Mahatma Gandhi

Mohandas Karamchand Gandhi, in devanagari मोहनदास करमचन्द गांधी (Porbandar, 2 otobre 1869 – Nova Delhi, 30 zenaro 1948), el xe sta na inportante guida spiritual de l'India. Difati i ghe disea anca Mahatma, che vol dir granda anima. El xe sta uno dei primi a inventar e metar in pràtega la dotrina de la non-violenza e de la disobedienza zivil, come mezo par oporse a l'opresion del popolo da parte dei goernanti (ne la fatispecie i inglesi, in alora paroni de l'India).

Nato inte na fameja de comercianti, el sa sposà zoino (a tredes'anni) come costumava da lori; da so mojer el gavarà quatro fioi. A disnov'anni el ga ciapà su par ndar a studiar in Inghiltera, dove el xe deentà avocato. Tornà in India inte el 1891, du ani dopo i ga proposto un laoro in Sudafrica, dove el se trasferise co la fameja. Qua, vedendo che i so conazionali no i gavea nisuna libartà e nisun dirito, el ga tacà a organizar marce de protesta e atività propagandistiche, svilupando l'idea del satyagraha, che voria dir "non-obedienza senza violenza". Cioè lu e i so seguaci in pràtega i se rifiutava da far tute quele robe che i ritegnea lesive de i diriti e de la dignità dei omeni, ma a lo stesso tenpo no i ametea nesun atto de violenza par rivar a sto scopo. Uno dei episodi pi famosi de sto periodo xe quando Gandhi el jera in treno, e el controlor el volea mandarlo in terza classe, co la scusa che l'era un indian. Gandhi el sa rifiutà, parché lu el gavea un bijeto de prima classe, e quindi el gavea dirito a viajar in prima classe; e pitosto da ndar in terza el sa lassà butar zo de peso dal treno.

Inte el 1914 el xe tornà in India, dove el xe deentà subito uno dei prinzipali sostenitori de l'indipendenza dai inglesi, guadagnandose na grandisima amirazion da parte del popolo. Tra le so iniziative pi famose ghe xe el swadeshi, o sia el boicotagio de le merci straniere: inveze de cronpar le stofe filà in Inghiltera, i indù i gavea da metarse el khadi, un vestito de coton fato in casa. Gandhi stesso el dasea l'esenpio tessendose da solo i vestiti che el gavea intorno.

Gandhi durante la Caminada de la Sal, marzo 1930

N'altro episodio famoso xe sta la Caminada de la Sal. Sicome el goerno colonialista britanico el gavea messo na tassa su la sal, tante fameje pitoche le se catava in dificoltà. Alora Gandhi e i so sostenitori, par no pagar na tassa che secondo lori la xera ingiusta, i ga ciapà su a pié e i ga caminà par vintiquatro dì fin al mar, par catarse su la sal da soli, a maca, o sia gratis. Partii el 12 de marzo del 1930 da Ahmedabad (India ozidental), in sole 78 persone, i ga fato dosento miglia catando su gente da tuti i posti dove i passava. El 5 de avril i xe rivai a le saline in diverse migliaia de persone: subito la polizia la ga zercà de fermarli coi manganei, ma vedendo quanta gente ghera, e vedendo che tuti i tirava driti senza scapar né reagir ai colpi, ghe tocà farli passar.

Par le so atività "soversive" i inglesi i la messo in preson pi olte anca par un bel toco, ma ogni olta ghe tocava molarlo prima o dopo par le grandi proteste de la popołasion. Inte el 1931 el ga fato anca un viajo in Europa, visitando Londra e Roma.

Inte el 1947 finalmente i inglesi i ga ceduo, ma contrariamente a le idee de Gandhi, che el volea na India unìa, su base federal, el vecio inpero inglese el xe sta spartio in do Stati, uno par i musulmani (el Pakistan, che a l'epoca el xera unìo al Bangladesh) e uno par i indù (l'India de ancó). Sta division la ga provocà grandi scontri tra le do fazioni e trasferimenti in massa de gente (induisti che scapava dal Pakistan e musulmani che scapava da l'India). In sto clima de grande instabilità Gandhi el ga proà inutilmente a calmar i animi, ma el 30 de zenaro del 1948 un fanàtego indù el la copà davanti a la so casa de Nova Delhi.

Altri progetti

• Wikimedia Commons

• Wikimedia Commons el detien imàjini o altri file so Mahatma Gandhi
• el detien schemi gràfeghi so