Skid Row

C'l artìcul chè 'l è scrit in Miranduléś

«

Ricky was a young boy, he had a heart of stone, lived 9 to 5 and worked his fingers to the bone, just barely got out of school, came from the edge of town, fought like a switchblade so no one could take him down, he had no money, oooh no good at home, he walked the streets a soldier and he fought the world alone and now it's 18 and life you got it, 18 and life you know, your crime is time and it's 18 and life to go.»

(EN)(18 & Life, 1989)

«

Ricky 'l éra 'n ragasōl, al gh'iva un cōr ad préda, al vivìva da 9 óri a 5 óri e al lauràva frustànd-'s i dî in fiṅ a i òs, a fadìga 'l iva finî la scóla, al daśvgnìva da 'l burgàdi dla sità, al cumbatìva cuma 'n curtèl a scat e ninsòṅ a psiva butàr-'l a tèra, al n gh'iva briśa di bèsi, ooh a cà al s la pasàva mâł, al giràva p'r al stradi da suldâ e al cumbatìva da par lò, e ades al gh'à 18 an e na vita ta gh l'à, 18 an e la vita, ta 'l sà, al tò crìmin 'l è 'l tèmp e i èṅ 18 an e na vita p'r andàr via.»

(MUD)

I Skid Row (Basfónd in dal gèrg americàṅ) i èṅ un grup hard rock americàṅ mis sù a Toms River (New Jersey) in dal 1986. I èṅ stâ òṅ di ùltim grup hair metal a muciàr sù 'n sucès bèl grôs prima dla vgnuda dal gènar grunge in di prim an Nuànta. I lōr prim dū lavōr (Skid Row dal 1989 e Slave to the Grind dal 1991) i èṅ stâ anc quéi ch'i aṅ vindû da piò.

Biugrafìa

Gl'inìsi

I Skid Row i nàs'n in dal 1986 par mèrit dal chitarìsta Dave Sabo dit The Snake (La Bisa), vèć amìg e cumpàgn ad scóla ad Jon Bon Jovi, e dal basìsta di Godsend Rachel Bolan (nóm vēra James Southworth), ch'l iva tòlt al cugnóm in unōr dal cantànt di T. Rex, Marc Bolan. P'r impinìr al grup, i dū i sarnìsan pò anc al chitarìsta Scotti Hill, ch'al sunàva pròpria cun Bolan, e al baterìsta Rob Affuso.

Al nóm dal grup in ingléś al s fà riferimènt a na via malfamàda e in ruìna, da spés pîna ad pòvra gint, imbariàga e drugàda. A 'l inìsi di an Stanta a gh'éra 'n àtar grup cun al nóm ad Skid Row fat da Phil Lynott e da Gary Moore prima che lì lōr i dìsan vita a i Thin Lizzy. Ma a Snake e Rachel a gh piaśìva dimóndi cal nóm lè e alóra i ìvan decìś ad cumpràr-al diretamènt da Gary Moore par 35.000 dòlar.

A 'l grup a gh calàv' adès sōl al cantànt ma i gh'ìvan da pascàr-'l in présia parchè al mànager di Bon Jovi e di Mötley Crüe, Doc McGhee, al s éra dit interesâ a lauràr sèg. Dòp soquànt tintatìṿ andâ mâł (John Corabi, in séguit cun i Ratt e i Mötley Crüe, Robert Mason, Richard Black) i tōśan prima Matt Fallon, ex di Anthrax, e pò Joey D'Angeli ma sōl par dū méś.

I Skid Row in cal mèntar i ìvan bèla prònt dimóndi materiàł da métar sù in dal disc ad dèbut e finalmènt al cantànt al vèṅ catâ in Sebastian Bach. Chi lò 'l éra 'n canadéś ch'al s ciamàva Sebastian Philip Bierk e 'l éra nâ a Freeport in dal Bahamas. 'L iva sarnî al cugnóm ad batàja da 'l cumpuśidōr tedésc a quind'ś an parchè Bierk al sunàva dagnóra cumpàgn a Jerk (ch'in ingléś a vōl dir Minciòṅ, Daśgustóś) e anc parchè Johann Sebastian Bach 'l éra nâ pròpria tarśènt an prima.

A gh'éra però un prubléma: Sebastian 'l éra impgnâ incóra cun al sò vèć grup, i Madame X, e al sò mànager al vliva 200.000 dòlar par mulàr-al. Par furtùna dal grup dal New Jersey, Jon Bon Jovi al s éra tòlt a cōr al caś, esénd amìg ad Sabo, e par cal mutìṿ lè al tira fóra lò i bèsi par tōr al cantànt p'r i Skids e par registràr ad nóṿ e méj di demo. Mis sóta cuntràt par la sò cà discugràfica Underground Music Company, i Skid Row i èṅ finalmènt prònt p'r incìdar 'l àlbum ad debùt.

