ກົມສົ່ງເສີມ ແລະ ປະຢັດພະລັງງານ, ກະຊວງພະລັງງານ ແລະ ບໍ່ແຮ່ ຮ່ວມກັບ ລັດວິສາຫະກິດໄຟຟ້າລາວ ຈັດຝຶກອົບຮົມ ການນໍາໃຊ້ເຄື່ອງມືກວດສອບຄວາມປອດໄພຂອງຕູ້ສາກລົດໄຟຟ້າ ເພື່ອເປັນການສົ່ງເສີມການນໍາໃຊ້ພະລັງ ງານສະອາດໃນ ສປປ ລາວ ເວົ້າລວມ ໂດຍສະເພາະຂະແໜງຄົມມະນາຄົມ-ຂົນສົ່ງ, ເຊີ່ງການຝຶກອົບຮົມດັ່ງກ່າວໄດ້ຈັດຂື້ນໃນລະຫວ່າງ ວັນທີ 26-27 ພະຈິກ 2024 ຢູ່ທີ່ ລັດວິສາຫະກິດໄຟຟ້າລາວ ສໍານັກງານໃຫຍ່.
ງານຄັ້ງນີ້ເປັນປະທານໂດຍ ທ່ານ ໂພນສະຫວັດ ໄຊຍະວົງ ຫົວໜ້າສະຖາບັນໄຟຟ້າລາວ ໂດຍມີຜູ້ເຂົ້າຮ່ວມຈາກກົມສົ່ງເສີມ ແລະ ປະຢັດພະລັງງານ, ສະຖາບັນຄົ້ນຄ້ວາພະລັງງານ ແລະ ບໍ່ແຮ່ ແລະ ລັດວິສາຫະກິດໄຟຟ້າລາວ, ຈຸດປະສົງເພື່ອເພີມທະວີ ດ້ານມາດຕະຖານເຕັກນິກໃນການຕິດຕັ້ງຕູ້ສາກລົດໄຟຟ້າໄດ້ມາດຖານມີຄວາມປອດໄພ ທັງສ້າງຄວາມໝັ້ນໃຈໃຫ້ກັບຜູ້ຊົມ ໃຊ້ລົດໄຟຟ້າ.
ການຝຶກອົບຮົມດັ່ງກ່າວໄດ້ຮັບການສະໜັບສະໜູນ ຈາກ ອົງການພັດທະນາສາກົນຂອງປະເທດສະຫະລັດອາເມລິກາ (USAID). ຜ່ານການຝຶກອົບຮົມການນຳໃຊ້ເຄື່ອງມືກວດສອບຄວາມປອດໄພຂອງຕູ້ສາກ ພາກທິດສະດີ ແລະ ພາກປະຕິບັດຕົວຈິງ, ນັກສຳມະນາກອນ ຈະສາມາດນໍາໃຊ້ຄວາມຮູ້ທີ່ຝຶກມານໍາໃຊ້ເຂົ້າກັບວຽກງານຕົວຈິງ ເປັນຕົ້ນ: ການກວດສອບຄວາມປອດໄພຂອງສະຖານີສາກລົດໄຟຟ້າ, ການອອກແບບ ແລະ ຕິດຕັ້ງສະຖານີສາກລົດໄຟຟ້າ, ຂະບວນການ, ວິທີດໍາເນີນງານ ແລະ ບໍາລຸງຮັກສາໃຫ້ຖືກຕ້ອງຂອງສະຖານີສາກລົດໄຟຟ້າ.
ຂອບໃຈພາບ ແລະ ຂ່າວ: ກົມສົ່ງເສີມ ແລະ ປະຢັດພະລັງງານ
