帛金
帛金[1]係向死者家人慰問嘅一啲錢。如果有白事，出席喪禮嘅親友都會向亡者家屬送上錢嚟代表對先人嘅小小敬意，亦好實際咁幫助一吓在生嘅人。呢筆放喺白信封入面嘅錢稱之為「帛金」。「帛」係絲織品嘅總稱，絲織品喺古時係貴重物品，「財帛」就係泛指金錢。以前嘅人除咗會畀錢做帛金之外，仲會用其它貴重物品嚟表心意，例如金銀珠寶、布料衣匹，或者有價值嘅嘢嚟畀亡者用嚟陪葬或俾家屬安家，而今時今日就已經普遍咁會畀錢。
帛金嘅銀碼
[編輯]親友向亡者家屬送上帛金，除咗對亡者表示敬意之外，其實亦都係減輕亡者家屬喺辦喪事時嘅財政負擔最實際嘅方法。傳統上，畀嘅時候會喺整數嘅銀碼上面加多一個一緡硬幣，主要原因有以下幾個：
- 用單數，意思好明顯，唔好嘅嘢就唔好「成雙」，而「雙」亦都有「傷」嘅意思，十分之唔吉利；
- 銀碼用「零一」作為結尾，含有「只有一次」嘅意思，冇下次；
- 如果親友送上嘅帛金銀碼係整數，當減除咗吉儀入面嘅一元之後，尾數係九，咁就有「長久」嘅隱喻，做白事咁大吉利是邊個都唔想長久，所以要喺整數銀碼度加多一緡嚟做帛金，當有心嘅親友接到吉儀入面嘅一緡之後，就唔會有九字嘅出現，希望親友都大吉大利，長命百歲。