Вы супраць улады? Чакайце Дзяржкантроль!

Беларуская асацыяцыя журналістаў сёлета атрымала папярэджаньне Міністэрства юстыцыі, якое ня здолела аспрэчыць праз суд. Новую кантрольную праверку тут успрымаюць як працяг кампаніі перасьледу, кажа юрыст БАЖ Андрэй Бастунец:

«Зразумела, што калі ў гэтым сьпісе прысутнічае БАЖ і „Народная воля“, то адразу ж узгадваецца і папярэджаньне Мін’юсту на адрас БАЖу і „Народнай волі“. Ну што можна сказаць? Добра, што мы ведаем пра гэты плян, што гэтая праверка будзе, хоць, па вялікім рахунку, мы і так падрыхтаваныя».

Дадатковай увазе з боку кантрольных органаў у рэдакцыі незалежнай газэты «Народная воля» ня дзівяцца: калектыў рэдакцыі пад пільным наглядам падаткоўцаў стала і даўно, кажа намесьніца рэдактара Сьвятлана Калінкіна:

«З падатковай інспэкцыяй мы проста ў абдымку жывём, мы зь ёй не разьвітваемся ніколі. Скажу больш — будуць правяраць ня толькі нашу рэдакцыю, але і гаспадароў будынка, дзе знаходзіцца „Народная воля“. Я думаю, што ўсё гэта робіцца для таго, каб калі і ня знойдзецца „крыміналу“ ці падставаў для штрафаў, то хаця б панэрваваць і рэдакцыі газэт, і супрацоўнікаў, і кіраўніцтва. Як мінімум дзеля гэтага і робяцца праверкі, бо папросту не знайсьці больш ніякіх аргумэнтаў, каб даць эканамічнае апраўданьне ўсяму, што адбываецца».

Сярод грамадзкіх арганізацыяў, уключаных у плян праверкі, — «Цэнтар па правах чалавека», «Дзеці Чарнобыля», «Экадом» і многія іншыя. Іх праверкай Дзяржкантроль увогуле не павінен займацца, заяўляе юрыст праваабарончай арганізацыі «Беларускі Хэльсынскі камітэт» Гары Паганяйла:

«Камітэт дзяржаўнага кантролю паводле сваіх паўнамоцтваў ня мае ніякіх адносінаў да грамадзкіх аб’яднаньняў і незалежных СМІ. Бо мы не дзяржаўныя арганізацыі і не выкарыстоўваем бюджэтныя сродкі. Таму Дзяржкантролю няма чаго рабіць у грамадзянскім сэктары. Гэтая іх скіраванасьць на грамадзкія аб’яднаньні сьведчыць толькі пра палітычную матываванасьць і жаданьне ў пэрыяд пачатку прэзыдэнцкай кампаніі знайсьці формы і сродкі ціску з мэтай нэўтралізаваць іх актыўнасьць у пэрыяд выбарчай кампаніі».

Адзін з заснавальнікаў партыі «Беларуская Хрысьціянская дэмакратыя» Павал Севярынец плян праверак Дзяржкантролю назваў зачысткай:

«Для зачысткі палітычнага, інфармацыйнага і грамадзкага поля перад прэзыдэнцкімі выбарамі рэжым Лукашэнкі ня грэбуе нічым. Тут і падаткоўцы, і міліцыя, і КДБ. Я перакананы, што будуць яшчэ і пажарныя, і эколягі, як зараз у выпадку з царквой „Новае жыцьцё“. Практычна ўсе людзі, якія ёсьць на дзяржаўных службах, будуць мабілізаваныя для зачыстак, фальшаваньня і запалохваньняў. І вельмі шкада, бо гэта сотні тысячаў людзей, якія працуюць на рэжым».

Плянавую праверку Дзяржкантролем грамадзкіх арганізацыяў і незалежных СМІ кіраўнік праваабарончай арганізацыі «Вясна» Алесь Бяляцкі называе плянавай падрыхтоўкай да выбараў:

«Я перакананы, што гэта плянавая падрыхтоўка да выбараў. Яны спрабуюць і газэты, і актыўныя няўрадавыя арганізацыі, якія могуць уплываць на фармаваньне грамадзкай думкі, прымусіць займацца ўласнымі справамі. Бо над кожнай грамадзкай арганізацыяй вісіць пагроза закрыцьця. І таму ўсе гэтыя кантрольныя органы будуць максымальна загружаць актыўныя няўрадавыя арганізацыі і газэты, каб яны былі менш актыўнымі».