Opočk

Opočk
Опочка
	Lidnanznam;
Valdkund	Venäma
Eläjiden lugu (2021)	9,928 ristitud
Pind	23,91 km²
Telefonkod	+7−81 138-xx-xxx
Avtokod	60
Aigvö	UTC+3 (MSK+0)

Opočk (ven.: Опо́чка) om Venäman lidn Pskovan agjan suvipäivlaskmas. Se om Opočkan ümbrikon (edel vn 2024 vilukud — rajonan) administrativižeks keskuseks da palaks.

Istorii

Eländpunktan aluz om pandud vl 1341 kuti Opočk-külä. Se sai lidnan statusad vl 1414 lidnusen alusenpanendan jäl'ghe vl 1412. Saudihe lidnusen vajehtamha muretud Kolože-lidnust, kudamban jändused sijadasoiš üks'toštkümnes kilometras päivnouzmha nügüd'aigaižes lidnaspäi. Opočkan lidnuz päzui verhiden maiden äiluguižiš londoiš päliči. Vll 1772−1776 lidn oli Pskovan gubernijan eziauguižeks administrativižeks keskuseks, sid' makundan keskuseks.

Opočkan ižandusen päsarak om sömtegimišt (söndtavaroiden tegim — Pskovan maidkombinatan pala, leibkombinat, südäiveziden edheotand^[1]), mugažo omblendfabrik, nahkgalanterejan kompanii^[2] i laps'avtoištmiden pästandan edheotand ratas lidnas.

Geografijan andmused

Lidn sijadase Sur'-jogen randoil (Peipusjärven bassein), 90 m ü.m.t. keskmäižel korktusel.

Matkad Pskovhasai om 125 km pohjoižhe orhal vai 130 km avtotedme. Lähembaižed lidnad oma Novoržev 60 km pohjoižpäivnouzmha avtotedme, Sebež 60 km suvhe avtotedme i Pitalovo 75 km lodeheze avtotedme.

Tobmuz

Opočk oli lidnankundan üks'jäižeks eländpunktaks. Kätihe lidnankundad ümbrikon territorialižeks palakundaks vn 2024 vilukuspäi.

Lidnankundan tobmuden pämez' oli sen Deputatoiden nevondkundan ezimez'. Jäl'gmäine nevondkundan ezimez' oli Svetlana Mihailova (sügüz'ku 2020—). Edeline nevondkundan ezimez' oli Nina Smirnova vn 2013 semendkuspäi. Lidnankundan Administracijan pämez' oli Jelena Nikolajeva vn 2020 kül'mkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 11 603 ristitud, rajonan ristitišton koume videndest, vn 2021 — 9 928 ristitud. Kaik 10 307 eläjad oli lidnas vl 2017. Kaikiš suremb lidnan ristitišt oli 16 130 eläjad vl 1989.

Rahvahad (enamba 0,4 % vl 2021): venälaižed — 95,3 %, vaugedvenälaižed — 0,6 %, čiganalaižed — 0,5 %, ukrainalaižed — 0,5 %, toižed rahvahad — 1,5 %, rahvahuden ozutandata — 1,6 %.

Ortodoksižen hristanuskondan kuz' pühäpertid^[3] oma kaičenus i saudud lidnas: Pühän Jumalanmaman Katken jumalanpert' (vspäi 1804), Jumalanmaman Emäganpäivän jumalanpert' kaumžomal (puine, vspäi 1995), Spasan Toižetamižen jumalanpert' (letihe vll 1999−2005), koume časounäd. Niiden ližaks, enzne Spasan Toižetamižen päjumalanpert' i nell' jumalanpertid ei ole kaičenus.

Lapsiden opendusen aluzkundad oma nell' nimitadud päivkodid, gimnazii, keskškol nomer 4, čomamahtoiden škol, lapsiden openduztervehtamižkeskuz. Opočkan industrialiž-pedagogine kolledž^[4] om lidnan professionaližen opendusen aluzkundaks.

Galerei

Čomamahtoiden škol lapsiden täht (2014, ende Kukol'kinan erižpert')
Sündun Toižetamižen jumalanpert', vn 2011 nägu
Kodirandantedištandmuzei vl 2011 (ende profškol)
Kul'turkeskuz (2014)
Avtobusstancii vl 2014 (ende počtan stancii)

Homaičendad

Irdkosketused

Lidnan da sen ümbrikon tobmuden sait (opochka.gosuslugi.ru). (ven.)
Enččen lidnankundan lehtpoled Opočkan rajonan tobmuden saital (opochka.reg60.ru). (ven.) (om täuttud vn 2024 vilukuhusai)
Lidnan da rajonan kul'turan sait (opochka.ru). (ven.)

Opočk Vikiaitas

	Pskovan agjan lidnad
	Dno \| Gdov \| Nevel' \| Novoržev \| Novosokol'niki \| Opočk \| Ostrov \| Petseri \| Pitalovo \| Porhov \| Pskov \| Pustošk \| Sebež \| Velikije Luki

[1] Südäiveziden edheotandan sait (Opočk, 24vkusa.ru). (ven.)

[2] Opočkan nahktegim alliance-bags.ru-saital. (ven.)

[3] Opočkan pühäpertid sobory.ru-saital. (ven.)

[4] Opočkan industrialiž-pedagogižen kolledžan sait (opochka-kolledg.ru). (ven.)

[1]

[2]

[3]

[4]