Gschicht vo Bayern

Der Artikl is im Dialekt Obaboarisch gschriem worn.

De Geschicht vo Bayern, aa Baiern oda Boarn, losst si zmindast bis ins Joar 555 n. Kr. zruckvafoign, bis zu de Uaspring vum Stammesherzogtum vo de Agilofinger mit Sitz z Freising. De Gschicht vum Boarischn Voik gäht no vui weida zruck.

De Schreibweis mid „y“ hod da boarische Kini Ludwig I. am 20. Oktoba 1825 eingfiat. Damid is de oide Schreibweis „Baiern“ oglest worn.

Im Joar 1918 is dann des Kinireich Bayern durch a Revolution gstiazt worn und da Kini Ludwig III. hod des Land volassn, hod oba zeitlems de Abdankung voweigat. Er hod lediglich in da Anifer Erklärung de Beamtn vom Treieid af sei Person entbundn.

Ibablick

In da Zeit vom remischn Koasa Augustus is Oidbayern, sidle vo da Doana, wo domois keltisch gwen is, a Tei vo da Provinz Raetia vom Remischn Reich worn.

Nochm Untagang vom remischn Reich hom vom Nordn her eingwandate Germanen zamma mit de romanisiatn Kelten Boier in Stamm vo de Baiern ('schaug Bajuwaren) buidt und de walsche Bevejkarung is langsam assimiliat worn.

Seit anno 555 is de Existenz vo am boarischn Stammesherzogtum belegt, des wo unta de Merowinga a Tei vom Franknreich worn is. Da Sieg vom Karl im Grossn iban Bayernherzog Tassilo III. anno 788 hod s End vom „ejtan Stammesherzogtum“ brocht.

Erscht durchn Niadagang vo de Karolinga san de boarischn Herzeg im „jingan Stammesherzogtum“ wieda sejbständiga worn.

Streidarein mit de Ottonen hom oba wieda zu oana Obhängigkeit vom deitschn Kini gfiat. Anno 976 is da Herzog Heinrich "da Zänka" vo seim Vetta im remisch-deitschn Kini und Koasa Otto II., noch am Aufstand ogsetzt worn. Bayern hod so fost de Hejftn vo seim Territorium valorn; vor oim Karntn und de italienischn Markn.

Ob 1070 is unte dena Welfen zu ana kurzzeitign Mochtvastärkung vo de boarischn Herzeg kema. Dann is oba zum Streit zwischn im Welfen-Herzog Heinrich im Lewen und im deitschn Kini Friedrich Barbarossa kema, des wo 1180 zum Sturz vo de Welfen gfihrt hod. Weite Tei vo Ostarrichi, im heitign Östareich, san vo Bayern obtrennt worn. In Rest vo Bayern hod da Otto I. vo de Wittelsbacher kriagt. So wor aa des "jingare Stammesherzogtum" Gschicht. De Wittelsbacher hom nacha bis 1918 in Bayern gherrscht.

In da Foigezeit is zu an Hauffa Toalunga vo Bayern in Oanzlherzogdima keman. Erscht mitm Primogeniturgsetz vo 1506 hod des aufghert.

In da Gegnreformation hod Bayern a fihrende Stejung ein und is ausm Dreissgjaarign Kriag mit Gebietsgewinn aussakuma. Anno 1623 is Bayern Kurfirschtndum worn.

Im Spanischn und Östareichischn Erbfoigekriag is Bayern a Zeitl vo Östareich bsetzt gwen.

In da Zeit vom Napoleon is Bayern am Ofang auf da Seitn vo Frankreich gstandn und hos so grosse Gebietsgewinne gmocht. Anno 1806 is Bayern Kinireich worn. Durchn Frontwexl auf de Seitn vo de Gegna vom Napoleon hod Bayern aufm Weana Kongress 1814, an grossn Tei vo de Gwinne bhoidn kina.

Da Kini Ludwig I. hod Minga zua Kunst- und Universitätsstod ausbaut. Im Valauff vo da Märzrevolution hod a 1848 zweng ana Affär mit da Tänzarin Lola Montez odankn miassn. Da Ludwig II. zweng seine Prochtbautn, wia z. B. Neischwanstoa, ois Märchnkini in de Gschicht einganga.

Im Preissisch-Deitschn Kriag hods fir Bayern anno 1866 auf da Seitn vom Deitschn Bund (= de estareichische Seitn) a Niadalog gegn Preissn gebm.

