Hofbräuhaus

Hofbräuhaus am Platzl

Hofbräuhaus innan

As Hofbräuhaus guit ois s berihmtaste Wiatshaus vo da Wejd und ois Woarzeichn vo Minga. Es steht in da Oidstod "am Platzl" und wor friaa da Sitz vo da Hofbräu-Brauarei.

As Hofbräuhaus is wejdweit a Synonym fia boarische Gmiatlichkeit und zimftige Musi, fia boarisches Bia und Spezialitetn. Seit mea wia 400 Joar gheat Minga, Bia und Hofbräuhaus zamm.

Gschicht

Da bayerische Herzog Wilhelm V. hod anno 1589 an Bau vom Hofbräuhaus ois Brauarei in Auftrog gebm. Da easchte Zweck wor, an Wittlsbocha Hof mit Braun-Bia z vasoagn, so is aa da Nama entstandn. Voahea is as Bia teia in Niedasaxn, Saxn und Hessn zuakafft worn. Ois Standoat is da Plotz gwejd worn, wo s ehemolige Hennahaus ('Hühnerhaus') gstandn is.

Im Zwoatn Wejdkriag is as Hofbräuhaus 1945 ba am Bombardement vo Minga duach de Alliiatn fost voistendi zasteat worn. De Rekonstruktion is bis zua 800-Joarfeia vo Minga 1958 obgschlossa gwen. Bis heit is as Hofbräuhaus a Magnet fia Touristn. Dog fia Dog keman 35.000 Bsuacha. Da Freistoot Bayern nimmt so Joar fia Joar zwoastellige Millionbedreg eih.

Anno 2004 is in Las Vegas in da USA unta Lizenz a Hofbräuhaus nochm Vorbuid vom Mingara Hofbräuhaus baut worn.

As Hofbräuhaus wor vo seine Grindung o im Bsitz vo de boarischn Herrscha. Anno 1852 hod da Kini Maximilian II. s Hofbräuhaus an an bayerischen Stoot ibagebm. Heit hoassts offiziej Staatliches Hofbräuhaus am Platzl.

Hofbräuhaus-Liad

As Hofbräuhaus-Liad is a wejdbekannts Stimmungsliad, wo zan Repertoire vo jeda Bloskapejn gheat. Da Refrain geht so: In München steht ein Hofbräuhaus - oans, zwoa, gsuffa. Dees Liad is 1935 vom Wilhelm „Wiga“ Gabriel aus Berlin komponiat worn.

A Zitat vonam Liad hod 1981 zan Skandal gfiat, ausglest duach de Mingara Band Spider Murphy Gang. Dees Liad fangt so o: "In München steht ein Hofbräuhaus – doch Freudenhäuser müssen 'raus". Dabei gehts um Doppemoral in da Gsejschoft und um Prostitution. Obwoi vui Radiostationa dees Liad boykottiat hom, is de Single 750.000 Moi vakafft worn und hod fia de Spider Murphy Gang an Duachbruch brocht.

Alois Hingerl

Da Alois Hingerl, de Haptfigur vom Mearchn "Ein Münchner im Himmel", wor sei fiktivs Lebm lang Stammgost im Hofbräuhaus. Noch seim Afenthoid im Himme is a wieda ins Hofbräuhaus ganga und hod do driba sein Aftrog vom Heagod vagessn.

Zitat

Da Lenin hod si wearend seina Emigration aa lengare Zeit in Minga afghoidn. Im Dogebuach vo seine Lebmsgfeatin Nadeschda Krupskaja steht dazua:

Besonders gern erinnern wir uns an das Hofbräuhaus, wo das gute Bier alle Klassenunterschiede verwischt.

Literatua

• Egon Dheus, Bernd H. D. Kirchner (Hrsg.): Das Hofbräuhaus am Platzl in München 1897-1997 - 100 Jahre in seiner heutigen weltberühmten Gestalt, Pöcking/Starnberg, 1997, ISBN 3-9802432-6-5
• Birgit und Rainer Stock: Der Biercomic. Die Geschichte vom Hofbräuhaus in München [der offizielle HB-Comic], Rottach-Egern: Stock, 1994, ISBN 3-00-013742-4. Es gibt aa a „boarische“ (ISBN 3-9810530-0-1) und englische (ISBN 3-9810530-2-8) Ausgob.

Im Netz

 Commons: Hofbräuhaus am Platzl – Sammlung vo Buidl, Videos und Audiodateien

• Hoamseitn vom Hofbräuhaus am Platzl
• interaktives Oidstod-Panorama
• Die Deutsche Welle über das Hofbräuhaus
• Hörfunkreportage der DW über das Hofbräuhaus, RealAudio-Format: 4' 16"
• Das Hofbräuhaus-Lied als MP3 - extrem leise ausgesteuert, daher ggf. nachbearbeiten

...