Sjlager

Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.

'ne Sjlager is e meistal Duitstalig leedje en ein vanne populairste vörm vanne volkszangcultuur. 't Waord beteikent letterlik successtök en is in feite 'n vertaling van 't Ingelse hit.

Sjlagers waere in Duitslandj dök aangeduud es Volksmusik en höbbe inderdaad in de folklore häör wortels. De sjlager óntsjtong behauve oet de volksleedsjes ouch oet de salonmuziek, dae veur de oorlog bluide. Omdat volksmuziek nao d'n Tweede Wereldoorlog mit 'n zjwaor taboe belas woor begós me dae muziek te modernizere. 't Resultaat woor weinig authentiek maar ongeveerlik.

Ouch al woor de sjlagercultuur op häör retour, raakte in de jaore '70 't publiek meer en meer vergriejsd. Desondanks is 't genre in Duitslandj nog ummer zeer populair. Befaamp zeen de festivals die oppe Duitse zenders te zeen zeen. Ouch in Néerlandj waere die, veural door aaj miense, waal bekeke.

Bekende sjlagerzangers zeen Michael Holm, Heino, Udo Jürgens, Frank Galan, Rex Gildo, Ralph Glomp

Ruum bekeke nömp me sommige gelieksaortige Nederlandstalige volksmuziek ouch waal sjlager. Veural de muziek van Frans Bauer en Marianne Weber wörd zo getypeerd. De sjlager wörd duk aangeduud es de Duitse vertaling van 't laevesleed. Väöl Néerlandse laevesleedzangers zinge ouch Duitstalig en traeje dao mit hun eige, soms vertaalde sjlagers op, es Frans Bauer en Jan Smit. Nederlandstalige Sjlager weurt dök Smartlap genömp.