Vicki Baum

Vicki Baum
Persona informo
Vicki Baum
Naskiĝo	24-an de januaro 1888 (1888-01-24) en Vieno
Morto	29-an de aŭgusto 1960 (1960-08-29) (72-jaraĝa) en Holivudo
Mortis pro	Naturaj kialoj vd
Mortis per	Leŭkemio vd
Lingvoj	germana • angla vd
Ŝtataneco	Usono Aŭstrio vd
Familio
Edz(in)o	Richard Lert (en) (1916–) Max Prels (1906–1910) vd
Profesio
Okupo	scenaristo harpisto ĵurnalisto verkisto muzikisto vd
Laborkampo	Muziko, harp performance (en) , literaturo, ĵurnalismo kaj kina scenverkado vd
Aktiva en	Berlino • Oksfordo vd
vd	Fonto: Vikidatumoj

Vicki BAUM [viki baŭm], aŭ plennome: Hedwig BAUM (24-a de januaro 1888 - 29-a de aŭgusto 1960) estis juda germanlingva verkistino.

Naskiĝinte en Vieno, ŝi laboris unue kiel harpistino kaj poste kiel ĵurnalistino en Berlino, Kijlo, Hanovro kaj Mannheim. Ekde 1914 ŝi dediĉis sin ankaŭ al la verkado de romanoj. Internacian famon ŝi gajnis per sia romano Menschen im Hotel (= Homoj en la hotelo), kiu unuafoje publikiĝis en la jaro 1929 kaj unu jaron poste jam furoris kiel teatraĵo en pluraj eŭropaj landoj kaj en Usono.

En la jaro 1931 Vicki Baum okaze de la filmigo de Menschen im Hotel vojaĝis al Novjorko kaj Hollywood. Ankaŭ tiu ĉi projekto (titolita Grand Hotel, ekz. kun Greta Garbo en grava rolo) fariĝis sukceso: Ĝi eĉ gajnis Oskaron en la kategorio plej bona filmo. En 1932 la verkistino definitive ekloĝis en Kalifornio kaj - post kiam hejme la nazia reĝimo malpermesis ŝiajn librojn - ŝi en la jaro 1938 fariĝis usona civitanino kaj komencis verki ankaŭ en la angla lingvo.

Vicki Baum mortis je la 29-a de aŭgusto 1960 en Losanĝeleso (Kalifornio). Postmorte (en 1962) aperis ŝia membiografio Es war alles ganz anders.

Listo de verkoj

• Frühe Schatten (romano, 1919)
• Ulle, der Zwerg (romano, 1924)
• Menschen im Hotel (romano, 1929)
• Stud. Chem. Helene Willfüer (romano, 1929)
• Zwischenfall in Lohwinkel (romano, 1930)
• Leben ohne Geheimnis (romano, 1932)
• Das große Einmaleins (romano, 1935)
• Die Karriere der Doris Hart (romano, 1936)
• Liebe und Tod auf Bali (romano, 1937)
• Hotel Shanghai (romano, 1939)
• The Ship and the Shore (romano, 1941)
• Cahuchu (romano, 1944)
• Es war alles ganz anders (membiografio, eld. 1962)

Tio aperis en Esperanto

Amo kaj morto en Balio / El la germana lingvo trad. P.H. Mooij. Reviziis Karl Beckmann kaj Akiko Woessink-Nagata. Rotterdam: Universala Esperanto-Asocio 1986, 420 p. ISBN 92-9017-033-6
Originalo: Liebe und Tod in Bali

„ Ĝi estas verko pri la aŭtentika tradicia vivo de la balianoj kaj ties moroj. En formo de romano, ĝi rakontas pri homaj sortoj dum historiaj okazaĵoj ĉirkaŭ la renkontiĝo kun la nederlanda kolonia potenco en la pasinta jarcento. Jam de ekstere tiu volumo tre longe impresas... kaj vere: temas pri Esperanta versio de unu el la plej bonfamaj verkaĵoj de Vicki Baum, — aŭtorino anatemita de la nazioj— kio ja atestas pri eksterordinara valoro. La traduko de P.H. Mooij, meritplena esperantisto, estas elstare flua, lingve kaj stile senriproĉa, facile komprenebla, sen superfluaj neologismoj. La listo de la indiĝenlingvaj vortoj, necesas pro la unikeco de la objektoj kaj nocioj, kiujn ili signifas, ampleksas nur duonan centon da eroj, modera rilato al 417 paĝoj da teksto. Tiu teksto prezentiĝas tre korekte presita, en bela tipografio sur bonkvalita papero. ” — D-ro Karl Beckmann (Vieno). Boletín n275 (maj 1986)