Maseru

**Maseru**
Valdkund	Lesoto
Eläjiden lugu (2016)	330,760 ristitud
Pind	138 km²
Telefonkod	+266
Aigvö	UTC+2

Maseru (mugažo sesoto- da anglijan kelil; kändase sesoton kelespäi «rusttan čurukiven sija») om Lesoton pälidn da kaikiš suremb lidn, agrarižen valdkundan industrialine keskuz. Se-žo om Maserun ümbrikon administrativižeks keskuseks.

Istorii

Eländpunktan aluz om pandud vl 1869 policijan lagerikš kuti britanižen Basutolend-protektoratan pälidn. Vspäi 1966 om ripmatoman valdkundan pälidnaks. Eli läbi järgendusetomuziš 1990-nzil vozil.

Maseru šingotase sömtegimištol, sobiden tehmižel, kouriden i mohertegesiden edheotandoil, tohusiden pästandal, torguindal i turizmal. Valdkundan finansoiden i üläopendusen keskuz. Kaik kaks' biznesrajonad i kaks' tegimištzonad ratas lidnas.

Geografijan andmused

Lidn sijadase valdkundan lodehliženno rounanno Suviafrikan Tazovaldkundanke, 1600 metrad korktusel valdmeren pindan päl, Kaledon-jogen (sesoto: Mohokare) hural randal.

Sild Kaledon-joges päliči ühtenzoitab lidnad SAT:anke vspäi 1905. Raudtesol'm radab lidnas.

Klimat om subtropine mägiden vihmsezonanke (reduku-sulaku), päivoikaz vodes läbi. Voden keskmäine lämuz om +15 C°, tal'vkun-uhokun +20..+22 C°, semendkun-elokun +9..+11 C°. Ekstremumad oma −3 C° (heinku) i +33 C° (viluku). Paneb sadegid 691 mm vodes, enamba kül'mkus-keväz'kus (89..114 mm kus), vähemba semendkus-sügüz'kus (12..29 mm kus). Kun keskmäine relätivine nepsuz vajehtase 24..43 % röunoiš voden aigan.

Eläjad

Vn 1966 rahvahanlugemižen mödhe, Maserun eläjiden lugu oli 28 tuhad ristituid. Ripmatomuden tedotusen jäl'ghe vl 1966 ristitišt ližadaškanzi teravas, äi ekspatriantoid tuliba elämižhe Maseruhu. Vn 1986 rahvahanlugemižen mödhe lidnan eläjiden lugu oli 98 017 ristitud, vn 1996 — 137 837 ristitud. Nügüd'aigan valdkundan ristitišton kümnendez eläb pälidnas. Läz 430 tuhad eläjid om kaikes lidnaglomeracijas (2006).

Lesoton nacionaline universitet (9,2 tuh. üläopenikoid vl 2018) sijadase Rom-eländpunktas (angl.: Roma) 34 km suvipäivnouzmha pälidnaspäi. Sen aluz om pandud vl 1945 kut Katoline universitetine kolledž Pii XII-papan nimed. Om universitetan statusanke vspäi 1964. Siš om seičeme fakul'tetad i palakundad.

Transport

Lidn om avtobusühtenzoitusen valdkundadme päižeks keskuseks. Raudtesarak tuleb lidnha Suviafrikan Tazovaldkundaspäi sildadme Kaledon-joges päliči vspäi 1905.

Rahvahidenkeskeine civiline lendimport Mošvešve I-kunigahan nimed (MSU / FXMM) sijadase 18 km suvipäivnouzmha pälidnan keskuzpalaspäi Mazenod-lidnas. Tehtas reisid Johannesburgha (SAT), mugažo valdkundan mägirajonoidme. Kahtenz' Medžametalan-lendimport (angl.: Mejametalana Airport, FXMU) sijadase arni lidnas i kävutase sodatarbhaičendoiden täht, se oli valdkundan päižeks edel uden lendimportan vaumičendad Mazenod-lidnas vl 1985.

Galerei

Mpilo-kukkaz lidnas (2013)
Riman katoline Jumalanmaman päjumalanpert', vn 2018 nägu
Lidnan päine Kingzvei-ird (Kingsway street, 2006)
Šläpčomamahton keskuz i lauk vl 2006
Maseru-raudtestancii vl 2005

Homaičendad

Maseru Vikiaitas

	Afrikan pälidnad
	Abudž \| Addis-Abeb \| Akkr \| Alžir-lidn \| Antananarivu \| Asmar \| Bamako \| Bangi \| Banžul \| Bisau \| Brazzavil' \| Dakar \| Dodom \| Džibuti-lidn \| Džub \| Fritaun \| Gaborone \| Giteg \| Harare \| Hartum \| Jamusukro \| Jaunde \| Kair \| Kampal \| Kigali \| Kinšas \| Konakri \| Librevil' \| Lilongve \| Lome \| Luand \| Lusak \| Malabo \| Maputu \| Maseru \| Mbabane \| Mogadišo \| Monrovii \| Moroni \| Nairobi \| Ndžamen \| Niamei \| Nuakšot \| Port Lui \| Porto Novo \| Prai \| Pretorii \| Rabat \| San Tome \| Tripoli \| Tunis-lidn \| Uagadugu \| Viktorii \| Vindhuk