Choctaw
| Choctaw | |
|---|---|
 Portrette van bekende Choctaw-persoonlikhede | |
| Totale bevolking: | 160 000 |
| Belangrike bevolkings in: |  Verenigde State(Oklahoma, Kalifornië, Mississippi, Louisiana, Texas, Alabama) |
| Taal: | Engels, Choctaw |
| Geloofsoortuiging: | Protestantse en Rooms-Katolieke Christene, tradisionele gelowe |
| Verwante etniese groepe: | Chickasaw, Muscogee (Creek), later Seminole |
Die Choctaw (ook gespel as Chahta, Chactas, Tchakta, Chocktaw en Chactaw) is 'n inheemse Amerikaans-Indiaanse etniese groep wat oorspronklik gebiede in die suidooste van die Verenigde State (die huidige deelstate Mississippi, Florida, Alabama en Louisiana) bewoon het. Hul taal, ewenens Choctaw genoem, maak deel uit van die Muskogee-taalfamilie.
Die Choctaw is nakomelinge van Indiaanse volke wat deel uitgemaak het van die Hopewell- en Mississippi-beskawings in die oostelike Mississippiriviervallei en langs sy takriviere. 'n Belangrike argeologiese nalatenskap van die Hopewell-beskawing, die groot mensgemaakte Nanih Waiya-aardeheuwel wat sowat 1 700 jaar gelede ontstaan het, word deur die Choctaw as die bakermat van hul volk beskou en steeds as heiligdom vereer. Die heuwel is in 2008 aan die Mississippi Band of Choctaw Indians, een van die Choctaw-stamme wat deur die federale regering amptelik erken word, teruggegee.
Vroeë Spaanse verkenners het teen die middel van die 16de eeu op Choctaw-gemeenskappe van die Mississippi-beskawing afgekom wat in dorpe gehuisves en deur hoofde geregeer is. Volgens die antropoloog John Swanton het die Choctaw hul naam van een van hul vroeë leiers afgelei, terwyl die geskiedkundige Henry Halbert dit as 'n afleiding van Hacha hatak beskou, die Choctaw-term vir "riviervolk".