Dreito público

Ye l ramo de l dreito que çpone subre antresses ó outelidades eimediatas de la quemunidade (dreito custitucional ó político, dreito admenistratibo, dreito creminal ó penal, dreito judiciairo ó porcessual).

Sob prespetiba de la cidadanie, cumo cunjunto de normas de porteçon contra l'abuso de l poder de gobierno, l dreito público tamien ye chamado dreito de l stado (an cuntraposiçon a dreito de l gobierno).

Outro punto çtintibo de l Dreito Público ye l percípio que l rege: l Percípio de la Supremacie de l'antresse público an face de l'antresse andebidual. Cun esto será siempre priorizado l'antresse giral deixando pa trás de l'antresse andebidual de cada pessona, debendo este submeter-se àquel. Quando se trata de la relaçon antre dous ó mais Stados, acuntece l Dreito Anternacional Público.

Tradecionalmente l dreito debide-se nas catadories de Dreito Público i de Dreito Pribado. Trata-se dua çtinçon antiga, criada pul jurista romano Ulpiano:

Publicum ius est quod ad statum rei Romanae spectat, privatum quod ad singulorum utilitatem..

Esto ye, Dreito Público ye l que cuncerne al Estado romano, i Pribado, l que cunsidra l'outelidade de ls particulares. Assi i todo, esse critério de l'outelidade ó antresse bisado pula norma ye falho, porque nun se puode afirmar, cun sigurança, se l'antresse portegido ye de l Stado ó de ls andebíduos. An rezon desso houbo outores que cuncluíran que l fundamiento de la debison ancuntraba-se ne l "antresse dominante", eideia ansastifatória, pus tan anterlhigados stan que ye ampossible bereficar qual l'antresse dominante.