Skid Row

Skid Row a véd la luś finalmènt al 24 ad Śnar dal 1989 par l'Atlantic Records, rivànd a 'l sèst pòst dla Billboard 200 americàna (sinc disc ad plàtin in di sōi Stat Unî), cuciâ in élt da sìngui ad sucès cuma 18 & Life, un lènt ch'al dascór dla vita véra dal śōv'n arvèrs Ricky cundanâ a 'l ergàstul p'r avér masâ par śbali 'n sò amìg, la rabìda Youth Gone Wild, 'n inn da sigàr a bòca vèrta in di cuncèrt, la dōlsa I Remember You e Piece Of Me, cgnusùda p'r al sò gir ad bas. 'L àlbum al fà védar ciàr e tónd quél ch'al sarà al stîl muśicàl dal grup, un street rock selvàdag e melòdic, davśèṅ a 'l heavy metal e a 'l hair metal.

In d'l Agóst dal 1989 al mànager McGhee (ch'l éra stâ cundanâ a sinc an ad parśòṅ p'r avér fat vgnir dèntar in di Stat Unî daśdòt chilo ad marijuana in dal 1982) al dà vita a 'n fèstival muśicàl ad dū dè a Mósca cóntar la dròga, ciamâ "Make A Difference peace festival" e al grup a gh và a sunàr insém a di àtar pès da nuànta dal rock pēś cuma Bon Jovi, Scorpions, Ozzy Osbourne, Mötley Crüe, Cinderella e i rus Gorky Park.

I Skid Row i partìsan pò p'r un tour mundiàl c'n i Mötley Crüe (al 18 'd Utóbar i eṅ a Milàṅ) e in séguit cun gl'Aerosmith. Durànt la data dal 27 ad Dicémbar dal 1989 a Springfield (Massachusetts), prima dal braṅ Piece Of Me, un spetadōr al tira na butìglia in fàcia a Sebastian ch'al pèrd la tèsta e ch'al gh l'armànd' indrē ciapànd però in dal grugn na śuvnòta a 'l sò pòst, faghénd-ag un brut taj. Incasâ négar e c'n al Diav'l adòs, al cantànt al s butà anc śò in mèś a 'l pùblic tacànd a dar di casòt.

Al filmâ ad quél ch'l éra sucès al finìs pò in dla caséta vìddeo 'd Oh Say Can You Scream dal 1990 e al cantànt lè al dà la sò versiòṅ di fat. Al filmâ pustâ in sal YouTube

Bach al finìs in parśòṅ e 'l è custrét a pagàr 15.000 dòlar ad risarcimènt. Al guèran canadéś, da 'l cant suo, al decìd ad pruibìr-ag par tri an 'l ingrès in dal sò paéś. Ma i prubléma par lò i n finìsan minga chè: al cantànt al finìs in si giurnài par na majéta ch'al gh'iva pasâ 'n sò fan in du a s vdiva insìma la scrita „AIDS Kills Fags Dead“ (’L AIDS al cópa i fnòć). Sebastian 'l è custrét a dmandàr pardòṅ in un prugràma 'd MTV.

«

Since I was born they couldn't hold me down, another misfit kid, another burned-out town, never played by the rules I never really cared, my nasty reputation takes me everywhere. I look and see it's not only me, so many others have stood where I stand, we are the young so raise your hands. They call us problem child, we spend our lives on trial, we walk an endless mile, we are the youth gone wild, we stand and we won't fall, we're the one and one for all, the writing's on the wall, we are the youth gone wild. Boss screamin' in my ear about who I'm supposed to be, getcha a 3-piece Wall Street smile and son you'll look just like me, I said "Hey man, there's something that you oughta know, I tell ya Park Avenue leads to Skid Row"!»

