺鄉下廣東梅州病逝，享年85歲[4]。
個人榮譽
[編輯]- 中山大學名譽博士（1993年10月13號）[5]
- 大紫荊勳章（1997年）
- 香港理工大學榮譽社會科學博士（2008年）[6]
- 世界華商基金會世界傑出華人獎[7]
- 「改革先鋒」獎章（2018年，中華人民共和國中央政府，國家改革開放四十年慶典）
參考
[編輯]- ↑ 〈曾宪梓简介〉。原著喺2011-11-02歸檔。喺2011-03-15搵到。
- ↑ 〈金利來創辦人曾憲梓今日離世 享年85歲〉。《橙新聞》。橙新聞。2019-09-20。原著喺2019-09-20歸檔。喺2019-09-20搵到。
- ↑ 〈代表信息〉。全国人大信息中心。
- ↑ 〈前人大常委曾憲梓逝世 享年85歲〉。《頭條日報》。頭條日報。2019-09-20。原著喺2019-09-20歸檔。喺2019-09-20搵到。
- ↑ 〈名誉博士学位批准、授予名单（截至2008年12月）〉 (XLS) (簡體中文)。中華人民共和國教育部。第44項
- ↑ 〈榮譽學位及大學院士名錄 - 香港理工大學〉 (繁體中文)。香港理工大學。
- ↑ 〈歷界世界傑出華人獎得獎者〉 (繁體中文)。世界傑出華人獎。