Jack Robert Lousma

Jack Lousma, NASA-Foto vun 1971

Jack Robert Lousma (* 29. Februar 1936 in Grand Rapids, Michigan) is en ehmalger US-amerikaansch Astronaut.

Utbillen

Lousma kreeg 1959 en Bachelor in Luftfohrttechnik vun de University of Michigan un 1965 en Master in Luftfohrttechnik vun de Naval Postgraduate School. Buterdem kreeg he 1973 en Ehrendokter in Ruumfohrt vun de University of Michigan, 1982 en Ehrendokter vun dat Hope College as ok 1986 en wiederen Ehrendokter in Bedrievswertschap vun dat Cleary College.

1959 gung Lousma to dat US Marine Corps un wurr dor as Upklärenspilot insett.

Astronautentätigkeit

Astronaut Jack Lousma bi en Weltruumutstieg

Astronaut Jack Lousma ünner de Dusche in’ Skylab

In’ April 1966 hörr Lousma to de 19 Astronauten, de vun de NASA utwählt wurrn. He weer dornah Liddmaat vun de Ünnerstüttensmannschapen för de Apollo-9-, 10- un 13-Missionen. Buterdem weer he Ersatz-Docking-Modul-Pilot för dat Apollo-Sojus-Test-Projekt.

Skylab 3

An’ 28. Juli 1973 is Lousma as Pilot vun en Apollokapsel tosommen mit Kommandant Alan Bean un Wetenschapsspilot Owen Garriott to de 59 Daag lang düern Mission Skylab 3 (SL-3) up de US-Ruumstatschoon Skylab flagen. De Mannschap hett wiels de Mission söss Ersatzgyroskope to de Lageregeln un en Sünnschuul installeert. Neben tallriek Experimenten stunn ok de Beobachtung vun de Sünn up dat Programm vun den bit dorhen langsten Ruumfloog. An’ 25. September sünd se weer torüchkommen.

Lousma bi en Experiment wiels STS-3

STS-3

An’ 22. März 1982 is Lousma as Kommandant vun de Ruumfähre Columbia tosommen mit den Piloten Gordon Fullerton in’t All flagen. Bi de acht Daag düern STS-3-Mission wurr de Columbia up ehr darten Testfloog up hör thermale Wedderstandsfähigkeit hin prüüft. Buterdem wurr de Roboterarm vun den Shuttle utprobeert. De Lannen weer an’ 30. März 1982 to’n eersten un eenzig Mal in White Sands in New Mexico.

Kandidatur för den Senat

Lousma is 1983 ut de NASA utscheeden. Een Johr later weer he Kandidat vun de Republikaner in Michigan för den US-Senat. He kreeg aber blots 47 % vun de Stimmen un verlor dormit knapp gegen den Demokraten Carl Levin.

Privates

Jack Lousma un sien Fru Gratia Kay hebbt veer Kinner.

Weblenken

Jack R. Lousma. Mehr Biller, Videos oder Audiodateien to’t Thema gifft dat bi Wikimedia Commons.

• NASA: Biografie (engelsch)
• spacefacts.de: Körtbiografie