(EN)(Youth Gone Wild, 1989)

«

Da quànd a sòṅ nâ i n gh l'aṅ mai cavàda a tgnìr-um schis, a séra 'n àtar pés fór' 'd àqua, 'n àtar laśaròṅ, a n ò mai tgnû a drē a dal règhli ch'i n m aṅ mai fargâ gnint dabòṅ, la mè bruta reputasiòṅ la m pòrta dapartùt. A m guàrd 'd intóran e a véd ch'a n sòṅ briśa da par mè, dimóndi àt'r i èṅ cumpàgn a mè, nuàt'r a sém i śōvan alóra léva sù 'l maṅ. I s ciàman baghét dificìi, a vivém ad patimènt, a girém in na strada sénsa fîṅ, a sém la śuventù selvàdga, a tgném dûr e a n s butarém mai śò, a sém ùnic e ùnic par tut, a 'l scrivém in si mur, a sém la śuventù selvàdga. Al padròṅ al m siga in di uréci quél ch'a gh'arév 'd èsar, tó-'t un vistî da duturòṅ, rid e ragàs at sarà pròpria cuma mè, a gh'ò dit "Vê umàsa, a gh'è 'n quél ch'at gh'arév da savér, a t dig ch'al Parc Avenue al pòrta drit a i basfónd"!»

(MUD)

Slave To The Grind

'L 11 ad Śugn dal 1991 al grup al fà catàr in di negòsi al secónd àlbum Slave To The Grind (Sćiàv dal lavōr pēś), un lavōr dimóndi più rabî, rûd e pēś dal precedènt ma ch'al gh la cava a finìr listés a 'l prim pòst in dla clasìfica americàna. La cupertìna dal disc l'è stada fata p'r al pàdar ad Sebastian, al pitōr David, ch'l iva tòlt ispirasiòṅ da 'n quàdar ad Caravàǵ , Al saplimènt dla Santa Lusìa dal 1608.

Dal disc a gh 'n è dū versiòṅ: una minga cinsuràda cun dènt'r al braṅ Get The Fuck Out (Tira fóra 'l cas) e una c'n al braṅ più "alśēr" Beggar's Day (Al dè dal barbòṅ). I sìngui i èṅ quàtar: Monkey Business, Slave to the Grind, Wasted Time e In a Darkened Room.

Vist al sucès clamuróś, al grup al vèṅ sarnî da i Guns N' Roses p'r al tour americàṅ mènt'r in Itâglia i Skid Row i s pòrtan sèg gl'L.A. Guns a Milàṅ e a Firénse.

«

I never wanted to be president 'cause it's nothin' but an ego trip, yeah, I didn't want your education 'cause it's nothin' but a pile of shit, you bore me to death, so shut up for God's sake! Stop readin' me the riot act while my brains are still intact, you say it's raining but you're pissin' down my back, so stop readin' me the riot act!»

(EN)(Riot Act, 1991)

«

A n ò mai vlû èsar 'n presidènt parchè a n è àtar ch'un viàś in d'l égo, sè, a n ò mai vlû la vòstra educasiòṅ parchè la n è àtar ch'un muć ad pét, ta m fiàc a mòrt alóra taśi 'd un Dio! Muclâ ad far-um di predicòs in fiṅ tant ch'al mè sarvèl 'l è incóra bòṅ, a dgiv ch'l è drē a piōvar ma a sî vuàtar ch'a sî drē a pisàr-'m adòs in dla schina, alóra muclâ ad far-um di predicòs!»

(MUD)

Al grup al cuntìnua incóra a sunàr in gir p'r al mónd cun i Love/Hate, i Scorpions, gl'Iron Maiden e i Pantera.

B-Side Ourselves

Al 22 ad Setémbar dal 1992 i Skid Row i daṅ vita a 'n EP ad còver ad grup ch'i gh'aṅ dâ ispirasiòṅ. Al tìtul dal disc 'l è B-Side Ourselves, un lavōr ch'al mét insém sinc braṅ: Psycho Therapy di Ramones (cun Rachel Bolan a la vóś), C'Mon And Love Me di Kiss, Delivering the Goods di Judas Priest (cun Rob Halford ch'al fà a gara cun Sebastian Bach a chi siga da piò di dū), What You're Doing di Rush e Little Wing ad Jimi Hendrix.

Par 'l ucaśiòṅ a vèṅ fat un sìngul ad Delivering the Goods insém a Youth Gone Wild. Al CD al finìs a 'l 22śum pòst dal clasìfichi ingléśi.

In cal mèntar Bach al sa spóśa cun la sò muróśa Maria Aguiar, in dal Luj dal 1992.

«

When I'm sad, she comes to me with a thousand smiles, she gives to me free, It's alright she says it's alright, take anything you want from me, anything, fly on little wing.»

(EN)(Little Wing, 1992)

«

Quànd a sòṅ śò, lē la vèṅ da mè a rigalàr-um mila surìś, a và tut bèṅ, la diś, a và tut bèṅ, tó da mè quél ch'at vō, quél ch'at pâr, incòsa, tó 'l vōl ala pìcula.»