1871 is Bayern Tei vom nei grindtn Deitschn Koasareich worn, hod oba Sondarechte griagt, so gnennte Reservatrechte (ognas Post-, Eisnboh- und Heareswesn).

Anno 1918 is de Wittelsbacha Monarchie zammbrocha (Novemberrevolution). Am 9. Novemba 1918 is nacha da Freistoot Bayern ausgruafa worn. Revolutionäre, sozialistische Gruppm hom an Einfluss gwunna und hom in Voiksstoot Bayern und späda de Münchna Räterepublik ausgruafa. Anno 1923 hods in Minga in Hitlerputsch gebm, wo da Hitla scho an de Mocht keman hod woin.

Im Zwoatn Wejdkriag san boarische Städd wia Wiazburg, Minga oda Niamberg schwaa zasteat worn. Nochm Kriag wor Bayern vo de Amis bsetzt.

Anno 1949 is Bayern nacha a Bundesland vo da neigrindtn Bundesrepublik Deitschland worn.

Wichtige Datn: 555 n. Kr. - easchta Beleg vu an boarischn Herzogtum mit Sitz in Freising 788 - s End vum ejtan Stammesherzogtum 955 bis 976 - de greßte Ausdehnung vo Baiern bis an de Adria 1070 bis 1180 - de Regentschoft vo de Welfen (mid Untabrechungen) 1156 werd Baiern aufteit und Österreich a unobhangigs Heazugdum unta de Bamberga 1180 - s Ende vum jingan Stammesherzogtum 1180 bis 1918 - Regentschoft vo de Wittelsbacha 1255 - de easchte Teilung vo Baiern 1506 - de Wiedavereinigung vum Herzogtum 1623 - Baiern werd Kurfirschtentum 1777 - Baiern werd mid da Kuapfoiz vaeinigt 1806 - Baiern werd Kinireich; Tei vo Frankn, Schwobn und Östarreich kemman dazua 1866 - de Niedalog gegn de Preissn im Deitschen Kriag 1871 - Bayern werd Tei vum nei grindtn Deitschn Reich 1918 - s End vum Kinireich, Bayern werd Voiksstoot (Räterepublik) und nacha Freistaat 1919 - de Räterepublik wiad niedagschlogn 1933 - Bayern wead im Nationalsozialismus gleichgschoit 1946 - de Rheinpfoiz gäht valorn 1949 - Bayern werd Bundesland vo da Bundesrepublik Deitschland

Schau aa

Portal:Gschicht

Beleg

Da Text is teiweis a Ibasetzung vo de deitschn Wikipedia: Geschichte Bayerns.

Literatua

K. Bosl: Bayerische Geschichte. Minga 1979.
P. C. Hartmann: Bayerns Weg in die Gegenwart. Vom Stammesherzogtum zum Freistaat heute. Regnschburg, 2. Auflog 2004.
A. Kraus: Geschichte Bayerns. Von den Anfängen bis zur Gegenwart. Minga 3. Aufl. 2004 (EA 1988)
E. Rosenthal: Geschichte des Gerichtswesens und der Verwaltungsorganisation Bayerns. Wiazburg 1889.
Philip M. Soergel: Wondrous in His Saints. Counter-Reformation Propaganda in Bavaria. Berkeley 1993.
Max Spindler (Hrsg.): Handbuch der bayerischen Geschichte. 4 Bände in 7 Teilbänden, 2. Aufl., Minga 1981 ff.
U.-B. Vollhardt: Geschichtspolitik im Freistaat Bayern. Das Haus der Bayerischen Geschichte: Idee – Debatte – Institutionalisierung. Minga 2003, ISBN.

Im Netz

Virtual Library Geschichte: Bayern (wichtige Linksammlung)
De Rema in Bayern
Dr. Martin Pietsch, Via Julia - De Bedeitung vo de Rema fia Bayern
Bayerische Landesbibliothek Online
Haus der Bayerischen Geschichte: Geschichte Bayerns - in sechs Sprochn
Haus der Bayerischen Geschichte: Buidarchiv: Boarische Gschicht
Haus der Bayerischen Geschichte: Projekte iwa de Boarische Gschicht
Online-Publikation: Politische Gschicht vu Bayern
@2 (Seite nicht mehr abrufbar; Suche in Webarchiven) Historisches Lexikon Bayerns]