Alboin
|
Quest articol chì l'è scrivud in lombard, con la Noeuva Ortografia Lombarda |
L’Alboin (latin: Alboinus, anglo-sassen: Ælfwine; 530 zirca – Verona, 28 de sgiugn del 572) l’è stait rè di Lombard, a partì de intoren al 563 a rivà al 572. Adree al sò regn, i Lombard hann fenid la sò migrazzion storega cont el rivà a stabilìss ind el territori lombard, conquistad de lu medem intra el 569 e el 572. L’haveva ciapad el post del pader, el rè Aldoin.
Adree al sò regn in Pannonia gh’è stait un badaluch de bataje intra i Lombard e Sgepid, pœu fenid con la vitoria di Lombard grazzia a una strategega lianza coi Aver. Intra la coalizzion de popoi de lu comandad ind la storega migrazzion, gh’era denter di Baver, Sgepid, Bulgher, Aver e 20'000 guerrer sassen cont i sò fameje,[1] ancaben che el numer total di persone che s’eren tacad adree a l’invasion de l’Alboin el saja ancamò oget de descussion intra i studios. El Pavol Diacon el porta che lor chì sajen stait intoren ai 100'000, che almanch 26'000 eren propri di guerrer,[2] anca se a gh’è di testimonianze de l’epoca che disen che i eren financa 500'000.[3] De sora maross, i studios pussee moderen parlen de una quantitaa intra i 100'000 e i 150'000; per esempi, el Jörg Jarnut, el porta che i eren un bell 150'000 persone, ma el Stefano Gasparri el parla sgiamò de un numeron intra i 100'000 e i 300'000.
Invasion
[Modifega | modifica 'l sorgent]
Apœus a l’havé invas la Pianura Padana ind el 568 cont el passà per i Alp Sgiuliane, la coalizzion de popoi sgermanegh menada inanz de l’Alboin l’ha spertament gadegnad la pupart del Venet e de la Liguria. El Friol el vegnarà pœu el prim ducad lombard, con Zividal coma sò capital. Ind el 569, incontrastait, l’ha pœu anca conquistad la zitaa pussee granda del territori: Milan. Intra i zitaa che gh’hann però dait bataja gh’era Pavia, che l’è staita ciapada nomà depos de un assedi de trii agn. Fament de gloria, l’Alboin l’ha pœu provad a slongà i man in su la Toscana, ma i sò oposidor haveven sgiamò ciapad un bell’influenza in su l’armada del rè.
Mazzament
[Modifega | modifica 'l sorgent]
L’Alboin l’è stait mazzad su in del 28 de sgiugn del 572, ind un golp de stait infogad di Bizantin. L’è stait orchestrad de l’Elmegh, fradellaster del rè, e de la Rosamunda, mojer de l’Alboin, ma tosa de vun di rè di Sgepid che l’Alboin l’haveva copad un quaj agn indree. L’infognada l’era però piasuda nò a la pupart di Lombard, che hann subet elesgiud el Clef coma suzzessor de l’Alboin, cont el forzà l’Elmegh e la Rosamunda a reparà a Ravenna sota la protezzion di Bizantin. La mort de l’Alboin la gh’ha trait via a la coalizzion sgermanega l’unegh lider che j’havariss podud tegnì insema, l’ultem de una dinastia de rè-eroj che l’haveva personalment menad i Lombard intravers i sò migrazzion di vai de l’Elba a la Lombardia. Per tancc segoi, adree al mazzament de l’Alboin, la sò mort, el sò eroesim e i sò vitorie in bataja inn stait zelebrad ind la poesia epega sassona e bavara.[4][5][6]
Ligam de denter
[Modifega | modifica 'l sorgent]Ligam de fœura
[Modifega | modifica 'l sorgent]
Wikimedia Commons el gh'ha dent imagin o alter archivi su Alboin
Referenze
[Modifega | modifica 'l sorgent]- ↑ Historia Universal. Historia moderna. Volumen 9. Conde Philippe-Paul Ségur. Traducción de Alberto Lista. Madrid: Febrero, 1831.
- ↑ Paolo Cammarosano, Storia dell'Italia medievale. Dal VI all'XI secolo, Laterza, Roma-Bari, pp. 96-97, 2001, ISBN: 9788842085560
- ↑ MARCO AURELIO - L'IMPERO IN AGITAZIONE - Anno 169 d.C.
- ↑ Bertolini 1960, pp. 34–38.
- ↑ Gasparri, Stefano. "I longobardi: all origini del medioevo italiano". Storia Dossier, (1990) 42, Firènse: Giunti. ISBN 88-09-76140-5.
- ↑ Herwig Wolfram. The Roman Empire and Its Germanic Peoples. Berkeley: University of California Press, 1990 [1997], ISBN 0-520-24490-7. p. 285