(MUD)

sUBHUMAN rACE

In dal 1995 i rapòrt intér'n a 'l grup i tàcan però a 'ndàr a gamba a 'l élta, anc p'r al fat ch'al grunge di Nirvana 'l éra drē a catàr dimóndi spasi in cal méntar miténd in śnòć 'l hard rock dla fiṅ di an Utànta. Foravìa i Skid Row al 28 ad Mars i vènan fóra cun quél ch'a dvintarà 'l ùlt'm àlbum in studi cun Sebastian Bach a la vóś e Rob Affuso da drē da la batarìa, Subhuman Race (Rasa 'd sóta d'l umàṅ) ch'al sa śluntàna 'n pôc da i prim dū lavōr ch'i gh'ìvan purtâ al sucès. Anc chè in cupertìna i s càt'n i diségn ad David Briek, ch'i pàran ispirâ a 'l Infèran ad Dante Alighieri.

Sóta la prudusiòṅ ad Bob Rock, quél dal Black Album di Metallica, al grup al s impinìs asè ad sòṅ tìpic d'l alternative metal, tgnénd a drē a di grup quài Red Hot Chili Peppers, Pantera e Antrhax, anc se sunâ in na manéra dimóndi più péśa, cuma a s pōl sintìr in dal prim sìngul My Enemy o in di braṅ Frozen, Subhuman Race, Medicine Jar e in dla rabìda Bonehead. I s dastàc'n i sìngui Into Another e 'l lènt Breakin' Down, scrita da Sabo pinsànd a Wasted Time.

Anc s'al disc al gh la cava a rivàr a 'l 35śum pòst dla Billboard 200 (al fà incóra méj in Austràglia, Régn Unî e, cuma 'l sòlit, in Giapòṅ in dua al finìs sèst) e a dvintàr disc 'd òr, a s trata 'd un mèś pas fals cunfruntànd-al c'n i dū precedènt.

«

What was it you once said that there would be things in life that couldn't be, not for a second did I believe you, not for a minute did I believe that. Within your need you lie alone, this empty space you call your home, if you just let me in I wouldn't let you break down, I'm breakin' down as if you thought the rain could wash away the day and could heal you.»

(EN)(Breakin' Down, 1995)

«

'T à dit na vòlta che sèrti ròbi i n pōlan minga sucédar in dla vita, a n t ò cardû gnanc p'r un secónd, a n gh'ò cardû gnanc p'r un minùt. Ta stà lè da par tè tgnénd-at dènt'r incòsa, in cal spasi chè vōd che tè 't ciàm cà, se sōl ta m fsis vgnir dèntar a n lasarév briśa ch'at t ruinàs, mè a sòṅ drē a ruinàr-um cuma s'a pinsìs ch'la piōva la pòsa lavàr via 'l dè e guarìr-at.»

(MUD)

P'r al marcâ giapunéś a vèṅ vindû un disc pìcul dal viṿ, Subhuman Beings on Tour!!, cun dèntar siē pès.

Anc s'i cuncèrt i càtan sù dimóndi spetadōr (al grup 'l éra partî par na tournée insém a i Van Halen e i ìvan anc sunâ da 'l nòstri bandi a 'l Vidia Club ad Siśèna), in dal 1996 i Skid Row i decìdan ad suspénd'r-as, ma minga prima che Sebastian Bach al fus mis a 'l us.

Par Sebastian Bach, un metalàr dabòṅ ch'al gh'à al rock inciuldâ in dl'anma, la stòria c'n i Skid Row la finìs lè. Dòp dū disc c'n al grup super di The Last Hard Men, al cantànt canadéś al cuntìnua da par lò, faghénd vgnir fóra tri àlbum a partìr da 'l 1998: Bring 'Em Bach Alive!, Angel Down e Kicking & Screaming.

«

Well, the real real reason I left was because of some very nasty messages on their answering machine one night when they didn't want to open for Kiss on New Years Eve, 1996. They asked us to play the Meadowlands on their reunion tour. Rachel didn't want to do it because he was busy with his punk band side project playing with his punk band that was made up of Skid Row's road crew. In my honest opinion, that was not a good enough reason for me, and I let him know it, in no uncertain terms and that was it.»

