Petri Atarrabiakoa

Petri Atarrabiakoa
Bizitza
Jaiotza	Atarrabia,
Herrialdea	Nafarroa Garaia, Euskal Herria
Heriotza	1347 (egutegi gregorianoa)
Jarduerak
Jarduerak	teologoa

Petri Atarrabiakoa (? - 1347), frantziskotar administratzaile eta teologoa izan zen.

Petriren gaztaroa ez da ongi ezagutzen. "Atarrabiakoa" deitzen dutenez, sorterria herri hori zuela uste da. Ez dakigu noiz eta non sartu zen frantziskotarren ordenan, nahiz eta Iruñean gertatu zela pentsa daitekeen.^[1] Joan Duns Eskoto edo haren ikasle bat izan zuen irakasle Parisko Unibertsitatean.^[2] Bi aldiz hautatu zuten Aragoiko probintziako ministro frantziskotar posturako, 1317tik 1320ra eta 1324tik 1326ra.

1325ean teologia sakratuko irakasle izan zen, Bartzelonan ziurrenik. 1328an Parisera joan zen Nafarroako Joana II.a erreginaren ordezkari gisa.^[2] Misio horrekin lotutako dokumentu batek baieztatu du teologiako maisu zela. 1330eko Nafarroako foruen hobekuntzan parte hartu zuen.^[1] Nafarroako Filipe III.a erregeak pentsio bat eman zion 1329an. Erregistroek erakusten dutenez, pentsio hori azken aldiz 1346an ordaindu zen, eta beraz, 1347an hil zela uste da.^[2]

Petrik iruzkin bat idatzi zuen Petrus Lombardusek idatzitako Sententiarum libri quattuor sortako lehen liburuari buruz. Lan horretan bere quodlibet delakoa aipatzen du, ustez Bartzelonan egin zituen galderen eta erantzunen saioen erregistroa. Vatikanoko liburutegian aurkitutako eskuizkribu batean zenbait galdera Petriren galderatzat jo dira.

Atarrabiako eskola publikoak haren izena darama. Segur aski itzal handiko gizona zen garaian, batzuen ustez Atarrabi pertsonaia mitologikoak harengandik hartu zuen izena.