Hardenberg

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Hardenberg in Euverijssel

Hardenberg (Zuid-Drents: Haddenbarg, 'n Harnbarg, 'n Arnbarg) is e stedsje en 'n gemeinte in de Nederlandse provincie Euverijssel, tege de grens mèt Duitsland (Nedersakse) en Drente aon, mèt 'n oppervlak vaan 317,24 km² (daovaan 4,37 km² water) en (1 april 2016) 59.796 inwoeners. De hoofplaots heet good 18.000 inwoeners. Daoneve kint de gemeinte nog de dörper, gehuchter en naobersjappe Ane, Anerveen, Anevelde, Balkbrug, Bergentheim, Brucht, Bruchterveld, Collendoorn, Dedemsvaart, Den Velde, Diffelen, Gramsbergen, De Haandrik, Heemse, Heemserveen, Holtheme, Holthone, Hoogenweg, Kloosterhaar, Loozen, Lutten, Mariënberg, De Meene, Oud Avereest, Radewijk, Rheeze, Rheezerveen, Schuinesloot, Sibculo, Slagharen en Venebrugge.

E deil vaan Hardenberg - 't noorde vaan de gemeinte - ligk in de Veenkolonië. In Hardenberg is de Gereformeerde kèrk vrijgemaak, op aander plaoste miestal 'n splinterkèrk, bezoonder good vertegewoordeg.

Historie

De historie vaan Hardenberg begint mèt de neerzètting Nijenstede, neet wied vaan 't later Hardenberg. Neve dit pläötske kaom 't bisjoppelek kestiel de Herdenberch. Door veurdorende conflicte mèt de hiere vaan Coevorden leet d'n Utreise bisjop in de daartiende iew 't kestiel oontmantele. De vesting krijg in 1362 stadsrechte vaan bisjop Jan van Arkel. Hardenberg zal zien economische en militaire beteikenis neet laank hawwe: in 1497 verweus 'ne brand de ganse stad en in 1518 liet de bisjop de vesting oontmantele. Ouch in 1708 brande Hardenberg aof. Naodeen bouwde me 't weer op mèt steine hoezer. Tot in de twintegste iew waor de plaots hiel agrarisch. Daonao kaom get industrie op. Tösse 1818 en 1942 waor de gemeinte gesplits in Ambt Hardenberg en Stad Hardenberg. In 2001 woorte de gemeintes Avereest en Gramsbergen aon Hardenberg touwgevoog.

Externe link

• Website vaan de gemeinte