Michael Pfleghar

Dialäkt: Schwäbisch

Dr Michael Pfleghar (* 20. Merz 1933 z Stuegert, † 23. Juni 1991 z Dissldorf) ischt a deitscher Film- ond Show-Regisseur, Drehbuachautor ond Fernsehproduzent gwäa.

Aus seim Leaba

Dr Michael Pfleghar ischt am 20. Merz 1933 z Stuegert als Soh vo-ma Fabrikanda uff d Welt komma. Nôch seira Schualzeit hôt’r zerscht a Ausbildong zom Cutter gmacht. 1954 isch’r Regie-Assischdent beim dômôliga Siddeitscha Rondfonk (heit Sidweschtrondfonk wôrra ond bald druff zom Fernseh-Regisseur uffgschdiiga. Wia gega Ende vo de 1950er Jôhr sei Mentor Helmut Jedele zo dr Bavaria Film en dr Nähe vo Mincha ganga ischt, hôt der da Pfleghar mitgnomma. Bei sellra Film-Firma ischt’r schliaßlich vo 1959 bis 1963 als Obrschbiilleiter eigsetzt wôrra. Dô drnôch hôt sich dr Pfleghar selbstendich gmacht ond als freier Mitarbeiter fir vrschiidene Fernsehsender nuie Show-Format entwicklet.

1967 hôt dr Pfleghar en de USA d Regie gfihrt fir a Musik-Fernseh-Special, wo schbätr mit-ma Preis bedenkt wôrra ischt: A Man and His Music plus Ella plus Jobim fir da Frank Sinatra mit dr Ella Fitzgerald ond-em Antonio Carlos Jobim. Mit-em Sinatra seira jengschda Tochter Tina hôt’r gega End vo de 1960er Jôhr a Zeitlang z Mincha zammagleabt. Ab 1970 hôt’r ondr andrem fenf Folga vo dr omstriddena ZDF-Show Wünsch Dir was inszeniirt ond 1973 dui dômôls ganz neiartiga Fernsehserie Klimbim ens Leaba gruafa, wo bis 1979 erfolgreich ibr da Bildschirm gflimmret ischt. Fir oi Folge vo dera Serie hôt dr Pfleghar ondra-ma Vorwand sein Freind Günter Netzer ens Studio glockt, wo dr sell als Heino-Imitator hôt ufftredda miaßa.

Em Jôhr 1989 hôt dr Michael Pfleghar zamma mit dr Ursula Pfeiffer da gemeinnitziga Vorei LOBBY FÜR KINDER grendet. Der exischdiirt heit noh. Als Schirmherr fungiirt dr frihere boirische Minischtrpräsident Günther Beckstein.

Dr Pfleghar isch dreimôl vrheiradet gwäa, jedes Môl mit-ra Schlagrsengere: Zerscht mit dr Deitscha Inge Brück, nô mit dr Schwedin Bibi Johns ond schliaßlich noh mit dr Norwegere Wencke Myhre. Aus dr Ehe mit sellra isch dr gemeinsame Soh Michael (* 1982) hervorganga. A weidrs Kend vo-nem, a Dochter namens Manon (* 1965), stammt us-ra Liabesbezihong mit dr Schweizer Filmemachere ond Schritstellere Corinne Pulver.

Dr Pfleghar ischt ondr andrem mit-em hollendischa Publizischda Hubert Maessen befreindet gwäa. Dr sell hôt-em 1991 fir d Dauer vo-ma TV-Projekt sei Wohnong en Dissldorf zr Vrfigong gschdellt. Deet hôt sich dr Pfleghar am 23. Juni vrschossa. Beigsetzt wôrra ischt’r em Familiagrab uff-em Waldfriidhof en Stuegert.

Auszoichnonga

• Rose von Montreux fir sei Show Zu jung, um blond zu sein (1963)
• Dr Grimme-Preis en Silbr fir d Serie Klimbim

Seine Werk Film, Seria ond Shows

Film

• 1958: Kennen Sie die Milchstraße? D Vorfilmong vo dr gleichnamiga Komeede vom Karl Wittlinger firs Fernseha.
• 1963: Die Tote von Beverly Hills D Vorfilmong vom gleichnamiga Roman vom Curt Goetz, au am Drehbuach hôt’r mitgschriiba.
• 1964: Serenade für zwei Spione, au dô hôt’r am Drehbuach mitgschriiba.
• 1966: Bel Ami 2000 oder Wie verführt man einen Playboy, au bei sellem Film hôt’r am Drehbuach mitgschriiba.
• 1967: Das älteste Gewerbe der Welt, vo sellem Schbiilfilm isch de 4. Episod vom Pfleghar (La belle époque – Fräulein Nini)
• 1972: München 1972 – 8 berühmte Regisseure sehen die Spiele der XX. Olympiade – Teil 4: Die Frauen (Dokumentarfilm)

TV-Seria

• 1969: Romeo und Julia 70
• 1973 bis 1979: Klimbim
• 1978: Zwei himmlische Töchter und Die Gimmicks
• 1980 bis 1981: Susi (fenf Doil)
• 1988 bis 1990: Showgeschichten
• 1991: Die lieben Verwandten
• 1992: Tücken des Alltags

TV-Shows

• 1960: In 80 Takten um die Welt
• 1961: Zu jung, um blond zu sein
• 1964: Bonsoir, Kathrin!
• 1964: Die große Show von Tokio
• 1966: Es funkeln die Sterne - Zu Gast bei Caterina Valente
• 1967: With Love, Sophia
• 1967: Frank Sinatra: A Man and His Music plus Ella plus Jobim
• 1968: Monte Carlo: C'est La Rose
• 1969: Caterina from Heidelberg
• 1970: Wünsch Dir was (5 Folga)
• 1970: Music Tropical
• 1970: Jumbo - Ein Elefantenleben
• 1971: Perlico - Perlaco
• 1972: Jules und die olympischen Geister
• 1972: Sommersprossen
• 1979: Wencke, Udo und der blaue Diamant
• 1985: Ein Lied für Göteborg
• 1986: Die Zukunft hat Geburtstag – 100 Jahre Automobil
• 1987: Top Kids
• 1988: Durch Dich wird diese Welt erst schön
• 1990: Rolle vorwärts

Weblink

Michael Pfleghar in de Internet Movie Database (änglisch)

Dä Artikel basiert uff ere fräie Übersetzig vu dere Version vum Artikel „Michael_Pfleghar“ vu de dütsche Wikipedia. E Liste vu de Autore un Versione isch do z finde.