(EN)(Sebastian Bach intervistâ par Celebrity Cafe in dal 2000)

«

Beh, al mutìṿ véra ch'al m à fat andàr via 'l è par sèrti rispustàsi ch'a iva lasâ na nòt in dla lōr segreterìa dal telèfun quànd i n vlìvan minga vèrar p'r i Kiss in ucaśiòṅ dal Cavdàn dal 1996. Chi lōr i s ìvan dmandâ ad sunàr a 'l Meadowlands in dal tour ch'i i mitìvan incóra insém. Rachel 'l éra cuntràri parchè 'l éra impgnâ cun la sò punk band persunàla fata da di road crew di Skid Row. A mè giudìsi, quàl lè al n éra briśa 'n mutìṿ vàlid e al gh 'l ò dit ciàr e tónd, sénsa gir ad paròli. L'è andàda acsè.»

(MUD)

Anc Rob Affuso al s in và. Dòp avér sunâ cun i Ozone Monday in dal 1998, al baterìsta al decìd pò ad dar-'g un taj cun la mùśica, tacànd a lauràr in n'aśiénda ch'la tîṅ a drē a i afâr. 'L à anc cumprâ un sit davśèṅ a New York in dua al tira sù di cavài.

Mémbar

Quéi 'd adès

Johnny Solinger vóś (1999-incō)
Dave "The Snake" Sabo chitàra (1986-incō)
Scotti Hill chitàra (1987-incō)
Rachel Bolan bas (1986-incō)
Rob Hammersmith baterìa (2010-incō)

Ex cumpunènt

Matt Fallon vóś (1986-1987)
Joey D'Angel vóś (1987)
Sebastian Bach vóś (1987-1996)
Rob Affuso baterìa (1987-1996)
Phil Varone baterìa (1999-2004)
Dave Gara baterìa (2004-2010)

Discugrafìa

Àlbum

Racòlti

Da 'l Viṿ

1995 - Subhuman Beings on Tour!!

EP

1992 - B-Side Ourselves

Sìngui

1989 - Youth Gone Wild
1989 - 18 and Life
1989 - I Remember You
1991 - Monkey Business
1991 - Slave to the Grind
1991 - Wasted Time
1991 - In A Darkened Room
1992 - Youth Gone Wild/Delivering the Goods
1995 - My Enemy
1995 - Breakin' Down
1995 - Into Another

Videugrafìa

1990 - Oh Say Can You Scream
1993 - No Frills Video
1993 - Road Kill
2003 - Under the Skin

Culegamènt estéran

v · d · m Grup Metal
Alternative metal	The Cult • Electric Six • Faith No More • Foo Fighters • Garbage • Jane's Addiction • Red Hot Chili Peppers • Skunk Anansie • White Zombie
Black metal	Belphegor • Mercyful Fate • Venom
Blues metal	Aerosmith • Cinderella • Lenny Kravitz • Tesla
Comedy rock	The Bates • Bloodhound Gang • Green Jellÿ • H-Blockx • Tenacious D
Death metal	Children of Bodom • Entombed • Morbid Angel
Doom metal	Black Sabbath • Candlemass • H.I.M.• Lacuna Coil • Paradise Lost • Type O Negative
Epic metal	Manowar
Grindcore	Carcass • Napalm Death
Grunge	Alice in Chains • Bush • Jerry Cantrell • Hole • Mad Season • Nirvana • Pearl Jam • Silverchair • Smashing Pumpkins • Sonic Youth • Soundgarden • Stone Temple Pilots
Hard rock	Extreme • Gun • Living Colour • Queen • The Doors • Uriah Heep • Velvet Revolver
Hair metal	Alice Cooper • Bon Jovi • Def Leppard • Europe • Faster Pussycat • Guns N' Roses • Kiss • L.A. Guns • Lita Ford • Mötley Crüe • Mr. Big • New York Dolls • Poison • Quiet Riot • Ratt • Scorpions • Skid Row • Slaughter • T-Rex • Twisted Sister • Van Halen • Vinnie Vincent Invasion • Warrant • W.A.S.P.
Heavy metal	Accept • AC/DC • Doro Pesch • Iron Maiden • Judas Priest • Motörhead • Ozzy Osbourne • Ronnie James Dio
Industrial metal	Fear Factory • Marilyn Manson • Nine Inch Nails • Rammstein
Nu metal	Coal Chamber • Deftones • Korn • Limp Bizkit • Linkin Park • System of a Down
Power metal	Helloween • Iced Earth
Progressive metal	Dream Theater • King Crimson • Queensrÿche
Punk	Blink 182 • Green Day • L7 • Ramones • Sex Pistols • Offspring
Symphonic metal	Apocalyptica • Nightwish
Stoner metal	Kyuss • Queens of the Stone Age
Thrash metal	Anthrax • Down • Exodus • Megadeth • Metallica • Overkill • Pantera • Sepultura • Slayer • Testament