Jean-Baptiste Charles Bouvet de Lozier

E Chupferstich vom Jean-Baptiste Charles Bouvet de Lozier

Dr Jean-Baptiste Charles Bouvet de Lozier (* 14. Januar 1705 us dr Gegend um Pleudihen-sur-Rance; † 1786 z Saint-Malo) isch e franzöösische Seefaarer und Forscher gsi.

Lääbe

Er het Navigazion studiert und isch 1731 Lütnant in dr franzöösische Indiekompanii, dr Compagnie des Indes, worde. 1733 het er dr Compagnie en Expedizioon vorgschlaage mit ere Fregatte und eme gröössere Handelsschiff, zum in dr Südsee Land go finde, wo die äigene Ostindiefaarer chönnte benütze. Er het au verlangt, ass äär sälber Guvernöör vo alle sine zuekümftige Entdeckige wurd si.

Am 19. Juli 1738 isch er mit dr Aigle und dr Marie vo Lorient us in See gstoche und het uf d Santa Catarina Island vor dr Küste Brasilie gstüürt. Dört isch er im Oktober aachoo, het sich wider usgrüstet und isch e Moonet spööter gege Südoste gseeglet. Im Dezämber isch er am 45. Bräitigrad gstande, het aber nume en Iisbärg gsee und spööter no Pinguine, won er von ene gschriibe het, ass si wie Änte wurde usgsee, aber mit Flosse.

Ändi Dezämber isch er im Südatlantik zwüsche Iisbärg, 1600 Mäilen äwägg vo jedem bewoonte Land. Am 1. Januar 1739, am drei am Nochmiddag isch e „seer hoochs Land mit Schnee druf“ us em Nääbel erschiine. Er het s für e Vorgebirg vom Südkontinänt ghalte und het em dr Name Cap de la Circoncision gee, wil s dr Daag vo dr Beschniidig vom Jesus gsi isch.

D Rute vo dr Räis vom Charles Bouvet

Zwölf Daag lang het er brobiert z lande und isch denn witer gege Oste gseeglet. Wil aber si Mannschaft vom Skorbut befalle gsi isch, het er müesse ufgee. Am 24. Februar isch er am Kap vo dr Guete Hoffnig aachoo und am 24. Juni isch er wider z Lorient gsi. Sine Ufdraggääber het er verzelt, ass es e Südkontinänt zum Pol aane müess gee, wo mä sich nid chänn versorge.

Är sälber isch vo sinere Faart entdüscht gsi, aver d Lüt häi en bewunderet und geert. Er isch zwäimol, 1750–1752 und 1757–1763, Guvernöör vo Réunion und 1750–1756 vo Mauritius worde. S Land, won er entdeckt het, het spööter dr Naame Bouvet-Insle überchoo; äins vo de Kap im Norde vo dr Insle häisst Kap Circoncision.