Avery Fisher

Avery Fisher
Gebore	Avery Robert Fisher 4 Maart 1906 Brooklyn, New York
Sterf	26 Februarie 1994 (op 87) New York
Nasionaliteit	Verenigde State
Beroep	uitvinder, ondernemer, musiekgeesdriftige en filantroop
Bekend vir	transitoriese versterker, stereo-radio-grammofoon, filantropie

Avery Robert Fisher (* 4 Maart 1906 in Brooklyn, New York; † 26 Februarie 1994 in New York) was 'n Amerikaanse uitvinder, ondernemer, musiekgeesdriftige en filantroop wat 'n groot bydrae tot die tegniese ontwikkeling van verbeterde lewensgetroue klankweergawe gelewer het. Sy tegniese prestasies in die hoëtroubedryf sluit onder meer getransistoriseerde versterkers en die stereo-radio-platespeler in.

Vroeë lewe

Avery Fisher is in Brooklyn, New York gebore. Hier het hy die DeWitt Clinton-hoërskool bygewoon en in 1929 'n akademiese graad aan die Universiteit van New York verwerf. Hy was aanvanklik twee jaar lank in die uitgewersbedryf werksaam en het in hierdie tyd as geesdriftige amateur-vioolspeler met klankontwerp en akoestiek begin eksperimenteer.

In 1937 het hy sy eerste onderneming, Philharmonic Radio, gestig. In 1945 het Fisher hierdie maatskappy verkoop om 'n tweede oudio-onderneming, Fisher Radio, te begin wat produkte van buitegewone gehalte en klankkwaliteit onder die handelsmerk The Fisher bemark het.

Latere prestasies

Die Fisher 500 (TA500), Fisher se eerste HiFi ontvanger (1957)

In die 1950's het Fisher die getransistoriseerde versterker en die eerste stereo-radio-platespeler ontwikkel. Met hierdie tegniese deurbrake het Fisher opslae in die hoëtroubedryf gemaak en ook groot ekonomiese sukses behaal. Tussen 1959 en 1961 het hy ook belangrike tegniese verbeterings aan die ontwerp van AM-FM-stereo-radio-ontvangers aangebring.

Fisher se onderneming is in 1969 vir VSA-$ 31 miljoen deur Emerson Electric Company oorgeneem wat dit op hulle beurt aan die Japannese vervaardiger Sanyo verkoop het. Avery Fisher was sowel vir Emerson asook vir Sanyo as konsultant werksaam.

Fisher het sy lewensukses steeds as weldoener met ander gedeel. Hy was 'n raadslid vir die Philharmonic-Symphony Society of New York en The Chamber Music Society of Lincoln Center.

Avery Fisher is op 26 Februarie 1994 op die ouderdom van 87 in New York oorlede nadat hy 'n beroerte gehad en komplikasies ingetree het.

Nalatenskap

Vandag staan Avery Fisher veral bekend vir die ouditorium in Manhattan se kulturele kompleks Lincoln Center wat sy naam dra. Die Avery Fisher Hall huisves naas 'n verskeidenheid kulturele en musikale ensembles ook die Philharmonic-Symphony Society of New York (kort New York Philharmonic genoem). Die ouditorium is in 1973 na Fisher vernoem nadat hy 'n skenking van VSA-$ 10,5 miljoen aan die New York Philharmonic gemaak het.

Fisher het 'n reputasie vir beskeidenheid gehad. John Mazzola, die bestuurder van die Lincoln Center, moes Fisher eers oorreed om sy toestemming vir die hernoeming van die Philharmonic Hall te verleen. Fisher het opgemerk dat niemand aandag aan sulke dinge sou skenk nie en gevra: "Wie is Major Deegan?" ('n verwysing na die Major Deegan-snelweg).