Espanyol
| Reial Club Deportiu
Espanyol de Barcelona, S.A.D. | |||
| Fullt nafn | Reial Club Deportiu
Espanyol de Barcelona, S.A.D. | ||
| Gælunafn/nöfn | Periquitos (Páfagaukarnir), Blanquiazules (Hvítbláir) | ||
|---|---|---|---|
| Stytt nafn | RCDE | ||
| Stofnað | 13. október 1900 | ||
| Leikvöllur | RCDE Stadium | ||
| Stærð | 40.000 áhorfendur | ||
| Stjórnarformaður | Chen Yansheng | ||
| Knattspyrnustjóri | Diego Martinez | ||
| Deild | Segunda División | ||
| 2023-2024 | 4. sæti af 22. | ||
| |||
Reial Club Deportiu Espanyol eða Espanyol er katalónskt knattspyrnufélag með aðsetur í Cornellà de Llobregat í suðvestur-Barcelona.
Saga
[breyta | breyta frumkóða]Espanyol var stofnað þann 13. október árið 1900 af nokkrum háskólanemum í Barcelona. Var það fyrsta knattspyrnufélagið á Spáni sem alfarið var stofnað af heimamönnum, en fyrri félög höfðu öll innihaldið Breta sem búsettir voru í landinu. Espanyol var meðal þátttökuliða þegar spænska bikarkeppnin fór fyrst fram árið 1903. Þremur árum síðar lognaðist félagið út af vegna fjárhagsörðugleika og leikmenn þess gengu flestir til liðs við X Sporting Club sem átti góðu gengi að fagna í knattspyrnukeppni Katalóníu á þeim árum. Árið 1909 var félagið endurreist og ári síðar tók það upp núverandi aðalbúning sinn, hvítar og bláröndóttar treyjur.
Espanyol er eitt þeirra mörgu spænsku félaga sem fengið hafa leyfi frá krúnunni til að kalla sig konunglegt íþróttalið. Það var Alfons 13. sem veitti félaginu þá heimild. Á lýðveldistímanum hætti félagið tímabundið að kenna sig við konungsvaldið en tók það upp aftur að borgarastyrjöldinni lokinni. Ýmsar smábreytingar hafa verið gerðar á nafni félagsins í gegnum tíðina til að laga það að katalónskri stafsetningu o.fl.
Félagið varð nokkrum sinnum katalónskur meistari í knattspyrnu en lét minna fyrir sér fara á landsvísu. Espanyol varð þó bikarmeistari árin 1929 og 1940, í bæði skiptin eftir sigra á Real Madrid í úrslitum. Ekkert félag hefur keppt jafn oft í La Liga án þess að ná að verða meistari.
Javier Clemente stýrði Espanyol frá 1986-89 og kom liðinu best í þriðja sæti árið 1987. Það gaf þátttökurétt í Evrópukeppni félagsliða leiktíðina á eftir. Þar sló Espanyol m.a. út ítölsku stórliðin A.C. Milan og Internazionale en tapaði í úrslitunum fyrir Bayer 04 Leverkusen eftir vítaspyrnukeppni.
Árið 2000 varð Espanyol bikarmeistari í fyrsta sinn í 60 ár, eftir sigur á Atlético Madrid. Bikarmeistaratitillinn gaf keppnisrétt í UEFA bikarnum á nýjan leik og aftur komst Espanyol alla leik í úrslitaleikinn til þess eins að tapa á ný í vítaspyrnukeppni, að þessu sinni gegn Sevilla FC.
Fjórði og síðasti bikarmeistaratitillinn vannst árið 2006 eftir sigur á Real Zaragoza.
Frá 2009-12 stýrði Argentínumaðurinn Mauricio Pochettino félaginu, en hann hafði áður leikið með Espanyol við góðan orðstír. Var þetta fyrsta þjálfarastarf hans. Í stjóratíð hans bar það helst til tíðinda að nýr heimavöllur var tekinn í notkun.
Titlar
[breyta | breyta frumkóða]- Copa del Rey
- Sigrar (4): 1929, 1940, 1999–2000, 2005–06