Oblast

Oblast (Russies en Oekraïens: область, Wit-Russies: вобласць of вобласьць; Tsjeggies: oblast; Slowaaks: oblasť, Bulgaars: област; Kazachs: облысы of oblısı) is ’n soort deelgebied of administratiewe eenheid in 'n aantal Slawiese lande (Russiese Federasie, Oekraïne, Belarus en Bulgarye) asook Kirgistan en Kasakstan, twee voormalige republieke van die Sowjetunie.

Die woord "oblast" is ’n leenwoord in Afrikaans, maar word ook dikwels vertaal as "gebied", "sone", "provinsie" of "streek". Laasgenoemde vertaling kan misleidend wees, want ’n subdivisie van ’n "oblast" word ’n "rajon" genoem, wat as "streek" of "distrik" vertaal kan word, afhangend van die konteks.

Oblaste van Rusland

Volgens Rusland se grondwet is oblaste "federale liggame (soebjekti)" van die federasie. Dit is ’n hoër status as die administratiewe eenhede van die Russiese republiek in die tyd van die Sowjetunie. Die federale status gee die oblaste ’n sekere mate van outonomie asook verteenwoordiging in die Federasieraad van Rusland.

Rusland word opgedeel in 85 deelgebiede, waarvan 47 oblaste is:

1. Amoer 2. Archangelsk 3. Astrachan 4. Belgorod 5. Brjansk 6. Tsjeljabinsk 7. Tsjita 8. Irkoetsk 9. Iwanowo 10. Kaliningrad 11. Kaloega 12. Kemerowo 13. Kirof 14. Kostroma 15. Koergan 16. Koersk

17. Leningrad-streek 18. Lipetsk 19. Magadan 20. Moskou-streek 21. Moermansk 22. Nizjni Nowgorod 23. Nowgorod 24. Nowosibirsk 25. Omsk 26. Orenburg 27. Orjol 28. Penza 29. Pskof 30. Rostof 31. Rjazan 32. Sachalin

33. Samara 34. Saratof 35. Smolensk 36. Swerdlofsk 37. Tambof 38. Tomsk 39. Twer 40. Toela 41. Tjoemen 42. Oeljanofsk 43. Wladimir 44. Wolgograd 45. Wologda 46. Woronezj 47. Jaroslawl