Rol (gramatica)

En linguistica, un rol es un terma de semantica cual refere a la modo en cual un partisipante (comun representada a la nivel de sintatica par un formula nomin) relata a la ata o state descriveda par la predica (representada a la nivel de sintatica par un verbo). Per esemplo, en la frase "Susan come un poma", Susan es la ator ci fa la ata, e donce el es la ajente; la poma es la cosa cual es comeda, e donce el es la pasiente.

Tre roles es comun espresada par la sujeto de un proposa:

La ajente: la person ci ata (pe, "Joan come cuieta se sopa.")
La esperior: la person ci reseta la enflue sensal o emosional (pe, "Susan ia oia la canta.")
La causa natural: la cosa, sin mente, ce ata (pe, "Un avalanxa ia destrui la temple antica.")

Cuatro roles es comun espresada como un ojeto de un proposa:

La pasiente: un cosa o person cual es la ojeto de la ata e cambia sua stato (pe, "La rocas cadente ia crase la auto.")
La tema: un cosa o person cual es la ojeto de la ata, ma cual no cambia sua stato (pe, "Nos crede en multe dios." "Me ave du enfantes.")
La resetor: un forma de gol cual vade con verbos cual espresa un cambia de posese (pe, "Me envia un nota a Joan.")
La resulta: un cosa cual aveni como la resulta de un ata (pe, "Nos ia forni un torta.")

Otra roles es comun espresada par formulas preposadal, proposas suordinada, o par afisadas:

La beneficada: la person o cosa per cual la ata aveni (pe, "Me forni un tarte per Susan.")
La intende: la razona per cual un ata es fada (pe, "Joan ia telefoni afin el ia nesesa la aida.")
La causa: lo cual causa la ata, no "afin" ma "car" (pe, "Car Susan ia es fame, el ia come la tarte.")
La loca: do la ata aveni (pe, "Joan ia jua en la parce.")
La destina: a do la ata es dirijeda (pe, "Joan pasea a la scola.")
La orijina: de do la ata orijina (pe, "La roceta ia es lansada de Florida.")
La via: un parola cual descrive la via tra cual otras viaja (pe, "la bebe pasea tra la sala.")
La tempo: la tempo cuando la ata aveni (pe, "La roceta ia es lansada en la gera.")
La strumento: la cosa usada per fa la ata (pe, "Joan ia corti la sinta con un sisor.")
La modo: la modo en cual la ata es fada (pe, "Susan ia telefoni con multe ansia.")
La acompaniante: la cosa o person cual acompania, pe, la ajente (pe, "Me ia come con me sposa.")
La contra-ajente: la cosa o person cual resista o ata contra la ajente (pe, "El luta con se frate.")
La mesur: un parola cual indica la cuantia de alga cosa (pe, "La veste costa sento dolares.")

Bordas entre esta roles no es sempre clar!

En multe linguas, como suomi, magiar, e turces, la roles pote es indicada par un sufisa a la nom. Per esemplo, magiar ave un sufisa strumental (-val/-vel) ce indica clar la strumento de un frase. En linguas como latina e rusce, la finis de parolas cambia per indica alga roles. Otra linguas, como engles, japanes, e elefen, usa preposadas o posposadas.